ފަލަސްތީނުގެ ރައްޔިތުންނަށް މިނިވަން ދައުލަތެއް ލިބެން ޖެހޭ ކަމަށާއި ދިވެހިން ތިބީ ފަލަސްތީނުގެ ރައްޔިތުންނާ އެކީ ގަދަކޮށް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރައީސް ސޯލިހު މިހެން ވިދާޅުވީ ފަލަސްތީނުގެ ގާޒާއިން އިޒްރޭލަށް އަމާޒުކޮށް އިއްޔެ ދޭން ފެށި ހަމަލާތަކާ ގުޅިގެން "އެކްސް" ގައި ކުރެއްވި ޕޯސްޓެއްގަ އެވެ.
އެ ޕޯސްޓުގައި ރައީސް ވަނީ ދިފާއު ވެވޭނެ ގޮތެއް ނެތް ފަލަސްތީނުގެ އާންމު ރައްޔިތުންނާ ދެކޮޅަށް އިޒްރޭލުން ނުބައްދަލު ބާރުގެ ބޭނުން ކުރުން ކުށްވެރި ކުރައްވާފަ އެވެ. އަދި ސުލްހަ ޔަގީން ކުރެވޭނެ ހަމައެކަނި ގޮތަކީ ފަލަސްތީނާއި އިޒްރޭލަކީ ދެ ދައުލަތުގެ ގޮތުގައި ބަލައިގަތުން ކަމަށް ވެސް އެމަނިކުފާނު ވިދާޅުވި އެވެ.
ރައީސް މިހެން ވިދާޅުވި އިރު، މި މައްސަލައިގައި ރޭ ފޮރިން މިނިސްޓްރީން ނެރުނު ބަޔާނުގައި ވެސް ވަނީ ގާޒާގެ ހިފާފައިވާ ބިންތަކުން އިޒްރޭލުން ފައިބަން ގޮވާލައި، ދެ ދައުލަތް އޮންނަ ކުރާ ވަކާލާތް ތަކުރާރުކޮށްފަ އެވެ.
