ހުކުރު ދުވަހުގެ ރޭ މާލޭގައި ހިނގި އެކްސިޑެންޓެއްގައި ކުރީގެ ހެލްތު މިނިސްޓަރު އަބްދުﷲ އަމީންގެ ބައްޕަ، އަހުމަދު މަނިކު އަށް ލިބުނު ޒަހަމްތަކަށް ފަރުވާ ދެމުން ދަނިކޮށް ނިޔާވެއްޖެ އެވެ.
އެކްސިޑެންޓަށް ފަހު އައިޖީއެމްއެޗްގެ އައިސީޔޫގައި ފަރުވާ ދެމުން ދަނިކޮށް އުމުރުން 74 އަހަރުގެ އަހުމަދު މަނިކު ނިޔާވީ ރޭ ދަންވަރު އެވެ.
ނިޔާވިއިރު، އޭނާގެ އަންހެނުންނާއި ހަތަރު ދަރިން ދުނިޔޭގައި އެބަ ތިއްބެވެ. އެއީ، އަމީންގެ އިތުރުން ޖަޕާންގައި ހުންނަ ރާއްޖޭގެ ޑެޕިއުޓީ އެމްބެސެޑަރު އަދި ރައްޔިތުންގެ މަޖިލީހުގެ ކުރީގެ މެމްބަރު މުހައްމަދު އަމީތު ވެސް ބައްޕަ އެވެ. އަދި އިތުރު ފިރިހެން ދަރިޔަކާއި އަންހެން ދަރިއެއް ހުރެ އެވެ.
ގދ. ގައްދު އަށް އުފަން އަހަމަދު މަނިކު އެކްސިޑެންޓުވީ، ސައިކަލްގައި ދަނިކޮށް، ބޮޑުތަކުރުފާނު މަގުގައި ހުންނަ އޮކްސިޖެން ކެފޭ ކައިރިން ކާރެއްގައި ޖެހިގެންނެވެ.
އަހުމަދު މަނިކުގެ ޖަނާޒާ އޮންނާނީ މިއަދު އަސުރު ނަމާދަށް ފަހު، ހުޅުމާލޭގަ އެވެ.
