އިޒްރޭލުން ހިފާފައިވާ ފަލަސްތީނުގެ ބިންތަކުން ފައިބަން ރާއްޖޭން އިޒްރޭލަށް ގޮވާލައިފި އެވެ.
ފަލަސްތީނުގެ ޣައްޒާއަށް ދެމުން ގެންދާ ހަމަލަތާ ތަކާ މެދު ކަންބޮޑުވުން ފާޅުކޮށް ފޮރިން މިނިސްޓްރީން މިރޭ ނެރުނު ބަޔާނުގައި ބުނީ ގުދުސާއި ފަލަސްތީނުގެ އެހެން ބިންތައް އިޒްރޭލުން ހިފާފައި އޮތް އޮތުމަކީ ޣައިރު ގާނޫނީ ކަމެއް ކަމަށް ކަނޑައަޅައި އދ.ގެ ސަލާމަތީ މަޖިލީހުން ފާސްކޮށްފައިވާ ގަރާރު ތަންފީޒުކުރަން ގޮވައިލާ ކަމަށެވެ.
"...ދިވެހި ސަރުކާރާއި ރައްޔިތުން އަބަދުވެ ތިބީ ފަލަސްތީނުމީހުންނާ އެކުގަ އެވެ. ފަލަސްތީނު ހިފާފައި އޮތް އޮތުމާއި މާތްވެގެންވާ ގުދުސް އެނެކްސް ކުރުމަކީ ޣައިރު ގާނޫނީ އަދި ގަބޫލުނުކުރެވޭ ކަމެއް ކަން އިއުލާނުކޮށް ސަލާމަތީ މަޖިލީހުން ފާސްކޮށްފައިވާ ގަރާރު ތަންފީޒުކުރުމަށް ގޮވައިލަމެވެ،" އިޒްރޭލުގެ ނަން ނުޖަހައި ފޮރިން މިނިސްޓްރީން ނެރުނު ބަޔާނުގައި ބުންޏެވެ.
ފަލަސްތީނު-އިޒްރޭލު މައްސަލައަށް އޮތް ހައްލަކީ ދެ ދައުލަތް އޮތުން ކަމަށް ރާއްޖޭން ކުރިއްސުރެ ބުނަމުން އަންނަ ބުނުން މިފަހަރުގެ ބަޔާނުގައި ވެސް ތަކުރާރުކޮށްފައި ވެ އެވެ.
އިޒްރޭލުން ހިސާރުކޮށް، އެތައް ފަހަރަކު ބޮން އަޅައި ވީރާނާކޮށްލާފައިވާ ޣައްޒާ ކޮންޓްރޯލް ކުރާ ހަމާސް ޖަމާއަތުން މިއަދު އިޒްރޭލަށް ވަރުގަދަ ހަމަލާތަކެއް ދީ 100 ވަރަކަށް މީހުން ވަނީ މަރާލައިފަ އެވެ. އެ ހަމަލާތަކާ އެކު ހަނގުރާމަ އިއުލާނުކޮށް އިޒްރޭލުން ބޮން އަޅަމުން ދަނީ ޣައްޒާގައި އާއްމުން ދިރިއުޅޭ ގެތަކަށެވެ.
އިޒްރޭލުގެ ހަމަލާތަކުގައި 200 އަށް ވުރެ ގިނަ މީހުން މަރުވެ، 1،000 އަށް ވުރެ ގިނަ މީހުން ވަނީ ޒަހަމްވެފަ އެވެ.
ފަލަސްތީނު މީހުންނާ ދެކޮޅަށް އިޒްރޭލުން ހިންގި އުދުވާނުތަކުގަައި 2008 ވަނަ އަހަރުން ފެށިގެން މިހައިތަނަށް 6،000 އަށް ވުރެ ގިނަ މީހުން ޝަހީދުކޮށްލާފައި ވާއިރު މި މުއްދަތުގައި ފަލަސްތީނު މީހުންގެ ހަމަލާތަކުގައި މަރުވި އިޒްރޭލު މީހުންގެ އަަދަދަކީ 308 އެވެ.
