ރައީސުުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ވައުދާ އެއްގޮތަށް އޭވިއޭޝަން ދާއިރާއާ ގުޅުންހުރި މުއައްސަސާތަކުގެ މުވައްޒަފުންގެ މުސާރަ ބޮޑުުކުރުމަށް ރިވިއުކުރަން ފަށައިފި އެވެ.
އޭވިއޭޝަން ދާއިރާގައި މަސައްކަތްކުރާ މުވައްޒަފުންގެ މުސާރަ ބޮޑުކުރުމުގެ މަސައްކަތް ކުރަމުން އަންނަ ކަމަށް ރައީސް އިބްރާހިމް މުހައްމަދު ސޯލިހު ހާމަކުރެއްވީ ރޭ މާލޭގައި ބޭއްވި ކެމްޕޭނު ޖަލްސާގަ އެވެ. އެ އެމަނުކުފާނު ވިދާޅުވި ގޮތުގައި އެ ދާއިރާގެ މުވައްޒަފުންގެ މުސާރައަށް ބަދަލު ގެންނަން އޮނިގަނޑު ރިވިއުކުރަން މިހާރު ވަނީ ފަށާފަ އެވެ.
ރައީސްގެ މި ވައުދާ އެއްގޮތަށް މިހާރުވެސް ތިން އިދާރާއެއްގެ މުވައްޒަފުންގެ މުސާރަ ރިވިއުކުރަން ފަށާފައިވާކަން ސަރުކާރުގެ އޮފިޝަލަކު ވަނީ މި ނޫހަށް ޔަގީންކޮށްދީފަ އެވެ.
އެގޮތުން މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)ގެ ގްރައުންޑް ހޭންޑްލިންގައި މަސައްކަތްކުރާ މުވައްޒަފުންނާއި އެއާ ނެވިގޭޝަން ސާވިސަސްގައި މަސައްކަތް ކުރާ މުވައްޒަފުންގެ މުސާރަ ރިވިއު ކުރުމުގެ މަސައްކަތް މިހާރު ފަށާފައިވާ ކަމަށް އޮފިޝަލު ވިދާޅުވި އެެވެ.
އޭގެ އިތުރުން ސިވިލް އޭވިއޭޝަން އޮތޯރިޓީ އާއި އައިލެންޑް އޭވިއޭޝަންގެ މުވައްޒަފުންގެ މުސާރަވެސް ރިވިއުކުރަމުންދާ ކަމަށްވެސް ވިދާޅުވި އެވެ.
އައިލެންޑް އޭވިއޭޝަންގެ މެނޭޖިން ޑިރެކްޓަރު މުހައްމަދު މިހާދުވެސް ވަނީ އެ ކުންފުނީގެ މުވައްޒަފުންގެ މުސާރަ ރިވިއުކުރަން ފަށާފައިވާ ކަމަށް ވިދާޅުވެފަ އެވެ.
މިހާދު މިއަދު މި ނޫހަށް ވިދާޅުވީ އެ ކުންފުނީގެ މުވައްޒަފުންގެ މުސާރައިގެ އޮނިގަނޑާ ބެހޭ މައުލޫމާތު މިހާރު ސަރުކާރާ ހިއްސާކޮށްފައިވާ ކަމަށެވެ. އަދި އެ ރިވިއުތަކަށްފަހު މުވައްޒަފުންގެ މުސާރަތަކަށް ރަނގަޅު ހެޔޮ ބަދަލެއް އަންނާނެ ކަމަށް ގަބޫލުކުރައްވާ ކަމަށް ވިދާޅުވި އެވެ.
އޭވިއޭޝަން ދާއިރާގެ މުވައްޒަފުންގެ މުސާރަ ބޮޑުކުރުމާ ގުޅޭ ގޮތުން ރޭގެ ޖަލްސާގައި ރައީސް ވިދާޅުވީ ޕައިލެޓުންނާއި އިންޖިނިއަރުންނާއި ކެބިންކްރޫއިންނާއި މި ދާއިރާގައި މަސައްކަތްކުރާ ހުރިހާ ބޭފުޅުންނަށް މުސާރައިގެ ކުރިއެރުން ލިބޭނެ ކަމަށެވެ.
ރައީސް ވިދާޅުވި ގޮތުގައި، މުސާރައިގެ ކުރިއެރުން ދިނުމުގައި ސަރުކާރުން ބަލަނީ އެއްވެސް ދާއިރާއެއް ބާކީނުކޮށް، އެންމެންނަށް ހަމަހަމަ އުސޫލަކުން އެކަން ކޮށްދިނުމަށެވެ.
އޭވިއޭޝަން ދާއިރާގެ މުވައްޒަފުންގެ މުސާރަ ބޮޑުކުރުމަށް ނިންމި އިރު ޖެނުއަރީ މަހުން ފެށިގެން ހުރިހާ ދާއިރާއެއްގެ މުސާރަ ބޮޑުކުރަން ރައީސް ވަނީ ނިންމަވައިފަ އެވެ. ޕޭ ހާމަނައިޒޭޝަންގެ ދަށުން ތައުލީމީ، ސިއްހީ އަދި ސިވިލް ސާވިސް މުވައްޒަފުންގެ މުސާރަ ވަނީ ބޮޑުކޮށްފަ އެވެ.
