ހިޔާ ފްލެޓެއްގެ ބެލްކަންޏެއްގައި ކުޑަކުއްޖަކު ބަންދުކުރި މައްސަލައެއް ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން ބަލަން ފަށައިފި އެވެ.
ހިޔާ ފްލެޓްގެ ޓަވަރު ހައެއްގެ ބެލްކަންޏެއްގައި ކުޑަކުއްޖަކު އެކަހެރިކޮށް ތަޅުލާފައި ހުރި ވީޑިއޯއެއް އަންނަނީ މީޑިއާގައި ދައުރުވަމުންނެވެ. ފްލެޓް ތެރެއަށް ނުވަދެވިގެން އެކުއްޖާ ރޯ އަޑު އަދި ވަންނަން މަސައްކަތް ކުރާ މަންޒަރު ވެސް ވީޑިއޯއިން ފެނެ އެވެ.
އެ މައްސަލާގައި އެޗްއާރްސީއެމް އިން ބުނީ ރޭގެ ވަގުތެއްގަ ހިޔާ ފްލެޓުގެ ބެލްކަންޏެއްގައި ކުޑަކުއްޖަކު އެކަހެރިކޮށް، ތަޅުލާފަ ހުރި ވީޑިއޯއެއް މީސް މީޑިއާގައި ދައުރުވަމުންދާތީ އެ މަައްސަލަ ކަމާ ބެހޭ އިދާރާތަކުން ބަލަމުން އަންނަ ކަމަށެވެ.
އޭގެ އިތުރުން ކުޑަކުދިންނާ ގުޅުން ހުރި ވީޑިއޯތައް މީސް މީޑިއާގައި ދައުރުކުރުމަކީ ކުޑަކުދިންގެ ކަރާމާތަށް ނުސީދާ ގޮތަކަށް އަސަރު ކޮށްފާނެ ކަމަކަށް ވާތީ، ކުޑަކުދިންނާ ގުޅުންހުރި އެފަދަ ވީޑިއޯ މީސް މީޑިއާގައި ހިއްސާ ނުކުރުމަށް އެޗްއާރްސީއެމުން ވަނީ އިލްތިމާސްކޮށްފަ އެވެ.
އެގޮތުން އެފަދަ ކަމެއް ފާހަގަ ކުރެވިއްޖެ ނަމަ، ކަމާ ގުޅޭ އިދާރާތަކަށް ރިޕޯޓުކުރުމަށް ވެސް އެޗްއާރްސީއެމުން ވަނީ އެދިފަ އެވެ.
