މިއަދު ސޯޝަލް މީޑިއާގައި ދައުރުވަމުންދާ ވީޑިއޯއަކީ ގދ. ތިނަދޫގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލްގައި ފަރުވާ ދެމުންގެންދިޔަ ދެ އަހަރުގެ ކުޑަކުއްޖަކު ޑޯނިއާ ފްލައިޓުގައި އިތުރު ފަރުވާއަށް މާލެ ގެނައި ދަތުރުގެ ވީޑިއޯއެއް ކަމަށް އެމްއެންޑީއެފުން ބުނެފި އެވެ.
ދައުރުވަމުންދާ ފޮޓޯ އަދި ވީޑިއޯތަކާ ގުޅިގެން "އަދަދު" އިން ސުވާލު ކުރުމުން އެމްއެންޑީއެފްގެ މީޑިއާ އޮފިޝަލް ވިދާޅުވީ، އެ ދަތުރަކީ މެޑިކަލް އެވެކުއޭޝަންއެއް ކަމަށެވެ.
އަދި ޑޯނިއާ ފްލައިޓު ދަތުރުކުރީ ހަނިމާދޫއިން ކާޑެއްދޫ އަށް އަދި ކާޑެއްދޫއިން މާލެއަށް ކަމަށާއި ބޯޓު މިހާރު އެނބުރި ހަނިމާދޫއަށް ގޮސްފައިވާ ކަމަށްވެސް އޭނާ ވިދާޅުވި އެވެ.
"ޑރ. އަބްދުއްސަމަދު މެމޯރިއަލް ހޮސްޕިޓަލުގައި ފަރުވާ ދެމުންދިޔަ ކުޑަކުއްޖެއްގެ ހާލު ސީރިއަސް ވެގެން މާލެ ގެންނަން ކުރި ދަތުރެއް މިއަދު މެންދުރު ފަހު ކުރީ" ސިފައިންގެ އޮފިޝަލު ވިދާޅުވި އެވެ.
ސޯޝަލް މީޑިއާގައި ދައުރުވަމުންދާ ޕޯސްޓުތަކުގައި ބުނެފައިވަނީ މިއަދު ޑޯނިއާ މާލެއަށް ދަތުރުކުރީ ހަނިމާދޫގައި ތިބި ކަމަށްބުނާ އިންޑިއާ ސިފައިން ގޮވައިގެން ކަމަށެވެ. އަދި އެމީހުން މާލެއަށް ގެނެސްފައިވަނީ ރިޔާސީ އިންތިހާބާ ދިމާކޮށް ރައްޔިތުންނަށް އޮޅުވާލައި ހުޅުލޭގައި ބޭތިއްބުމަށް ކަމަށްވެސް ބުނެފައިވެ އެވެ. ނަމަވެސް އެމްއެންޑީއެފުން ވަނީ އެކަން ދޮގުކޮށްފަ އެވެ.
ރައީސް އޮފީހުގެ ތަރުޖަމާނު މިއުވާން މުހައްމަދުވެސް ވަނީ ދައުރުވަމުންދާ ވީޑިއޯތައް ދޮގުކޮށް، ރައްޔިތުންގެ ހިތުގައި ބިރުވެރިކަމާއި ނަފްރަތު އުފެދޭގޮތަށް ހަބަރު ފެތުރުމަކީ ނޫސްވެރިކަމުގެ ހަމަތަކާއި މުޅިން ހިލާފު، ދަށު ދަރަޖައިގެ އަމަލެއް ކަމަށް ވިދާޅުވެފަ އެވެ.
ޑޯނިއާ ބޯޓާ ބެހޭގޮތުން މި ވާހަކަތައް ދައުރުވަމުން މިދަނީ، ހޮނިހިރު ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރުގައި ކުރިމަތިވި ނާކާމިޔާބީއަށްފަހު، ކެމްޕޭނުގައި ދިމާވި އެންމެ ބޮޑު ގޮންޖެހުމަކަށްވީ އިދިކޮޅުން ފެތުރި ދޮގުތަކަށް ރައްދުނުދެވުން ކަމަށާއި، ދެވަނަ ބުރުގައި ހާމަކުރެވެންހުރި ހުރިހާ އެއްޗެއް ހާމަކޮށް އިތުރަށް ހަގީގަތް އޮޅުންފިލުވައިދެއްވާނެ ކަމަށް ރައީސް ވިދާޅުވެފައި ވަނިކޮށެވެ.
ރައީސް ފާހަގަ އެ ކުރެއްވީ ދެ ވަނަ ދައުރަކަށް އެ މަނިކުފާނު އިންތިހާބު ވެއްޖެ ނަމަ، ރާއްޖެ އިންޑިއާގެ "ސްޓޭޓަކަށް" ވެގެންދާނެ ކަމަށް ފެތުރި ދޮގު ވާހަކަތަކަށެވެ. އިންޑިއާ އައުޓު ކެމްޕޭނުގައި ދެއްކި އެ ވާހަކަތައް ރައްޔިތުންނަށް ގަބޫލު ކުރެވޭ މިންވަރަށް ފެތުރި ކަމަށެވެ.
"އެއީ އެންމެ ބޮޑު ޗެލެންޖު ފުރަތަމަ ބުރުގައި، އިރާދަކުރެއްވިއްޔާ މި ބުރުގައި ހާމަކުރެވެން ހުރި ހުރިހާ އެއްޗެއް އަޅުގަނޑުމެން ރައްޔިތުންނަށް ހާމަކޮށްދޭނަން، އެއީ ދޮގު ކަމަށް، އޭގަ ރާއްޖޭގެ މިނިވަންކަމާއި ރާއްޖޭގެ ސަރަހައްދުގެ ބައެއް ގެއްލޭ ގޮތަށް އެއްވެސް ކަމެއް ކޮށްފަ ނޯންނާނެ ކަން،"
"އެ އެއްޗެހިތައް ކިޔައިދިނީމަ އަޅުގަނޑު ހިތުން ރައްޔިތުންނަށް ވިސްނޭނެ މިއީ އޮޅުވާލުމަކާއި ދޮގެއްގެ ތެރެއިން ކޮށްފަ ހުރި ކަންތައްތައް ކަން، އަޅުގަނޑު ހިތުން އެކަން ކުރެވޭނެ ދެވަނަ ބުރުގެ ތެރޭގަ."
އިންތިހާބަށް ފަހު މިއަދު ރާއްޖެ ޓީވީއަށް ދެއްވި ފޯން އިންޓަވިއުއެއްގައި ރައީސް ސޯލިހު ވިދާޅުވި އެވެ.
