ރިޔާސީ އިންތިހާބުގައި ވޯޓުލާން މާލޭގެ ޕޯލިން ސްޓޭޝަންތަކަށް މީހުން ޖަމާވާން ފެށި އިރު މާލޭ މީހުުން ވޯޓްލާ ސްޓޭޝަންތަކުގައި އެހެން ތަންތަނަށް ވުރެ ދިގު ކިއުތައް ހަދައިފި އެވެ.
މާލޭގައި ވޯޓުލާ މަރުކަޒުތައް "އަދަދު"ގެ ނޫސްވެރިން ހެނދުނު ބަލައިލި އިރު ހުރިހާ މަރުކަޒުތަކުގައި ވެސް ކޮންމެވެސް ވަރަކަށް މީހުން ގޮސް ތިއްބެވެ. އެހެން ނަމަވެސް ދިގު ކިއުއެއް ދަމާލާފައި އޮތީ މާލޭގެ ބައެއް ދާއިރާތަކުގެ މީހުން ވޯޓްލާ ހިރިޔާ ސްކޫލްގަ އެވެ.
ހިރިޔާ ސްކޫލުގެ ކިއުގައި ހުރި މާލޭ މެދު ދާއިރާގެ ރައްޔިތެއް ކަމަށްވާ މުހައްމަދު ހަލީލު ބުނީ މީގެ ކުރިން ބޭއްވި އިންތިހާބުތަކާ އަޅައި ބަލާއި އިރު އެދާއިރާގައި އަވަހަށް ވޯޓުލާން ނުކުތް މީހުންގެ އަދަދު ގިނަކަން ފާހަގަވާ ކަމަށެވެ.
"އަަޅުގަނޑު އަވަހަށް އައިސް މިހިރީ އަވަހަށް ވޯޓުލައި ވޯޓުގެ ކަންތައް އަވަހަށް ނިންމަން. މިފަހަރު މިހާ ގިނަ ބަޔަކު އަވަހަށް ނުކުތީ ކީއްވެކަން ދަންނަވާކަށް ސީދާ ނޭނގޭ،" ހަލީލު ބުންޏެވެ.
ޣިޔާސުއްދީން ސްކޫލުގައި ހުރި ވޯޓުފޮށިތަކުގެ ކައިރީގައި ވެސް ކޮންމެވެސް ވަރަކަށް ކިއު ހަދައިގެން ތިބި އިރު އެ ސްކޫލުން ވާހަކަ ދެއްކި ބައެއް މީހުން ބުނި ގޮތުގައި ވޯޓްލާން އަވަސް އަވަހަށް ނުކުތީ މިއަދު ވެސް މަސައްކަތް ކުރަން ޖެހޭތީ މަސައްކަތަށް ނިމުމުގެ ކުރިން ވޯޓުގެ ކަންތައް ނިންމުމަށެވެ.
"އަހަރެންނަކީ ޓެކްސީ ދުއްވާ މީހެއް. އެހެންވީމާ ދަތުރުތަކަށް ފެށުމުގެ ކުރިން ވޯޓްލާން ނުކުތީ،" ޣިޔާސުއްދީން ސްކޫލުން ވާހަކަ ދެއްކި މީހަކު ބުންޏެވެ.
ދަރުމަވަންތަ ސްކޫލުގައި ހުރި ތ. އަތޮޅު ރަށެއްގެ ފޮށްޓެއްގެ ކައިރީ ހުރި "އަދަދުގެ" މޮނީޓަރަކު ބުނި ގޮތުގައި 2018 ވަނަ އަހަރާ އަޅާ ބަލާއިރު ވޯޓުލުމުގެ ފޯރި އޭނާއަށް ފެނުނީ ދަށްކޮށެވެ.
މިއަދުގެ އިންތިހާބުގައި ޖުމްލަ އަށް ބޭފުޅަކު ވާދަކުރައްވަ އެވެ. އެއީ އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހު، ޕީއެންސީގެ ކެންޑިޑޭޓް ޑރ.މުހައްމަދު މުއިއްޒު، ޖުމްހޫރީ ޕާޓީގެ ކެންޑިޑޭޓް ގާސިމް އިބްރާހީމް، ޑިމޮކްރެޓްސްގެ ކެންޑިޑޭޓް އިލްޔާސް ލަބީބް، އެމްއެންޕީގެ ކެންޑިޑޭޓް މުހައްމަދު ނާޒިމު އަދި އަމިއްލަ ގޮތުން ވާދަކުރައްވާ އުމަރު ނަސީރު، ފާރިސް މައުމޫނު އަދި ހަސަން ޒަމީލެވެ.
