ރިޔާސީ އިންތިހާބުގައި އަމިއްލަގޮތުން ވާދަކުރައްވާ ފާރިސް މައުމޫން، ޖަލު ހުކުމެއް ތަންފީޒުކުރަމުންދާ އޭނާގެ ބޮޑުބޭބެ، ކުރީގެ ރައީސް އަބްދުﷲ ޔާމީނާ ބައްދަލުކުރި ކަމަށް ފެތުރެމުންދާ އަޑުތައް ދޮގުނުކުރައްވައި، އެކަމާ ބެހޭގޮތުން ފަހުން ރަސްމީ ބަހެއް ވިދާޅުވާނެ ކަމަށް ފާރިސް ވިދާޅުވެެއްޖެ އެވެ.
ފާރިސް މިހެން ވިދާޅުވީ ރޭ އެންދެރިމާގޭގައި ބޭއްވި ކެމްޕޭން ހަރަކާތުގެ ތެރެއިން "އަދަދު" އަށް ދެއްވި ކުރު އިންޓަވިއުއެއްގަ އެވެ. މި ހަރަކާތުގައި ކުރީގެ ރައީސް މައުމޫން އަބްދުލްގައްޔޫމާއި އަނބިކަނބަލުން ނަސްރީނާ އިބްރާހިމް ބައިވެރިވެވަޑައިގަތެވެ.
"އަޅުގަނޑު ކުރިންވެސް ދަންނަވާފަ އޮންނާނެ ތިކަމާ ބެހޭގޮތުން ފުރިހަމަ ތަފުސީލު ހާމަކުރާނެ ކަމަށް އިނގޭތޯ"
ޔާމީނާ ބައްދަލުކުރުމާ ބެހޭގޮތުން ވަކި ބަހެއް ނުބުނި ނަމަވެސް، ދެވަނަ ބުރަކަށް ނުގޮސްފިނަމަ އެހެން ކެންޑިޑޭޓަކަށް ތާއީދުކުރުމުގެ ވިސްނުން ގެންގުޅުއްވާކަން ދޭވަހާ ފަދަ މޭރުމަކުން ފާރިސް ރޭ ވާހަކަދެއްކެވި އެވެ.
"އަޅުގަނޑު އެކަމަކަށް [ދެވަނަ ބުރެއްގައި އެހެން ކެންޑިޑޭޓަކަށް ތާއީދުކުރުމަށް] އަދިވެސް ނޫނެކޭ ނުބުނަން، އަޅުގަނޑުމެން މި ހުށަހަޅާ ކަންތައްތައް ބަލައިގަންނަ ބަޔަކާ އެކީގަ އަޅުގަނޑުމެންނަށް މަސައްކަތް ކުރެވޭނީ، އެހިސާބަށް ދިޔައިމަ ވަކި ގޮތެއް ނިންމޭނީ"
ރިޝްވަތު ހިފުމާއި މަނީ ލޯންޑަރިންގެ ކުށް ސާބިތުވެ 11 އަހަރުގެ ޖަލު ހުކުމެއް ތަންފީޒުކުރަމުންދާ ޔާމީނު މިހާރު ހުންނެވި މާފުށި ޖަލަށް ވަދެ ނުކުންނަ މަންޒަރު ފެންނަ ވީޑިއޯ އަދި ފޮޓޯތަކެއް ސޯޝަލްމީޑިއާގައި ދައުރުވާން ފެށީ މިދިޔަ ހަފުތާގެ ތެރޭގަ އެވެ.
ނަމަވެސް، އެއާއެކު ޕީޕީއެމުން ވަނީ ފާރިސް ޔާމީނާ ބައްދަލުކުރިކަން ދޮގުކޮށްފަ އެވެ. އެ ޕާޓީން ނެރުނު ބަޔާނެއްގައި ބުނީ ޔާމީންގެ ތާއީދު އޮތީ ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު އަށް ކަމަށާއި ފާރިސް، ޔާމީނާ ބައްދަލުކުރި އަޑުތަކަކީ ކޯލިޝަންގެ މެންބަރުން ބައިބައި ކުރަން ސަރުކާރުން ކުރާ މަސައްކަތެއް ކަމަށެވެ.
"މިއީ މި ކޯލިޝަންގެ މެންބަރުން ބައިބައިކޮށް ފިތުނަ އުފެއްދުމުގެ ބޭނުމުގައި ބަޔަކު ފަތުރަމުން ގެންދާ ދޮގު ހަބަރެއް،" ޕީޕީއެމްގެ ބަޔާނުގައި ބުނެފައިވެ އެވެ.
އިދިކޮޅު ލީޑަރު ޔާމީނު ޖަލުގައި ހުންނެވީ ވ. އާރަށް ކުއްޔަށް ދިނުމުގެ މުއާމަލާތުގެ ތެރެއިން ރިޝްވަތު ހިފުމާއި އެ ފައިސާ ލޯންޑާ ކުރި ކަމުގެ ކުށް ސާބިތުވެގެންނެވެ.
ޔާމީނުގެ ފަރާތުން އެ ހުކުމް ހައި ކޯޓުގައި އިސްތިއުނާފު ކޮށްފައިވާއިރު އަޑުއެހުންތައް ދަނީ ކުރިއަށެވެ. ޕީޕީއެމުން ޓިކެޓު ދިން ނަމަވެސް މި އަހަރުގެ ރިޔާސީ އިންތިހާބުގައި ޔާމީނަށް ވާދަނުކުރެވުނީ ވެސް މި ހުކުމުގެ ސަބަބުންނެވެ. އެމަނިކުފާނު ޝަރުތު ހަމަނުވާ ކަމަށް ސުޕްރީމް ކޯޓުން ވަނީ ކަނޑައަޅާފަ އެވެ.
