ބޭރު ގައުމުތަކުން ނަގާފައިވާ ލޯނުތަކަށް 2026 ވަނަ އަހަރު ގިނަ އަދަދެއްގެ ފައިސާ އެއްފަހަރާ ދައްކަން ޖެހޭއިރު މާލީ އިދާރާތަކުގެ އިތުބާރު މިއަދު ރާއްޖެއަށް އެބައޮތް ކަމަށާއި އެހެންކަމުން އެމަނިކުފާނުގެ ދެވަނަ ދައުރެއްގައި އެ ދަރަނި ދައްކައި ހަލާސްކުރައްވާނެ ކަމަށް އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ނިމިގެންދިޔަ 2022 ވަނަ އަހަރު ހިމަނައިގެން 2025 ވަނަ އަހަރާ ހަމައަށް އެވަރެޖުކޮށް އަހަރަކު 367 މިލިއަން ޑޮލަރު ދަރަނި ދައްކަން ހަރަދުކުރަން ޖެހެ އެވެ. ނަމަވެސް 2026 ވަނަ އަހަރު 800 މިލިއަން ޑޮލަރު ދައްކަން ޖެހޭ ކަމަށް ސަރުކާރުން ވަނީ ބުނެގފަ އެވެ. އެ ބޮޑު އަދަދެއް ދައްކަން ޖެހެނީ ސަރުކާރުން ވިއްކާފައިވާ 500 މިލިއަން ޑޮލަރުގެ ސުކޫކާއި 100 މިިލިއަން ޑޮލަރުގެ އަބޫދާބީ ބޮންޑަށް އަނބުރާ ފައިސާ ދައްކަން ޖެހޭތީ އެވެ
ތާއިދު ހޯދަން އެމްޑީޕީން ކުޅުދުއްފުށީ ސިޓީގައި މިރޭ ބޭއްވި ޖަލްސާގައި ގިނަ ބަޔަކު ވަނީ ބައިވެރިވެފައި. -- ފޮޓޯ: މިރާން ނާޝިމް/ އަދަދު
މިރޭ ހދ. ކުޅުދުއްފުށީ ސިޓީގައި ވާހަކަފުޅު ދައްކަވަމުން ރައީސް ސޯލިހު ވަނީ ރާއްޖެ ދަރާނެ ކަމަށް ބުނެ އިދިކޮޅު ފަރާތްތަކުން ކުރަމުންދާ ތުހުމަތުތަކަށް އަނެއްކާ ވެސް ރައްދު ދެއްވާފަ އެވެ. އަދި, މިރޭ ވަނީ އެމަނިކުފާނުގެ ސަރުކާރުން އެ ދަރަނި ދައްކަން ނިންމާފައިވާ ގޮތާއި ގުޅޭ ގޮތުން ވާހަކަ ދައްކަވާފަ އެވެ.
"ވާދަވެރިން އަމާޒުކޮށް ދައްކާ އެއް ވާހަކަައަކީ ރާއްޖެ ބަނގުރޫޓު ވެފައި އޮތް ވާހަކަ. ދަރާ ވިކިފައި އޮތް ވާހަކަ. ދަންނަވަތޯ އެއީ ބުހުތާން ބޮޑު ދޮގު. އެނގި ތިބެ ރައްޔިތުންނަށް އޮޅުވާލަން ދައްކާ ވާހަކަ އެެއީ. ސިޔާސީ ބޭނުމެއްގައި ދައްކާ ވާހަކަ އެއީ," އެކަމާ ގުޅިގެން ރައީސް ވިދާޅުވި އެވެ.
އެއަށް ފަހު އެމަނިކުފާނު ވަނީ ދަރަނީގެ ގޮތުގައި ދައްކަން ޖެހެނީ 800 މިލިއަން ޑޮލަރު ކަމަށާއި އޭގެ ތެރޭގައި 100 މިލިއަން ޑޮލަރަކީ އަބޫ ދާބީ ފަންޑު ފޯ ޑިވެލޮޕްމެންޓު (އޭޑީއެފްޑީ) ނަގާފައިވާ ލޯނު ކަމަށް ވިދާޅުވި އެވެ. އަދި, މިހާރު ވެސް އެ ލޯނު ދެއްކުން ފަސް ކުރުމަށް ނިމިފައިވާ ކަމަށް ރައީސް ވިދާޅުވި އެވެ.
އަދި, ދެން އޮތް 500 މިލިއަން ޑޮލަރަކީ ކޮވިޑުގެ ތެރޭގައި ނެގި ސުކޫކު ކަމަށާއި އެކަން ކުރަން ޖެހުނު ސަބަބު ހުރިހާ ރައްޔިތުންނަށް ވެސް އެނގޭނެ ކަމަށް ރައީސް ވިދާޅުވި އެވެ. އޭގެ ތެރެއިން 250 މިލިއަން ޑޮލަރު ޕީޕީއެމްގެ ސަރުކާރުން ނަގާފައި އޮތް ސަނީ ސައިޑް ބޮންޑަށް ދައްކަން ޖެހުނު ކަމަށް ވެސް ވިދާޅުވި އެވެ.
"އެ ދައްކަން ޖެހުނު. އެ ނުދެއްކި ނަމަ ސަރުކާރު އޮންނާނީ ޑިފޯލްޓް ވެފައި. 500 މިލިއަން ޑޮލަރުން ކުރި ފުރަތަމަ ކަމަކީ އެ ސަނީ ސައިޑް ބޮންޑަށް 250 މިލިއަން ޑޮލަރު ދެއްކުން. ދެން ހުރި ފައިސާ ހަރަދުކުރީ އެ ވަގުތު ކޮންމެހެން ކުރަން ޖެހިފައި ހުރި ކަންކަމަށް," ރައީސް ވިދާޅުވި އެވެ.
ވާދަވެރިން ދަރަނީގެ ވާހަކަ ދެއްކެވި ނަމަވެސް އަދިވެސް އެ ދަރަނި ދެއްކޭނެ ގޮތެއް ދެއްކިފައި ނުވާ ކަމަށް ރައީސް ވިދާޅުވި އެވެ.
"އޭގެ ތެރެއިން ދެ ބައިކުޅަ އެއްބައި ރީފައިނޭންސް ކުރަން ވަނީ ނިންމާފައި. މިހާރު ވެސް އެ މަސައްކަތް ފަށައިގެން ކުރިއަށް އެބަދޭ. ސަރުކާރަށް ބޭރުގެ ފައިނޭންޝިއަލް އިންސްޓިޓިއުޝަންތަކުން އެއް ބިލިއަން ޑޮލަރު ދެ ބިލިއަން ޑޮލަރު ހޯދުމަކީ މިއަދު އުނދަގޫ ކަމެއް ނޫން," އަންނަ ދައުރަށް ހުރި ޕްލޭންތައް ހިއްސާކުރައްވަމުން ރައީސް ވިދާޅުވި އެވެ.
ބޭރު ގައުމުތަކުން ފައިސާ ދެނީ އިތުބާރުގެ މައްޗަށް ކަމަށާއި އެ ނަގާ ފައިސާ ދެއްކޭނެ ކަމުގެ ޔަގީންކަން އޮތް ނަމަ ފައިސާ ލިބޭނެ ކަމަށް ރައީސް ވިދާޅުވި އެވެ. އެއީ, ފައިސާއެއް ނަގައިފިނަމަ އެ ހަރަދުކުރާ ގޮތް ވަރަށް ސާފުކޮށް ހާމަކުރަމުންދާތީ ކަމަށް ރައީސް ވިދާޅުވި އެވެ.
"އެއްވެސް އެއްޗެއް ފޮރުވިފައި ނޯންނާނެ. މިއީ މުއްސަދި ގައުމެއް. މިއީ އެސެޓް ބޮޑު ގައުމެއް. ކޮންމެ ތަނަކަށް ދިޔަޔަސް އެއް ބިލިއަން ފަސް ބިލިއަން ބޮރޯ ކުރުމަކީ އުނދަގޫ ކަމެއް ނޫން. މިކަން ސާފުކޮށް ހުރިހާ ބޭފުޅުންނަށް އެނގިވަޑައިގަންނަވާނެ," ރައީސް ވިދާޅުވި އެވެ.
އިންތިހާބަށް ވައުދުވަމުން ދަނީ އެކަން ސާފުކޮށް އެނގި ތިބެ ކަމަށާއި މިއަހަރުގެ ކެމްޕޭނުގެ ތެެރެއިން 31 ބިލިއަން ރުފިޔާގެ މަޝްރޫއުތައް އިއުލާންކުރި ކަމަށް ރައީސް ވިދާޅުވި އެވެ. އަދި އިގްތިސާދު ދެ ގުނަ ވުމާ އެކު ލޯނު ދައްކައި ވައުދު ވެސް ފުއްދޭނެ ކަމަށް ވިދާޅުވި އެވެ.
ކުޅުދުއްފުއްޓަށް ވި ވައުދުތައް
- ކުޅުދުއްފުށި އިތުރަށް .ބޮޑުކުރެވެން އޮތް ވަރު ބަލައި ޝޯ ޕްރޮޓެކްޝަން ޖެހުން
- ބައިނަލްއަގްވާމީ ފެންވަރުގެ ރެކްރިއޭޝަނަލް ޒޯނެއް ހެދުން
- އެތެރޭގެ ވިޔަފާރިތައް ހާއްސަކޮށްގެން ލޯކަލް ކޮމާޝަލް ހާބަރެއް ގާއިމުކުރުން
- ހުރިހާ މަގެއް ޒަމާނީ ފެންވަރަށް ތަރައްގީކޮށް ނިންމުން
- ޔޮޓާއީ ކްރޫޒް ލައިނާއަށް ހިދުމަތް ދެވޭނެ ހަދައިދޭނަން
- އެއާޕޯޓު އުތުރަށް އޮތް ބިމަށް އެކްސެސް މަގެއް ހެދުން
- ކޮންވެންޝަން ސެންޓަރެއް ތަރައްގީ ކުރުން
- ޕިކްނިކް އައިލެންޑެއް ހޯދައިދިނުން
- ލޯކަލް ޓޫރިޒަމް ފުޅާ ކުރަން ފައިނޭންޝިއަލް ޕެކޭޖެއް ތައާރަފްކުރުން
