ޓޫރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް) އިން ރިޔާސީ އިންތިހާބުގައި ރައީސުލްޖުމުހޫރިއްޔާ އިބްރާހީމް މުހައްމަދު ސޯލިހަށް ތާއީދުކުރަން ނިންމައި، އެކަން އިއުލާނުކޮށްފި އެވެ.
އެ އެސޯސިއޭޝަނުން ނެރުނު ބަޔާނެއްގައި ބުނީ، އެހެން އެއްވެސް ދައުރެއްގައި ކޮށްދީފައިނުވާ މިންވަރަށް ރައީސް ސޯލިހުގެ ވެރިކަމުގެ ފަސް އަހަރުގެ ތެރޭގައި ރިސޯޓުތަކުގެ މަސައްކަތްތެރިންގެ ހައްގުތައް ރައްކާތެރިކުރުމަށް މަސައްކަތްތަކެއް ކޮށްދީ، އެއްބާރުލުން ދީފައިވާ ކަމަށެވެ.
ޓީމްގެ ބަޔާނުގައި ވަނީ ފަތުރުވެރިކަމުގެ ސިނާޔަތުގެ މަސައްކަތްތެރިންނަށް ރައީސް ސޯލިހުގެ ވެރިކަމުގައި ކޮށްދެއްވާފައިވާ ކަންކަމާއި، އިތުރު ދައުރެއް ލިބިއްޖެ ނަމަ ކޮށްދެއްވާނެ ކަމަށް ވެފައިވާ ވައުދުތައް ވެސް ފާހަގަކޮށްފަ އެވެ.
ފާއިތުވެދިޔަ ފަސް އަހަރު ފަތުރުވެރިކަމުގެ ސިނާޔަތުގެ މަސައްކަތްތެރިންނަށް ކޮށްދިން ކަންކަން
- އިންޓަނޭޝަނަލް ލޭބާ އޯގަނައިޒޭޝަން (އައިއެލްއޯ) އަދި ބައިނައްލަގުވާމީ ޖަމިއްޔާތަކާއި ގުޅުން ބަދެހިކޮށް ގިނަ މަސައްކަތްތަކެއް ކުރަން ފެށިފައިވުން
- މަސައްކަތްތެރިންގެ ބައިވެރިވުމާއި މަޝްވަރާއާއެކު މިނިމަމް ވޭޖް ކަނޑައަޅައި، ރިސޯޓްތަކުގެ މުވައްޒަފުންގެ މުސާރައަށް ބޮޑު ކުރިއެރުމެއް ލިބުން
- 10 ފަސެންޓު ސާވިސް ޗާޖް ނެގުން ލާޒިމުކޮށް، މޮނީޓާ ކުރުމުގެ ނިޒާމް ހަރުދަނާކޮށް ގާނޫނަށް އިސްލާހު ގެނެވި، ތަންފީޒުކުރަން ފެށުން
- އުސޫލެއް ހަމައެއް ނެތި ވަޒީފާއިން ވަކިކުރުން ހުއްޓުވުމަށް ގާނޫނު އިސްލާހުކުރެވި، ގަވާއިދު އެކުލަވާލުން
- ރިސޯޓު މުއައްޒަފުން އެދުނު ގޮތަށް ބޮޑު ޗުއްޓީ ބަދަލުކުރުން
- ރިސޯޓުގައި މަސައްކަތްކުރާ ވަގުތު ފިޔަވައި ހުސްވަގުތުތަކުގައި އެއްވެސް ހުއްދައެއް ހޯދުމެއް ނެތި ރިސޯޓުން ފޭބޭ ގޮތަށް ގާނޫނު ބަދަލުކުރުން
- މަސައްކަތު މާހައުލުގެ ސަލާމަތާއި ރައްކާތެރިކަމުގެ ބިލް ރައްޔިތުންގެ މަޖިލީހަށް ހުށަހެޅުން
- ޓީމްގެ މަޝްވަރާއާއެކު އިންޑަސްޓްރިއަލް ރިލޭޝަން ބިލަށް ބޮޑެތި ބަދަލުތަކެއް ގެނެސް، ރައްޔިތުންގެ މަޖިލީހަށް ހުށަހެޅުން
ކުރިއަށް އޮތް ދައުރުގައި ފަތުރުވެރިކަމުގެ ސިނާޔަތުގެ މަސައްކަތްތެރިންނަށް ވެފައިވާ ވައުދުތައް
- ފަތުރުވެރިކަމުގެ މަސައްކަތްތެރިންނަށް ހާއްސަ ބޯހިޔާވަހިކަން.
- މަސައްކަތްތެރިންނަށް ފަސޭހަކަމާއެކު އާއިލާ ގާތަށް ދެވޭނެ ގޮތަށް ރިސޯޓްތައް ޒަމާނީ ހައި ސްޕީޑް އާރްޓީއެލް ފެރީތަކާ ގުޅާލުން.
- ރިސޯޓްތަކުގެ އިސް މަގާމުތައް މަދުވެގެން 50 ފަސެންޓު ދިވެހިންނަށް ހަމަޖެއްސުން.
- ރިސޯޓުތަކުގެ މުއަައްޒަފުންނަށް ހާއްސަ ތައުލީމީ ޕްރޮގްރާމުތައް ހިންގުން.
- ބައިނައްލަގުވާމީ މަޝްހޫރު ހޮސްޕިޓާލިޓީ ސްކޫލް ކެމްޕަސްއެއް ގާއިމްކުރުން.
- ފަތުރުވެރިކަމުގެ ދާއިރާއަށް ހާއްސަ 500 ލީޑާޝިޕް ސްކޮލާޝިޕް ފުރުސަތު ހޯދައިދިނުން.
މީގެ އިތުރުން ރައީސް ސޯލިހުގެ ސަރުކާރުން ކޮށްދީފައިވާ ކަންކަން އެ ޖަމިއްޔާއިން ބަލައިގަންނަ ކަމަށް ޓީމްއިން ބުނެ އެވެ.
"ކުރިއަށް މިއޮތް ދައުރުގައި ޓޫރިޒަމް ދާއިރާގެ މަސައްކަތްތެރިންނަށް ހާއްސަކޮށް މުހިއްމު ސިޔާސަތުތަކެއް އެކުލަވާލައިފައިވާތީ ކުރިއަށް މިއޮތް ރިޔާސީ އިންތިހާޞުގައި ރައީސް ސޯލިހަށް ތާއީދުކުރުމަށް ނިންމާފައިވާކަމުގައި ދަންނަވަމެވެ." ޓީމްގެ ބަޔާނުގައި ބުނެފައިވެ އެވެ.
ސެޕްޓެމްބަރު 9، ގައި އޮންނަ ރިޔާސީ އިންތިހާބުގެ ކެމްޕެއިން ތެރޭގައި އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓް އަދި މާލެ ސިޓީގެ މޭޔަރު ޑރ. މުހައްމަދު މުއިއްޒު ވަނީ މިހާރު ފަތުރުވެރިކަމުގެ ނުމޫސުން ޖޫން ޖުލައި މަހު އޮންނަ ބޮޑު ޗުއްޓީ އަލުން ޑިސެމްބަރަށް ބަދަލުކުރައްވާނެ ކަމަށް ވިދާޅުވެފަ އެވެ. ޓީމްއިން ވަނީ މިކަމާއި ދެކޮޅަށް އަޑު އުފުލައި ނުރުހުން ފާޅުކޮށްފަ އެވެ.
