ރައްޔިތުންގެ މަޖިލީހުގެ މި އަހަރުގެ ފަހު ދައުރުގެ އެންމެ ފުރަތަމަ ޖަލްސާ އަންނަ ހަފުތާގެ ހޯމަ ދުވަހަށް ތާވަލުކޮށްފި އެވެ.
މަޖިލީހުގެ ދެވަނަ ދައުރު ނިމުނީ މެމްބަރުން ތަމްސީލުކުރާ ޕާޓީތަކަށް އައި ބަދަލާއެކީ ދާއިމީ ކޮމިޓީތައް އެކުލަވާނުލެވިގެން، މުހިންމު މަސައްކަތްތަކެއް ނުނިމި ވަނިކޮށެވެ.
އޭގެ ތެރޭގައި އެމްޑީޕީން އިސްވެ ހުށަހަޅާފައިވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ނައިބު ރައީސް އީވާ އަބްދުﷲ ވަކިކުރުމުގެ މައްސަލަ އާއި 'ކަނޑުވިއްކުމާ ދެކޮޅު' އިއްތިހާދުން ހުށަހަޅާފައިވާ ބަންޑާރަ ނައިބު އިބްރާހިމް ރިއްފަތާއި ހާރިޖީ ވަޒީރު އަބްދުﷲ ޝާހިދުގެ އިތުބާރު ނެތްކަމުގެ މައްސަލަ ހިމެނެ އެވެ.
ކޮމިޓީތަކުގެ މައްސަލަ ހައްލުކުރަން އެމްޑީޕީން ހުށަހަޅައިގެން މަޖިލިސް ޗުއްޓީގައި އޮއްވާ ދައުރުން ބޭރުން ޖަލްސާއެއް ވެސް ބޭއްވި އެވެ. އެއީ ނިމުނު މަހުގެ 10 ގަ އެވެ. އެ ޖަލްސާގައި އެމްޑީޕީން ބޭނުންވި ގޮތަށް ކޮމިޓީތައް އެކުލަވާލާން ފާސްކުރި އެވެ.
އެހެނަސް، އެމްޑީޕީން ވަކިވީ މެމްބަރުން އުފެއްދި 'ދަ ޑިމޮކްރެޓްސް' ރަޖިސްޓްރީ ކުރުމާ ގުޅިގެން އެ ދުވަހުގެ ޖަލްސާގައި ފާސްކުރި ކޮމިޓީ ރިޕޯޓުގެ ބޭނުން ކެނޑިއްޖެ އެވެ. އެފަހުން މަޖިލީހުގެ ޖަލްސާއެއް ބާއްވަން މަސައްކަތެއް ނުކުރެ އެވެ.
