ރައްޔިތުންގެ ފެންނަ ނުފެންނަ ވޯޓަކުން ގައުމީ ތަރައްގީގެ ދިގު ރާސްތާގެ ޕްލޭނެއް ހަދައި، ރާއްޖެއަށް ގިނަ ބަދަލުތަކެއް ގެނައުމުގެ ވައުދުތަކެއް ހިމެނޭ ގޮތަށް އަމިއްލަ ގޮތުން ރިޔާސީ އިންތިހާބުގައި ވާދަކުރައްވާ ކެންޑިޑޭޓު އަހުމަދު ފާރިސް މައުމޫން އޭނާގެ މެނިފެސްޓޯ ރޭ ލޯންޗުކޮށްފި އެވެ.
ކެންޑިޑޭޓު ނަމްބަރު ހައެއް، ފާރިސް އާއި އޭނާގެ ރަނިން މޭޓު ޑރ. އަބްދުލްސައްތާރު ޔޫސުފްގެ މެނިފެސްޓޯގައި 15 ދާއިރާއަކުން އެތައް ވައުދެއް ހުށަހަޅާފައިވެ އެވެ. އެ ވައުދުތަކުގެ އަމާޒަކީ ދެމެހެއްޓެނިވި ގައުމެއް ބިނާކުރުން ކަމުގައި ފާހަގަކޮށްފައިވެ އެވެ.
ފާރިސްގެ މެނިފެސްޓޯގައި ހިމެނޭ މައިގަނޑު އެއް ވައުދަކީ ދިގު ރާސްތާގެ ގައުމީ ތަރައްގީގެ ޕްލޭނެއް އެކުލަވާލުމެވެ. އަދި އެ ޕްލޭނަށް ރައްޔިތުންގެ ފެންނަ ނުފެންނަ ވޯޓެއް ނަގައިގެން ފާސްކުރާ ގޮތަށް ހަމަޖައްސާނެ ކަމަށް އޭގައިވެ އެވެ.
ރައްޔިތުންގެ ރެފެރެންޑަމްއަކުން ދިގު ރާސްތާގެ ގައުމީ ތަރައްގީގެ ޕްލޭން ފާސްވުމުން، ސިޔާސީ ޕާޓީތަކުގެ މެނިފެސްޓޯއާއި، އިންތިހާބުވާ ސަރުކާރުތަކުން އެކުލަވާލާ ސިޔާސަތުތަކާއި، ކުރިއަށް ގެންދާ ތަރައްގީގެ މަޝްރޫއުތައް ހަމަޖައްސަން ޖެހޭނީ އާ ޕްލޭނަށް ފުށުނާރާ ގޮތަށް ކަމަށް މެނިފެސްޓޯގައި ބުނެ އެވެ.
ފާހަގަކޮށްލެވޭ ބައެއް ވައުދުތައް
ދީން
- ފަތުވާ މަޖިލިސް ބާރުވެރިކުރުން
- ސްޕާ ނަމުގައި ހިންގާ ނުރަނގަޅު ތަންތަން ބަންދުކުރުން
- ބަރަހަނާ ވެބްސައިޓްތައް ބްލޮކްކުރުން
ހެޔޮވެރިކަން
- ދިގު ރާސްތާގެ ޕްލޭން، ރައްޔިތުންގެ ރެފެރެންޑަމަކުން ނިންމުން
- ގާބިލް ފަންނީ މީހުންގެ ކެބިނެޓެއް
- މަޖިލީހުގެ މެންބަރުންގެ އިތުބާރު ނެތް ކަމުގެ ވޯޓު
- މަޖިލީހުގެ މެންބަރުންގެ ޝަރުތުތަކެއް ކަނޑައެޅުން
- ރާއްޖޭގެ އާބާދީއާ ފެތޭ ވަރުގެ މަޖިލީހެއް
ދިރިއުޅުމުގެ ޚަރަދާއި ޓެކްސް
- ފެން، ކަރަންޓު، ކާޑުގެ ބާވަތްތަކުގެ އަގު ހެޔޮ ކުރުން
- އެފޯޑަބަލް ހައުސިންގެ އަދަދު އިތުރު ކުރުން
- ޖީއެސްޓީ 3 ޕަސެންޓަށް ތިރިކުރުން
- އެތެރެކުރާ ބާވަތްތަކުން ޑިއުޓީ ކަނޑާލުން
ކުށްކުރާ މީހުން އިސްލާހުކުރުން
- އިސްލާހުވުމުގެ ޕްރޮގްރާމްތައް ހިންގަން ހާފްވޭ ހައުސްތަކެއް
- އަންހެނުންނަށް ޚާއްސަ ރެހިބިލިޓޭޝަން ޕްރޮގްރާމްތަކެއް
- ނަން-ކަސްޓޯޑިއަލް ފިޔަވަޅުތައް ހަރުދަނާކުރުން
- ޖަލަކީ އެންމެ ފަހު ފިޔަވަޅުގެ ގޮތުގައި ހަމަޖެއްސުން
ތައުލީމީ ދާއިރާ
- ވާޗުއަލް ނެޝަނަލް ލައިބްރަރީއެއް ހުރިހާ ދަރިވަރުންނަށް
- ތައުލީމުގެ ގައުމީ މަންހަޖު މުރާޖައާކޮށް ޒަމާނީކުރުން
- މެންޓަލް ހެލްތު ކެއާގެ ހިދުމަތް ހުރިހާ ދަރިވަރުންނަށް
- ޑްރަގްގެ ނުރައްކާތެރިކަން ބުނެދޭން ހާއްސަ ކްލާސްތަކެއް
ފާރިސްއަކީ، 30 އަހަރުގެ ދިގު މުއްދަތަކަށް ވެރިކަން ކުރެއްވި ކުރީގެ ރައީސް މައުމޫން އަބްދުލްގައްޔޫމުގެ ދަރިކަލުންނެވެ. މައުމޫންގެ ކޮއްކޮ އަދި ކުރީގެ ރައީސް އަބްދުﷲ ޔާމީންގެ ވެރިކަމުގައި، ޔާމީނާއި މައުމޫނާ ދެމެދު އުފެދުނު ހިޔާލުތަފާތުވުންތަކަށް ފަހު، މައުމޫންގެ ދެބަފައިން ޕީޕީއެމުން ވަކިކުރި އެވެ.
ޕީޕީއެމްގެ މައްސަލަ ކޯޓުން ނާކާމިޔާބުވި ފަހުން މޯލްޑިވްސް ރިފޯމް މޫވްމަންޓް (އެމްއާރުއެމް) ގެ ނަމުގައި ޕާޓީއެއް އުފައްދަވައިގެން މިދިޔަ ފަސް އަހަރު ހިންގެވި އެވެ.
ނަމަވެސް މިދިޔަ ފަސް އަހަރު އެއްވެސް ހަރަކާތެއް ނެތި އޮއްވައި، ޕާޓީ އުވާލުމަށް އީސީން މި އަހަރު ނިންމި އެވެ. އެމްއާރުއެމް އުވާލަން ނިންމީ ޕާޓީއެއްގައި ތިބުމަށް ގާނޫނުން ލާޒިމުކުރާ އެންމެ ދަށް އަދަދު، 3،000 މެންބަރުން އެ ޕާޓީގައި ހަމަނުވާ ކަމަށް އީސީން ނިންމުމުންނެވެ. އެ މައްސަލަ މިހާރު އޮތީ ޝަރީއަތުގަ އެވެ.
ފާރިސް ވަނީ އަށާރަވަނަ ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު ކަން ވެސް ކުރައްވައިފަ އެވެ. ނަވާރަވަނަ ރައްޔިތުންގެ މަޖިލީހުގެ އިންތިހާބަށް މައްޗަންގޯޅި އުތުރު ދާއިރާއަށް ވާދަކުރެއްވި ނަމަވެސް އެ އިންތިހާބުން ފާރިސް ނާކާމިޔާބުވި އެވެ.
