ސަރުކާރުގެ ބޯހިޔާވަހިކަމުގެ ޕްރޮގްރާމުގެ ދަށުން ވެރި ރަށް މާލެ ސަރަހައްދުން ގޯތި ލިބުނު މީހުން ދާއިމީ ލިސްޓު ރޭ ގެސެޓުކޮށްފި އެވެ.
ހައުސިން މިނިސްޓްރީން ރޭ އާންމުކޮށްފައި ލިސްޓުގައިވާ ގޮތުން މިހާރު ޖުމްލަ 18،000 އަށް ވުރެ މައްޗަށެވެ. މުޅި ޖުމްލަ 9001 ގޯތި، ހުޅުމާލެ، ގުޅީފަޅު އަދި ގިރާވަރުފަޅުން ދޭނެ ކަމަށް ސަރުކާރުން ބުނެ އެވެ.
ގޯއްޗަށް އެދި ހުށަހެޅި މީހުންގެ ތެރެއިން މިބުރުގައި ގޯތި ނުލިބެނީ 684 މީހުންނަށެވެ. އެއީ އެކަނި ފޯމު ހުށަހަޅާފައިވާ ތިބި، ކައިވެންޏެއްކޮށްގެން ނުއުޅޭ އަދި ދަރިން ވެސް ނެތް މީހުންނެވެ. ގޯތި ނުލިބޭ އެންމެނަކީ ވެސް 25 އަހަރުން ދަށުގެ މީހުން ކަމަށް ސަރުކާރުން ބުނެ އެވެ.
ރޭ ބޭއްވި ނޫސްވެރިންގެ ބައްދަލުވުމެއްގައި ގެދޮރުވެރިޔާ ކޮމިޓީގެ ޗެއާމަން އަކްރަމް ކަމާލުއްދީން ވިދާޅުވީ ފުރަތަމަ ބުރުގައި ގޯތި ލިބޭ މީހުންގެ މެދުގައި ގުރު ނެގުން މާދަމާ ގަލޮޅު ދަނޑުގައި ކުރިއަށް ގެންދާނެ ކަމަށެވެ.
ގޯތި ދޫކުރަން ފެށި ނަމަވެސް ރިޔާސީ އިންތިހާބުގެ ކުރިން ދޫކުރެވޭނީ ކިތައް ގޯތި ކަމެއް އަކްރަމް ވިދާޅެއް ނުވެ އެވެ. ނަމަވެސް ޝަރުތު ހަމަވާ ހުރިހާ ފަރާތްތަކަށް ނޮވެމްބަރު 11، ގެ ކުރިން ގޯތީގެ ރަޖިސްޓްރީ ހަވާލު ކުރާނެ ކަމަށް ވެސް އަކްރަމް ވިދާޅުވި އެވެ.
ބިންވެރިޔާ ސްކީމުގެ ގޯތީގެ ބޮޑުމިނާއި ދޫކުރާ ތަންތަން:
- 1250 އަކަފޫޓު - 3551 ގޯތި (ހުޅުމާލެ 250, ގުޅީފަޅު 260, ގިރާވަރު 3041)
- 1650 އަކަފޫޓޫ - 2802 ގޯތި (ހުޅުމާލެ 340, ގުޅީފަޅު 558, ގިރާވަރުފަޅު 1904)
- 2050 އަކަފޫޓު - 1547 ގޯތި (ހުޅުމާލެ 370, ގުޅީފަޅު 690, ގިރާވަރުފަޅު 487)
- 2450 އަކަފޫޓު - 656 ގޯތި (ހުޅުމާލެ 180, ގުޅީފަޅު 476)
- 2850 އަކަފޫޓު - 254 ގޯތި (ހުޅުމާލެ 100, ގުޅީފަޅު 154)
- 3250 އަކަފޫޓު - 109 ގޯތި (ހުޅުމާލެ 60, ގުޅީފަޅު 49)
- 3650 އަކަފޫޓު - 53 ގޯތި (ހުޅުމާލެ 31, ގުޅީފަޅު 22)
- 4000 އަކަފޫޓު - 29 ގޯތި (ހުޅުމާލެ 20, ގުޅީފަޅު 9)
އޭގެ ތެރެއިން، 1250 އަކަފޫޓުގެ 3551 ގޯއްޗަކީ, ސިންގަލް އެޕްލިކަންޓުންގެ ގޮތުގައި ހުށަހަޅައިގެން ގޯތި ލިބުނު މީހުންނެވެ. އަދި 1650 އަކަފޫޓުގެ 2802 ގޯއްޗަކީ, ދެ މީހަކު އެކުވެގެން އެޕްލިކޭޝަން ހުށަހެޅި މީހުންނެވެ. ގޯތީގެ ބޮޑުމިން ބަލާފައި ވަނީ އެޕްލިކޭޝަނަށް ޖޮއިންޓުވާ ކޮންމެ މީހަކަށް 400 އަކަފޫޓު އިތުރުުވާ ގޮތަށެވެ. ހަތަރުހާސް އަކަފޫޓުގެ 29 ގޯތި ލިބެނީ މަދުވެގެން އަށް މީހުން އެކުވެގެން އެޕްލިކޭޝަން ހުށަހެޅުމުންނެވެ.
