ރާއްޖޭގެ އެހެން ސަރަހައްދުތަކާއި ދަތުރުފަތުރުގެ ވިއުގަޔަކުން ގުޅިފައިވާ އިގުތިސޯދީ ހަރަކާތްތައް ގިނަ ހަބެއްގެ ގޮތުގައި އައްޑޫ ސިޓީ ތަރައްގީ ކުރައްވާނެ ކަމަށް ޑިމޮކްރެޓްސްގެ ރިޔާސީ ކެންޑިޑޭޓު އިލްޔާސް ލަބީބު ވައުދުވެވަޑައިގެންފި އެވެ.
އައްޑޫ ހިތަދޫގައި މިރޭ ބޭއްވި ޖަލްސާގައި، ރައްޔިތުންގެ މަޖިލީހުގެ އައްޑޫ ހުޅުދޫ ދާއިރާގެ މެންބަރުކަން ވެސް ކުރައްވާ އިލްޔާސް ލަބީބުގެ މުޅި ވާހަކަ ހާއްސަ ކުރެއްވީ އައްޑޫ ސިޓީ އާއި ދައުލަތުގެ ދަރަންޏަށެވެ. އޭނާ ވިދާޅުވީ އައްޑޫ ތަރައްގީ ކުރުމަކީ އައްޑޫ މީހުނަށް އާމްދަނީ ލިބޭނެ އިގުތިސޯދީ ހަރަކާތްތަކެއް ހިންގުން ކަމަށެވެ.
"ޓުއަރިޒަމް ޒޯންގެ ގޮތުގައި ފަސްގަނޑުތަކެއް ހަދާފައި، އެއީ ދެން ތަރައްގީއޯ، ދެން ފަސްގަނޑު މައްޗަށްތޯ ޓުއަރިސްޓުން އަންނަންވީ،" ރައީސް އިބްރާހިމް މުހައްމަދު ސޯލިހުގެ ސަރުކާރުގެ ފަސް އަހަރު ނިމެން އަންނަ އިރު ހަމައެކަނި ބިން ހިއްކުމުގެ މަސައްކަތް ކުރެވިފައިވާތީ އިލްޔާސް ވަރަށް ބޮޑަށް ފާޑުވިދާޅުވި އެވެ.
އައްޑޫ ސިޓީ ތަރައްގީ ކުރުމަށް މި ސަރުކާރުން ފަށާފައިވާ ޕްރޮޖެކްޓް ނިންމަން ފަސް އަހަރު ހޭދަވިއިރު ބައެއް ޕްރޮޖެކްޓްތަކުގެ އަމަލީ މަސައްކަތް އަދި ފެށިފައެއް ވެސް ނުވެ އެވެ.
އިލްޔާސް މިރޭ ވިދާޅުވީ އެ ހުރިހާ ޕްރޮޖެކްޓެއް ޑެމޮކްރެޓުންގެ ސަރުކާރެއްގައި ދެ އަހަރު ތެރޭގައި ނިންމާލާނެ ކަމަށެވެ. އޭގެ ތެރޭގައި އައްޑޫ ގަން އިންޓަނޭޝަނަލް އެއާޕޯޓް ތަރައްގީ ކުރުމާއި، ހިތަދޫ ވިޔަފާރި ބަނދަރު ތަރައްގީ ކުރުމުގެ ޕްރޮޖެކްޓް ފާހަގަ ކުރެއްވި އެވެ.
"އެއާޕޯޓްގެ މަސައްކަތް ވެސް ފުރަތަމަ ދެ އަހަރުގެ ތެރޭގައި ނިންމާނަން، ވިޔަފާރި ބަނދަރާއި އެއާޕޯޓް ނިންމުމުން މި ތަނަށް ބޭނުންވާ ވަޒީފާއާއި އިގުތިސޯދީ ހަރަކާތްތައް ހަމަޖެހި، ފުޅާ ވެގެން ދާނެ،" އިލްޔާސް ވިދާޅުވި އެވެ.
އައްޑޫގައި އިގުތިސޯދީ ހަރަކާތްތައް ހިންގުމަށް، ޑިމޮކްރެޓްސްއިން ތައާރަފުކޮށްފައިވާ ފަސޭހަ ވިޔަފާރި ސިޔާސަތު މެދުވެރިކޮށް އައްޑޫގެ ޒުވާނުންނަށް ޓުއަރިޒަމް ވިޔަފާރި އުފައްދަން ޖާގަ ދެވޭނެ ކަމަށް އިލްޔާސް ވިދާޅުވި އެވެ.
"އައްޑޫގައި ޓުއަރިޒަމް ވިޔަފާރި ކުރަން ބޭނުންވާ މީހުނަށް، ފަސޭހައިން ފައިސާ ލިބޭނެ، ކަމަށް. ބިޒްނަސް ޕްލޭން ހުށަހެޅުމުން އޭގައި މައްސަލައެއް ނެތް ނަމަ 15 ދުވަހުގެ ތެރޭގައި އެ ފައިސާ ހަމަޖައްސައިދޭނެ، އެއްވެސް ރަހުނެއް ބޭނުމެއް ނުވާނެ،" އިލްޔާސް ވިދާޅުވި އެވެ.
އަޅުގަނޑުމެން މި ދެނީ އެ ތަންތަން ތަރައްގީ ކުރުމަށް [ކޮންމެ ފަންތިއެއްގެ ވިޔަފާރިވެރިންނަށް] ފައިސާ، އެއީ ވަޒީފާއެއްގައި ހުރި މީހަކުތޯ ނުވަތަ ނޫންތޯ ނުބަލާނެ، މިހާރު ވިޔަފާރިއެއް ކުރޭތޯ ނުވަތަ ނުކުރޭތޯ ވެސް ނުބަލާނެ،" އިލްޔާސް އިތުރަށް ތަފުސީލް ކޮށްދެއްވި އެވެ.
އޭގެ އިތުރުން އައްޑޫގައި ފަށާ ޓުއަރިޒަމް ވިޔަފާރިއަކުން ފުރަތަމަ ތިން އަހަރު ޓީޖީއެސްޓީ ނުނެގުމަށް ވެސް އިލްޔާސް ވައުދުވެވަޑައިގެންނެވި އެވެ. ފުރަތަމަ ތިން އަހަރަށް ފަހު ވެސް، އަދި އިތުރު ހަތް އަހަރު ދުވަހު އޮންނާނީ ޓީޖީއެސްޓީގެ ދެބައިކުޅަ އެއްބައި އުނިކޮށްފައި ޓެކްސް ނަގާ ގޮތަށް ކަމަށެވެ.
"އައްޑޫ ސިޓީގެ ތަރައްގީއަށް ވަރަށް ގިނަ ކަންކަން ކުރަން އެބަ ޖެހޭ، މި ސިޓީން ކަނެކްޓިވީއެއް އުފައްދަން އެބަ ޖެހޭ މި ސަރަހައްދަށް، މުޅި ރާއްޖެއަށް، އެއީ ކަނޑު މަގުންނާއި މުދާ އުފުލުމާއި، އެއާ ކަނެކްޓިވިޓީ ވެސް ހިމެނޭ ގޮތަށް އޭގެ ލިންކުތަކެއް ގާއިމުކުރަން ޖެހޭ،" އިލްޔާސް ވިދާޅުވި އެވެ.
އިލްޔާސްގެ ވާހަކަ ނިންމަވައިލައްވަމުން އޭނާ ފާހަގަ ކުރެއްވި ކަމަކީ އޭނާއާ ވާދައަށް ރިޔާސީ އިންތިހާބުގައި ދެން ނުކުމެ ހުންނެވި ލީޑަރުންނަކީ އޭނާ އުފަންވިއިރު ވެސް ސިޔާސީ މަސައްކަތުގައި ތިއްބެވި ބޭފުޅުން ކަމަށެވެ. ސިޔާސީ މަސައްކަތް އާ ޖީލަށް މިހާރު ހަވާލުކުރަން ޖެހިފައިވާ ކަމަށް އޭނާ ވިދާޅުވި އެވެ.
