ކޮންޓްރޯލާ އޮފް އިމިގްރޭޝަން މުހައްމަދު އަހްމަދު (ހަނަފީ) ވެރިކަން ކުރާ ކޯލިޝަނުގެ މައި ޕާޓީ އެމްޑީޕީއަށް ސޮއިކޮށްފި އެވެ.
ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ އެޑުވައިޒަރުކަމުގެ މަގާމަށް އައްޔަންކުރިތާ އެއްދުވަސް ފަހުން އެޕާޓީން ވަކިވެވަޑައިގަތް ހަނަފީ އެމްޑީޕީއާ ގުޅިވަޑައިގެންނެވި ކަން އެމްޑީޕީން ހާމަކުރީ އެޕާޓީން މިއަދު ކުރި ޓްވީޓެއްްގައެވެ. އެ ޓްވީޓްގައި ބުނީ ހަނަފީ އެޕާޓީއަށް ގުޅިވަޑައިގަތީ އިތުރު 60 މެންބަރެއްގެ ސޮޔާ އެކު ކަމަށެވެ. އެނގިފައިވާ ގޮތުގައި އެއީ ހަނަފީގެ އާއިލާގެ ބޭފުޅުންނެވެ.
ރައީސް އިބްރާހިމް މުހައްމަދު ސޯލިހުގެ ސަރުކާރުގެ އިމިގްރޭޝަން ކޮންޓްރޯލަރުގެ މަގާމުގައި ހުންނެވީ ވެސް ހަނަފީ އެވެ. ސްޓޭޓް މިނިސްޓަރުގެ ފެންވަރުގައި އޭނާ އެ މަގާމަށް އައްޔަނުކުރީ ޑިސެމްބަރު 23، 2018 ގަ އެވެ.
އެންމެފަހުން ބޭއްވި ޖޭޕީގެ ކޮންގްރެސްގައި ވެސް އެ ޕާޓީގެ ޑެޕިއުޓީ ލީޑަރުގެ މަގާމަށް ވެސް ހަނަފީ ވާދަކުރެއްވި އެވެ. އެކަމަކު، އެ މަގާމަށް އޭނާ އިންތިހާބުވެފައި ނުވެ އެވެ.
ހަނަފީ ޖޭޕީން ވަކިވި ދަނޑިވަޅަކީ އެމްޑީޕީ އާއި ޖޭޕީއާ ދެމެދު ނުތަނަވަސްކަން އުފެދިފައިވާ ދަނޑިވަޅެކެވެ. ސެޕްޓެމްބަރުގައި އޮންނަ ރިޔާސީ އިންތިހާބަށް އެމްޑީޕީގެ ޓިކެޓު ރައީސް ސޯލިހަށް ލިބިވަޑައިގެންފައިވާއިރު މިހާރު ވެރިކަން ކުރަމުންދާ ކޯލިޝަނުގައި އޮތް ޖޭޕީން ވަނީ އިންތިހާބުގައި ވަކިން ވާދަކުރަން ނިންމާފަ އެވެ.
ޖޭޕީއިން ކުރިއަށް އޮތް އިންތިހާބުގެ ފުރަތަމަ ބުރުގައި ރައީސް ކޯލިޝަނުގައި ބައިވެރި ނުވި ނަމަވެސް ސަރުކާރުގެ އެއްވެސް ސިޔާސީ މަގާމަކުން އެޕާޓީގެ ބޭފުޅަކު ވަކިކޮށްފައެއް ނުވެ އެވެ.
