މާލޭގައި މަރުވާ މީހުންގެ ކަށުކަމާކެމީގެ ކަންކަން ކުރަމުން އަންނަ އާސަހަރާގެ މަރާމާތުގެ މަސައްކަތް ނިންމުމަށް އަދި އިތުރު އެއް މަސްދުވަސް ނަގާނެ ކަމަށް މާލެ ސިޓީ ކައުންސިލުން ބުނެފި އެވެ.
އާސަހަރާ ހިންގަމުންދާ މާލެ ސިޓީ ކައުންސިލުން މަރާމާތުގެ މަސައްކަތަކަށް ބަންދުކުރީ މިދިޔަ މޭ މަހު އެވެ. އޭރު ސިޓީ ކައުންސިލުން ބުނީ މަރާމާތުގެ މަސައްކަތަށް ދެމަސްދުވަސް ނަގާނެ ކަމަށެވެ.
އެ މަސައްކަތް ނުނިމި ދިގުލައިގެން ދާތީ މިއަދު "އަދަދު" އިން ގުޅުމުން މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވިދާޅުވީ، މޫސުންފަދަ ކަންކަމާހުރެ މަސައްކަތުގައި ކުދި ލަސްތަކެއް ހުރި ނަމަވެސް ނުހުއްޓި ކުރިއަށްދާ ކަމަށެވެ. ނަމަވެސް ސަހަރާގެ ބައެއް ތަންތަން މަރާމާތު ކުރުމުގައި ކުރިން ހީކުރެވުނު ވަަރަށްވުރެ ގިނަ ދުވަސް ހޭދަވިކަން މޭޔަރުވެސް ގަބޫލުކުރައްވަ އެވެ.
"އަޅުގަނޑަށް ހީވަނީ އިތުރު 30-45 ދުވަހުގެ ތެރޭގައި އެ މަސައްކަތް ނިންމާލެވޭނެހެން" މުއިއްޒު ވިދާޅުވި އެވެ.
އާސަހަރާ ބަންދުކޮށްފައިވާއިރު މާލެ ސަރަހައްދުގައި މިހާރު ކަށުކަމާކެމީގެ ކަންކަން ކުރިއަށް ގެންދިއުމަށް ހަމަޖެހިފައިވަނީ ހުޅުމާލެ ސަހަރާގަ އެވެ.
ސިޓީ ކައުންސިލުން އިތުރަށް ބުނީ މަރާމާތުގެ މަސައްކަތްތައް ކުރިއަށްދާ ދުވަސްތަކުގައި ވެސް އާ ސަހަރާ މިސްކިތުގައި ނަމާދު ކުރާނެ ކަމަށެވެ. އެގޮތުން މަސައްކަތްތައް ކުރިއަށް ގެންދާނީ ކޮންމެ ދެ ނަމާދު ދޭތެރޭގައި ކަމަށް ވެސް ކައުންސިލުން ބުނެ އެވެ.
އާސަހަރާއަށް ބަދަލުތަކެއް ނައިސް ގިނަ އަހަރުތަކެއް ވެފައިވާއިރު މިފަހަރު ގެންނަ ބަދަލުތަކުގެ ތެރޭގައި އަންހެނުންނާއި ފިރިހެނުން ނަމާދުކުރުމަށް ކަނޑައެޅިފައިވާ ޖާގަ އިތުރުކުރުމާއި އަންހެންނުނަށް ހާއްސަކޮށް ވުލޫ ކުރާނެ އިންތިޒާމު ހަމަޖެއްސުމާއި އަދި ސަހަރާގައި މަޑުކޮށްލައިގެން ތިބެވޭނެ ވެއިޓިން އޭރިއާއެއް ސަހަރާއަށް އިތުރުކުރުން ހިމެނެ އެވެ.
