ދަ ޑިމޮކްރެޓްސްގެ ރިޔާސީ ޕްރައިމަރީ އޮންނަ ދުވަހު އެ ޕާޓީއަށް ސޮއިކުރުމަށް ފަހު، ޕްރައިމަރީގައި ވޯޓު ލުމުގެ ހައްގު ލިބޭނެ ކަމަށް އެ ޕާޓީގެ އިންތިގާލީ ޗެއާޕާސަން އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފު ވިދާޅުވެއްޖެ އެވެ.
ވެރިކަންކުރާ އެމްޑީޕީގެ ރިޔާސީ ޕްރައިމަރީން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނާކާމިޔާބުވި ފަހުން، އެމަނިކުފާނާ އެކު އެ ޕާޓީން ވަކިވި މީހުން ވެގެން އުފައްދާފައިވާ ޕާޓީގެ ރިޔާސީ ޕްރައިމަރީއަށް ކުރިމަތިލެއްވީ ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބް އެކަންޏެވެ.
ޑިމޮކްރެޓްސްގެ އަސާސީ ގަވާއިދުގައި ބުނާ ގޮތުން ޕްރައިމަރީގައި ވާދަކުރަން އެއް ކެނޑިޑޭޓަށް ވުރެ އިތުރަށް ކުރިމަތިނުލައިފި ނަމަ އެމީހަކު ހޮވާނީ ޕާޓީގެ އާންމު މެންބަރުންގެ މެދުގައި ނަގާ ފެންނަ ނުފެންނަ ވޯޓަކުންނެވެ.
އެ ޕްރައިމަރީއާ ގުޅޭ ގޮތުން މައުލޫމާތު ދިނުމަށް މިއަދު ހަވީރު ބޭއްވި ޕްރެސް ކޮންފެރެންސްގައި ވާހަކަ ދައްކަވަމުން ހަސަން ލަތީފު ވިދާޅުވީ ޕާޓީގެ 20 މެންބަރުން ހަމަވާ ކޮންމެ ރަށެއްގައި ވޯޓު ފޮށި ބަހައްޓާނެ ކަމަށެވެ. އަދި އޮންލައިންކޮށް ވޯޓުލާން ބޭނުންވާ ފަރާތްތަކަށް އެ އިންތިޒާމު ވެސް ހަމަޖައްސާނެ ކަމަށެވެ.
"މީގައި ޑަބަލް ވޯޓިންއެއް މިއަކު ނުހިނގާނެ، އެ ކަން ޔަގީން ކުރެވޭ ވަރަށް އަޅުގަނޑުމެން [އޮންލައިން ވޯޓިން] އިންތިޒާމު ހަމަޖައްސާނީ،" ހަސަން ލަތީފު ވިދާޅުވި އެވެ.
ޑިމޮކްރެޓްސްގެ ދަފްތަރުގައި 4،100 މެންބަރުން ހިމެނެ އެވެ. ހަސަން ލަތީފު ވިދާޅުވީ އެ މެންބަރުންގެ އިތުރަށް ޕްރައިމަރީ އޮންނަ ދުވަހާ ހަމައަށް ސޮއިކުރާ މެންބަރުންނާއި، އެ ދުވަހު ވެސް ޕާޓީއަށް ސޮއިކޮށްފައި ވެސް ވޯޓު ލުމުގެ ހައްގު ލިބޭނެ ކަމަށެވެ.
"ވޯޓުލާ ދުވަހު ވޯޓުލަމުން ދަނިކޮށް ވެސް ޕާޓީގެ މެންބާޝިޕަށް ވަންނަން ބޭނުންވާ މީހުނަށް އެ ފުރުސަތު ދެވޭނެ، އަދި އެ ކަމަށް ކެމްޕޭން ވެސް ކުރެވޭނެ، ވޯޓުލާ ދަމުންދާއިރު ވެސް ޕާޓީގެ މެންބަރުންނަށް ވުމަށް ފަހު ވޯޓު ލެވޭނެ އިންތިޒާމު ވެސް،" ހަސަން ލަތީފު ވިދާޅުވި އެވެ.
އޭނާ ވިދާޅުވީ ޑިމޮކްރެޓްސްގެ ޕްރައިމަރީއަކީ ވާދަވެރި ޕްރައިމަރީއަކަށް ނުވާތީ އޭގައި މައްސަލައެއް ނުފެންނަ ކަމަށް ޕާޓީގެ އިންތިގާލީ ކައުންސިލުން ނިންމާފައިވާ ކަމަށެވެ. އަދި ޕާޓީގެ މެންބަރުންގެ ފަރާތުން ވެސް ފެންނަނީ ނުކުމެ ހުރި ކެންޑިޑޭޓާއެކު ކުރިއަށް ދިޔުން ކަމަށް ވިދާޅުވި އެވެ.
އާ ސިޔާސީ ޕާޓީ އުފެއްދުމަށް ފަހު ރިޔާސީ އިންތިހާބުގައި ރައީސް މުހައްމަދު ނަޝީދު ވާދަކުރައްވާނެ ކަމަށް ވެސް ބެލެވުނެވެ. ނަމަވެސް ނަޝީދު ވަނީ އެ ކަމަށް އެމަނިކުފާނުގެ ޝައުގެއް ނެތް ކަމަށް ވިދާޅުވެފަ އެވެ. އަދި ރޭ ބޭއްވި ޖަލްސާގައި އެމަނިކުފާނު ވިދާޅުވީ ޒުވާން ލީޑާޝިޕަކަށް ދޫކޮށްލައްވަން ބޭނުންވާ ކަމަށެވެ.
