ސިންގަޕޫރުގެ ހައިކޯޓުގައި ސަން ޓްރެވަލްއާ ދެކޮޅަށް ހިލްޓަން އިންޓަނޭޝަނަލްއިން އުފުލާފައިވާ ދައުވާގެ އަޑުއެހުންތަކަށް ހާޒިރުވުމަށް ސަން ކުންފުނީގެ ވެރިޔާ އަދި އެމްޑީއޭގެ ލީޑަރު އަހްމަދު ސިޔާމް މުހައްމަދު އެ ގައުމަށް ވަޑައިގަތުމުން އޭނާ ހިފަހައްޓާފައިވާ ކަމަށް ބުނެ ދޮގު ހަބަރު ފެތުރުމުގު ތުހުމަތު އަލަށް އުފެއްދި ދަ ޑިމޮކްރެޓްސްއަށް އޭނާ ކުރައްވައިފި އެވެ.
ނ. އަތޮޅު އިރުފުށި ރިސޯޓް ހިންގަން 2009 ގައި ސަން ޓްރެވަލް އާއި ހިލްޓަން އިންޓަނޭޝަނަލްއާ ދެމެދު ހެދި އެއްބަސްވުން 2013 ގައި ސަން ޓްރެވަލްއިން އުވާލުމާ ގުޅިގެން ސިންގަޕޫރުގެ އާބިޓްރޭޝަނަށް ހިލްޓަނުން ހުށަހެޅި އެވެ. އަދި, މައްސަލާގައި ބަދަލުގެ ގޮތުގައި 24 މިލިއަން ޑޮލަރު (370 މިލިއަން ރުފިޔާ) ދެއްކުމަށް އޮތީ ހުކުމްކޮށްފަ އެވެ.
ސިޔާމްގެ ކުންފުނިން ފައިސާ ދައްކާފައި ނުވާތީ, އެ ނިންމުން ތަންފީޒުކޮށް ދިނުމަށް ހިލްޓަންއިން ސިންގަޕޫރުގެ ހައިކޯޓަށް ހުށަހަޅާފައިވާ މައްސަލައިގެ އަޑުއެހުންތަކަށް އޭނާ ހުރީ ސިންގަޕޫރުގަ އެވެ. ރާއްޖޭގެ ބައެއް މީޑިއާތަކުން ރިޕޯޓުކުރި ގޮތުގައި ސިޔާމްގެ ޕާސްޕޯޓު ހިފަހައްޓައި އޭނާއަށް ސިންގަޕޫރުން ފުރުން އޮތީ މަނާކޮށްފަ އެވެ.
އެހެން ނަމަވެސް މިރޭ ރާއްޖެ އައިސް ނޫސްވެރިންނާ ވާހަކަ ދައްކަވަމުން ސިޔާމް ވަނީ އެފަދަ އެއްވެސް ކަމެއް ހިނގާފައި ނުވާ ކަމަށް ވިދާޅުވެ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިސްވެ އުފައްދަވާ ދަ ޑިމޮކްރެޓްސްއަށް ތުހުމަތުތަކެއް ކުރައްވާފަ އެވެ.
"އަޅުގަނޑަށް ހީވަނީ ރާއްޖޭގެ އެންމެ ފަހުން ހެދި ޕާޓީ, ދަ ޑިމޮކްރެޓްސްއިން ކުރެއްވި ކަމެއް ކަމަށް އަޅުގަނޑަށް ފާހަގަކުރެވިފައި އޮތީ. އެއީ, ކޮންމެވެސް ކުރުސޮރެއް [ޓްވިޓާގައި ހިންގާ ހަސަން ކުރުސީ އެކައުންޓް} ކުރާ މީހަކު ޓްވީޓުކޮށްލީ. އެހެންވީމަ އެ ބޭފުޅުން ހިންގި ކަމެއް ކަމަށް ލަފާ ކުރެވެނީ," އެ ޕާޓީއަށް ތުހުމަތު ކުރައްވަމުން ސިޔާމް ވިދާޅުވި އެވެ.
ސިޔާމް ވަނީ އެ ހަބަރު ރާއްޖޭގެ މީޑިއާތަކުން ގެނެސްދިން ގޮތާއި މެދު ވަރަށް ބޮޑަށް ހިތްހަމަނުޖެހުން ފާޅުކުރައްވައި ވާހަކަ ދައްކަވާފަ އެވެ. އަދި, ހަގީގަތާ ހިލާފު ވާހަކަ ދެއްކުމަކީ ވާދަވެރިން ކުރަން ޖެހޭ ކަމެއް ނޫން ކަމަށް ވިދާޅުވި އެވެ.
"މިފަހަރު ސިންގަޕޫރަށް ގޮސް އުޅުނުއިރު އެއްވެސް ވަރަކަށް ސިންގަޕޫރުން ނުފުރޭނެ ގޮތެއް ހަދާފައި ނުވޭ. އަޅުގަނޑު ވަރަށް ނަސޭހަތްތެރިވަން ޕްރޮފެޝަނަލްކޮށް މަސައްކަތް ކުރުމަށް. ވަރަށް ޒިންމާދާރުކަން ކުޑަ ދެރަ ކަމެއް," ސިޔާމް މިރޭ ނޫސްވެރިންނާ ވާހަކަ ދައްކަވަމުން ވިދާޅުވި އެވެ.
މި މައްސަލާގެ އަޑުއެހުމެއް މި މަހުގެ 17 ގައި ވެސް ސިންގަޕޫރުގެ ހައިކޯޓުގައި ކުރިއަށްދިޔަ އެވެ. އެ އަޑުއެހުމަށް ވެސް ސިޔާމް ހާޒިރުވި އެވެ. ސިޔާމް އަދި އޭނާގެ ކުންފުނި ތަމްސީލުކުރީ އެ ގައުމުގެ ޑްރޫ އެންޑް ނެޕިއާ ލޯފާމުންނެވެ.
މި މައްސަލާގައި ހުކުމާ އެއްގޮތަށް ފައިސާ ނުދެއްކުމުން ހިލްޓަން އަށް ރާއްޖޭގެ ސިވިލް ކޯޓަށް ހުށަހެޅި މައްސަލައިގައި ނިންމާފައިވަނީ ދެ ހަފުތާތެރޭގައި ފައިސާ ދައްކަން ޖެހޭނެ ކަމަށެވެ. އެ ނިންމުން ސަން ޓްރެވަލުން ރާއްޖޭގެ ހައިކޯޓުގައި އިސްތިއުނާފުކުރުމުން އެ މައްސަލަ ނިމެންދެން ސިވިލް ކޯޓުގެ ހުކުމް ތަންފީޒުކުރުން މަޑުޖައްސާލަން ވަގުތީ އަމުރެއް ވަނީ ނެރެދީފަ އެވެ.
ރިޔާސީ އިންތިހާބަށް 50 ދުވަހަށް ވެފައިވާއިރު ސިޔާމް އަކީ ރައީސް އިބްރާހިމް މުހައްމަދު ސޯލިހު ދެވަނަ ދައުރަކަށް އެކުލަވާލި ކޯލިޝަންގެ މައި ޕާޓްނަރެކެވެ. މިރޭ ވެސް ސިޔާމް ވަނީ އިންތިހާބު ކާމިޔާބުވާނެ ކަމުގެ ފުރިހަމަ ޔަގީންކަން އޮތް ކަމަށް ވިދާޅުވެފަ އެވެ.
