ރައްޔިތުންގެ މަޖިލީހުގައި ސިޔާސީ ޕާޓީތައް ތަމްސީލުކުރާ ގޮތަށް އައި ބޮޑު ބަދަލާ ގުޅުވައި ދާއިމީ ކޮމިޓީތަކުގެ އެކުލެވުން ބަދަލުކުރަން ވެރިކަން ކުރާ މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ހުށަހެޅި ގޮތަށް ރައްޔިތުންގެ މަޖިލީހުން އިއްޔެ ފާސްކުރި އެވެ.
މަޖިލީހުގައި ސިޔާސީ ޕާޓީތައް ތަމްސީލުކުރާ ގޮތަށް ބޮޑު ބަދަލެއް އައީ މަޖިލީހުގެ މެޖޯރިޓީ އޮންނަ އެމްޑީޕީން 13 މެމްބަރަކު ވަކިވެވަޑައިގެންނެވުމާއި ވަކި ޕާޓީއަކަށް ނިސްބަތްނުވާ މެމްބަރުންތަކެއް އެމްޑީޕީއާ ގުޅިވަޑައިގެންނެވުުމުންނެވެ.
މަޖިލީހުގެ ކޮމިޓީތަކަށް އަލުން މެމްބަރުން އައްޔަން ކުރަން ޖެހުނީ އެހެންވެ އެވެ. ދައުރުން ބޭރުން ޖަލްސާތަކެއް ބާއްވައި އެކަން ނިންމަން އެމްޑީޕީން އެދުނީ މަޖިލީހަށް ހުށަހަޅާފައިވާ ބޮޑެތި ބައެއް މައްސަލަތައް ކުރިއަށް ގެންދަން އެކަން ހުރަހަކަށް ވެފައި އޮތުމުންނެވެ.
ދައުރުން ބޭރު ދެވަނަ ޖަލްސާގައި ވަނީ ކޮމިޓީތައް އެކުލަވާލުމުގެ ރިޕޯޓުގައި އޮތް އެންމެ ފުރަތަމަ އޮޕްޝަން ފާސްކޮށްފަ އެވެ. އެއީ, އެމްޑީޕީން ހުށަހެޅި ގޮތެވެ.
އެމްޑީޕީން ހުށަހެޅި ގޮތް
އެމްޑީޕީ އަށް 64 ޕަސެންޓް
ވަކި ޕާޓީއަކަށް ނިސްބަތްނުވާ މެމްބަރުންނަށް 21 ޕަސެންޓް
ޕީޕީއެމްއަށް 06 ޕަސެންޓް
ޕީއެންސީއަށް 03 ޕަސެންޓް
އެމްއެންޕީ އަށް 03 ޕަސެންޓް
ޖޭޕީ އަށް 02 ޕަސެންޓް
އެމްޑީއޭއަށް 02 ޕަސެންޓް
އެމްޑީޕީން މި ގޮތަށް ހުށަހަަޅައި މިއަދުގެ ޖަލްސާގައި ފާސްކުރިއިރު މަޖިލީހުގައި އެ ޕާޓީގެ 54 މެމްބަރުން ތިއްބަވަ އެވެ. ވަކި ޕާޓީއަކަށް ނިސްބަތްނުވާ މެމްބަރުންގެ އަދަދަކީ 18 އެވެ. އިދިިކޮޅު ޕީޕީއެމްގެ ފަސް މެމްބަރުން ތިއްބަވާއިރު ޕީއެންސީގެ ތިއްބެވީ ތިން މެމްބަރެކެވެ. ޖޭޕީގެ ދެ މެމްމަބަރުންނާއި އެމްއެންޕީގެ ވެސް ތިން މެމްބަރުން މަޖިލީހުގައި ތިއްބަވަ އެވެ. އެމްޑީއޭގެ ތިއްބަވަނީ ދެ މެމްބަރެކެވެ.
އެގޮތަށް, ކޮމިޓީތައް އެކުލަވާލަން ފާސްކުރީ 35 މެމްބަރުންގެ ވޯޓާ އެކު އެވެ. އެ ހުށަހެޅުމާ ދެކޮޅަށް ވޯޓު ދެއްވީ 14 މެމްބަރުންނެވެ.
އެއާއެކު, މަޖިލީހުގެ ރިޔާސަތުގައި އިންނެވި ވިލުފުށީ ދާއިރާގެ މެމްބަރު ހަސަން އަފީފް ވަނީ މިރޭ 9:00 ގެ ކުރިން ކޮމިޓީތަކުގައި ތިއްބަވާނެ މެމްބަރުންގެ ނަންތައް އެންގުމަށް ޕާލިމެންޓަރީ ގްރޫޕްގެ ލީޑަރުންގެ ކިބައިން އެދިފަ އެވެ.
އެމްޑީޕީން އެދުނު ގޮތަށް ފާސްކޮށްފައި މިވަނީ އިދިކޮޅުން ހުށަހެޅި ހުރިހާ އިސްލާހެއް ބޭރުކުރުމަށް ފަހު އެވެ. އެ އިސްލާހުތަކުގެ ވެސް މައިގަނޑު ވިސްނުމަކީ މަޖިލީހުގެ މެޖޯރިޓީ އޮންނަ އެމްޑީޕީއަކީ ސަރުކާރު ހިންގާ ކޯލިޝަންގެ ވެސް މައި ޕާޓީކަމަށް ވާތީ ކޮމިޓީތަކުގެ މެޖޯރިޓީ އެ ޕާޓީއަށް ނޯންނަ ގޮަތަށް ކޮމިޓީތައް އެކުލަވައިލުމެވެ.
މުހިންމު ބައެއް ހަބަރު
ދުވަހުގެ ކޯޓޭޝަން
ސަރުކާރުގެ އިދާރާތަކުން ދޭ ހިދުމަތްތައް ފަސޭހަކަމާއިއެކު ރައްޔިތުންނަށް ފޯރުކޮށްދިނުމަށްޓަކައި "ވަންގަވް" ގެ ނަމުގައި ޑިޖިޓަލް ޕްލެޓްފޯމެއް ރައީސް އިބްރާހިމް މުހައްމަދު ސޯލިހު ވިދާޅުވީ؛
ޒަމާނުއްސުރެ ކަން ހިނގަމުން އައި ގޮތަކީ ސަރުކާރުގެ ހިދުމަތެއް ހޯދަން ޖެހިއްޖެ ނަމަ ކަނޑު ހުރަސްކޮށް ވެރިރަށް މާލެއަށް ދަތުރުކުރަން ޖެހުން. މާލެ އާދެވޭނެ ގޮތެއް ނެތިއްޔާ ހިދުމަތް ނުހޯދާ ތިބުން. ހިދުމަތެއް ހޯދަން އޮފީހަކަށް ދެވުނަސް ގިނަ ވަގުތު ކިއުގައި މަޑުކުރަން ޖެހުން. އެ ހުރިހާ ތަކުލީފެއް އުފުލަން ޖެހޭއިރު ބޭނުންވާ ހިދުމަތާ ގުޅޭ މައުލޫމާތު އެއްތަނަކުން ލިބޭކަށް ނުހުރޭ"
ދުވަހުގެ ފޮޓޯ
ސަރުކާރުގެ ހިދުމަތްތައް އޮންލައިންކޮށް ލިބޭނެ ޕްލޮޓްފޯމް، ވަންގަވް ރައީސް އިބްރާހިމް މުހައްމަދު ސޯލިހު އިއްޔެ އިފްތިތާހުކޮށް ދެއްވަނީ. -- ފޮޓޯ: އަބްދުﷲ އިޔާން
