ރައްޔިތުންގެ މަޖިލިހުގެ ނައިބު ރައީސް ކަމުން ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވަކިކުރުމުގެ މައްސަލަ އަންނަ ހޯމަ ދުވަހު ބާއްވަން އެޖެންޑާ ކުރި ނަމަވެސް، ދާއިމީ ކޮމިޓީތައް އަލުން އެކުލަވާ ނުލެވޭ ކަމަށް ބުނެ، މުއްދަތެއް ނެތް ގޮތަކަށް އެ މައްސަލަ އެޖެންޑާއިން ނަގައިފި އެވެ.
ރައްޔިތުންގެ މަޖިލިހުން އިއްޔެ ނެރުނު ބަޔާނެއްގައި ބުނީ އީވާގެ މައްސަލަ އެޖެންޑާނުކުރަން ނިންމީ މަޖިލިހުގައި ސިޔާސީ ޕާޓީތަކުގެ ދަފްތަރާއި އެއްވެސް ޕާޓީއަކަށް ނިސްބަތް ނުވާ މެމްބަރުންގެ އަދަދަށް އައި ބަދަލަށް ފަހު ދާއިމީ ކޮމިޓީތަކުގައި މެމްބަރުން ދެން ތިބޭނެ ގޮތް އަދިވެސް ފާސްނުވާތީ ކަމަށެވެ.
މަޖިލިހުގެ ގަވާއިދުގައި އޮންނަ ގޮތުން، އިތުބާރު ނެތް މައްސަލަތަކުގެ ގަރާރެއް ހުށަހެޅުމުން މެމްބަރުން ބަހުސްކުރަން ދެވޭ ވަގުތުތައް ފާސްކުރާނީ މަޖިލީހުގެ އާންމު ކޮމިޓީންނެވެ.
"ވީމާ، މަޖިލިހުގެ ގަވާއިދުގައިވާ ގޮތުގެ މަތިން، މަޖިލިހުގެ ނައިބު ރައީސްގެ މަގާމުން ގަލޮޅު އުތުރު ދާއިރާގެ މެންބަރު އީވާ އަބްދުﷲ ވަކިކުރުމަށް ހުށަހަޅާފައިވާ ގަރާރާ ގުޅިގެން ބަަހުސް ކުރުމުގެ ވަގުތު ކަނޑައަޅައި ނިމުމުން، އެ ގަރާރު އެޖެންޑާކުރެވޭނެ ތާރީހެއް ފަހުން އަންގާނެ ވާހަކަ ދެންނެވިން،" މަޖިލިހުގެ ބަޔާނުގައިވެ އެވެ.
އެމްޑީޕީގެ މެމްބަރުކަމުން ވަކިވެވަޑައިގެން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ތާއީދުކުރައްވާ ފެކްޝަނުގެ މެންބަރުން އުފެއްދި "ދަ ޑިމޮކްރެޓްސް" ޕާޓީއާ ގުޅިވަޑައިގަތް 13 މަޖިލިސް މެމްބަރުންގެ ތެރޭގައި އީވާ ވެސް ހިމެނެ އެވެ.
އީވާ ވަކިކުރުމުގެ މައްސަލަ ހުށަހަޅަން އެމްޑީޕީގެ ޕާލިމެންޓްރީ ގްރޫޕުން ފާސްކުރީ އޭގެ ފަހުންނެވެ. އަދި އެ މައްސަލާގައި އީވާ ވަކިކުރުމަށް ވޯޓު ދޭން ޖެހޭ ގޮތަށް ޕާލިމެންޓްރީ ގްރޫޕްގެ މެމްބަރުންނަށް ތްރީލައިން ވިޕެއް ނެރުމަށް ވެސް ފާސްކޮށްފައިވެ އެވެ.
އީވާގެ އިތުރުން ރައްޔިތުންގެ މަޖިލިހުގެ ރައީސްކަމުން ނަޝީދު ވަކިކުރުމަށް ވެސް މިހާރު ވަނީ ހުށަހަޅައިފަ އެވެ. އެމްޑީޕީގެ ރައީސްގެ މަގާމުގައި ވެސް ހުންނެވި ނަޝީދު މަޖިލިހުގެ ރައީސްކަމުން ވަކިކުރަން ހުށަހެޅީ އެމްޑީޕީގެ 50 މެމްބަރުން ހިމެނޭ ގޮތަށް ޖުމުލަ 54 މެމްބަރުންގެ ސޮޔާއެކުގަ އެވެ.
ނަޝީދަށް ތާއީދުކުރައްވާ މެމްބަރުން އާ ސިޔާސީ ޕާޓީއެއް އުފެއްދުމުގެ މަސައްކަތް ފެށީ، އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް ކަމަށް ވާދަވެރި ފަރާތްތަކުން ހުށަހެޅި ގަރާރެއްގައި މެދު ހެންވޭރު ދާއިރާގެ މެމްބަރު އަލީ އާޒިމް ސޮއިކުރެއްވުމުން އޭނާ ޕާޓީން ވަކިކޮށްފައިވަނިކޮށެވެ.
ނަޝީދު މަގާމުން ދުރުކުރުުމަށް އެމްޑީޕީގެ ޕާލިމެންޓްރީ ގްރޫޕުން ނިންމީ، އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް މައްސަލާގައި ރިޔާސަތުގައި ނަޝީދު އިންނަވައިގެން ވޯޓަށް ނާހައި ލަސްކުރަނީ ގާނޫނު އަސާސީއާއި މަޖިލިހުގެ ގަވާއިދާ ހިލާފަށް ކަމަށް ބުނެ އެވެ.
މުހިންމު ބައެއް ހަބަރު
ދުވަހުގެ ކޯޓޭޝަން
އިތުބާރު ނެތްކަމުގެ މައްސަލަތަކާ ގުޅިގެން މަޖިލީހުގައި މަރުތަޅު އެޅިފައިވާއިރު، އެމްޑީޕީ ޕާލިމެންޓްރީ ގްރޫޕުގެ ލީޑަރު މުހައްމަދު އަސްލަމް އިއްޔެ ވިދާޅުވީ،
ރައްޔިތުންގެ މަޖިލީހުގެ ގަވައިދުގެ 205 ވަނަ މާއްދާގެ (ރ) ގައި ވާ ގޮތުން ރައްޔިތުންގެ މަޖިލީހުގައި އިތުރު އެއްވެސް ކަމަކާ ބަހުސް ކުރެވޭނީ މަޖިލީހުގެ ރައީސްގެ ނުވަތަ ނައިބުރައީސްގެ މައްސަލައެއް ހުށަހެޅި ނޯޓިސް ދެވި، ނޯޓިސްގެ މުއްދަތު ހަމަވެފައި ވާ ނަމަ އެއްވެސް މަަސައްކަތެއް ކުރިއަށް ގެންދެވޭނީ އެ މައްސަލާގައި ގޮތެއް ނިންމުމަށް ފަހު،"
ދުވަހުގެ ފޮޓޯ
ބުދަ ދުވަހު ބޭއްވި ޝަރީއަތުގެ މަޖިލީހަށް ފަހު ކުރީގެ ރައީސް އަބްދުﷲ ޔާމީން އަނބުރާ މާފުށީ ޖަލަށް ގެންދިޔުމަށް ލޯންޗަށް އަރުވަން ގެންދިޔަ ވަގުތު އެމަނިކުފާނުގެ ބައެއް ސަޕޯޓަރުން އަޑު އުފުލަނީ. -- ފޮޓޯ: މުހައްމަދު ޝާބިން/ އަދަދު
