ރައްޔިތުންގެ މަޖިލީހުގެ ރައީސް އަދި ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ރައީސް މަޖިލީހުގެ ރިޔާސަތުން ވަކި ކުރަން އެ ޕާޓީން މިއަދު ނިންމި ނަމަވެސް އެމަނިކުފާނުގެ ވަކި ކުރަންޖެހޭ ސަބަބެއް ނެތް ކަމަށް އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް އިން ބުނެފި އެވެ.
ކުރީގެ ރައީސް ނަޝީދު މަޖިލީހުގެ ރިޔާސަތުން ވަކި ކުރަން އެމްޑީޕީގެ ޕާލަމެންޓްރީ ގްރޫޕުން ނިންމީ، ބަންޑާރަ ނައިބު އިބްރާހިމް ރިފްއަތުގެ އިތުބާރު ނެތްކަމުގެ މައްސަލަ މަޖިލީހުގައި ކުރިއަށްނުގެންގޮސް މަޑުޖައްސާތީ އެވެ.
އެކަމަކާ ގުޅިގެން ޕީޕީއެމްގެ ފަރާތުން ނައިފަރު ދާއިރާގެ މެމްބަރު އަހުމަދު ޝިޔާމް "އަދަދު" އާ ވާހަކަ ދައްކަވަމުން ވިދާޅުވީ، މަޖިލީހުގެ ރިޔާސަތުން ނަޝީދު ވަކި ކުރަންޖެހޭ އެއްވެސް ކަމެއް އެމަނިކުފާނު ކުރައްވާފައިނުވާ ކަމަށާއި އެފަދަ މައްސަލައަކަށް ޕީޕީއެމުން ތާއީދު ނުކުރާނެ ކަމަށެވެ.
"ރައީސް ނަޝީދު ރިޔާސަތުން ވަކި ކުރަންޖެހޭ ވަރުގެ ކަމެއް ކުރައްވައިފިއްޔާތާ ވަކި ކުރަންޖެހޭނީ. ރައީސް ނަޝީދު ރިޔާސަތުން ވަކި ކުރަންޖެހޭ ސަބަބެއް އަޅުގަނޑުމެންނަކަށް ނުވިސްނޭ. ސަރުކާރުން ބޭނުންވާހާ ގޮތެއް ރައީސް ނަޝީދު ނުހައްދަވާތީ ކަންނޭނގެ [އެގޮތަށް ނިންމީ]،" ޝިޔާމް ވިދާޅުވި އެވެ.
ރާއްޖޭގެ ދެކުނުން އީއީޒެޑް ބައިނަލްއަގްވާމީ ކޯޓުން ކަނޑައެޅިއިރު، ދައުލަތަށް ގެއްލުންވާ ގޮތަށް އެ މައްސަލައިގައި ވަކާލާތުކޮށްފައިވާ ކަމަށް ބުނެ ހުށަހެޅި އޭޖީގެ އިތުބާރު ނެތްކަމުގެ މައްސަލައިގައި އޭނާ ފުރަތަމަ ލިޔުމުން ޖަވާބު ދެއްވުމުން އެ ދުވަހު ރިޔާސަތުން ނިންމީ ވޯޓަށް ނޭހުމަށެވެ.
އެހެން އޮއްވައި، ރިފްއަތު އިއްޔެ ހާޒިރުވެ ދިފާއުވެވަޑައިގަތުމަށް މަސައްކަތް ކުރެއްވުމުން މެމްބަރުން ވަނީ އިންތިހާއަށް ނިޒާމީ ނުކުތާ ނަގައި ވާހަކަ މެދުކަނޑާލައިފަ އެވެ. ރިޔާސަތުން ނަޝީދު ވަރަށް ގިނަ ނިޒާމީ ނުކުތާއަށް އެ ދުވަހު ފުރުސަތު ދެއްވި އެވެ.
އެހެން އެކަން އޮއްވައި މިއަދުގެ ޖަލްސާ ފެށުމާއެކު ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފު ވަނީ ރިފްއަތުގެ އިމްތިޔާޒުގެ މައްސަލައެއް ހުށަހަޅުއްވައިފަ އެވެ. އިމްތިޔާޒުގެ މައްސަލައަށް ބަހުސް ކުރަން ފާސްނުވި ނަމަވެސް އެ މައްސަލައިގައި ގޮތެއް ނުނިންމާ އިތުބާރު ނެތްކަމުގެ މައްސަލަ ކުރިއަށް ނުގެންދެވޭނެ ކަމަށް އިދިކޮޅުން ވަކާލާތު ކުރި އެވެ. ރިޔާސަތުން ނިންމެވީ އިތުބާރުގެ ނެތްކަމުގެ މައްސަލަ ބާއްވާފައި އެޖެންޑާގައި ދެން އޮތް މައްސަލައަށް ދިޔުމަށެވެ.
އެ މައްސަލައިގައި މިއަދު އެމްޑީޕީގެ މެމްބަރުން ވަނީ މަޖިލީހުގައި އިހުތިޖާޖުކޮށްފަ އެވެ. އިހުޖާޖު ކުރިއަށް ދަނިކޮށް ނަޝީދު ނިންމެވީ މަޖިލިސް ސަޔަށް މެދުކަނޑުއްވާލުމަށެވެ. އޭގެ ފަހުން ރިޔާސަތުގައި އިންނަވާނީ ވިލުފުށީ ދާއިރާގެ މެމްބަރު ހަސަން އަފީފު ކަމަށް އޭގެ ކުރިން ނަޝީދު އިއުލާނު ކުރެއްވި އެވެ.
