ގުދުސްގައި ހުންނަ އަލް އަގްސާ މިސްކިތަށް އިޒްރޭލުން މެދުކެނޑުމެއްނެތި ހަމަލާ ދެމުންދާތީ އޯގަނައިޒޭޝަން އޮފް އިސްލާމިކް ކޯޕަރޭޝަންގެ އެގްޒެކެޓިވް ކޮމިޓީ އިން ބޭއްވި އޯޕަން-އެންޑެޑް ކުއްލި ބައްދަލުވުމުގައި ރާއްޖެއިން ބައިވެރިވެއްޖެ އެވެ.
އޯއައިސީގެ މައި މަރުކަޒުގައި މިއަދު ކުރިއަށްދިޔަ މި ބައްދަލުވުމުގައި ރާއްޖޭގެ ފަރާތުން ބައިވެރިވެލެއްވީ އެ ޖަމްއިއްޔާއަށް ރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު މުހައްމަދު ހަލީމެވެ.
ބައްދަލުވުމުގައި ވާހަކަދައްކަވަމުން ހަލީމު ވިދާޅުވީ އިޒްރޭލުން އަގްސާ މިސްކިތައް ދެމުންދާ ހަމަލާތަކަކީ އ.ދ ގެ ސަލާމަތީ މަޖިލީހާއި ގަރާރުތަކާ ހިލާފު އަމަލުތަކެއް ކަމަށާއި ރާއްޖެއިން އެކަން އެންމެ ހަރުކަށި އިބާރާތުން ކުށްވެރިކުރާ ކަމަށެވެ. މީގެއިތުރުން، އިޒްރޭލުން ވެރިވެގަނެފައިވާ ގައްޒާގައި ހިންގަމުންދާ ލާއިންސާނީ އަމަލުތައްވެސް އޭނާ ވަނީ ކުށްވެރިކުރައްވާފަ އެވެ.
ރާއްޖެއިން ސައުދީއަށް ކަނޑައަޅުއްވާފައި ހުންނަވާ ސަފީރުގެ މަގާމުމުވެސް ފުރުއްވަމުން ގެންދަވާ ހަލީމު އިތުރަށް ވިދާޅުވީ ދިވެހި ސަރުކާރާއި ރައްޔިތުން އަބަދުވެސް ފަލަސްތީނުގެ ރައްޔިތުންނާއި އެކުގައި ވާނެ ކަމަށެވެ.
އިޒްރޭލުން ފަލަސްތީނުގެ ބިންތަކަށް ވެރިވެގަތުން ނިމުމަކަށް ގެނެސް، ފަލަސްތީނުގެ މިނިވަން ދައުލަތެއް ގާއިމުކޮށް، 1967 ވަނަ އަހަރުގެ ކުރީގެ ބޯޑަރާ ހިސާބަށް އިޒްރޭލުން ފަހަތަށް ޖެހުމަށް ބާރުއަޅާ، ފަލަސްތީނުގެ ދައުލަތުގެ ވެރިރަށުގެ ގޮތުގައި އިރުމަތީ ގުދުސް އޮންނަން ޖެހޭ ކަމުގައިވެސް ރާއްޖޭގެ މަންދޫބު ވިދާޅުވި އެވެ.
