ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށްދިން ބޮމުގެ ހަމަލާއިން ލިބިވަޑައިގެންނެވި އަނިޔާތަކަށް ފަރުވާ ހޯއްދެވުމަށް ޖަރުމަނުގައި ހުންނެވި ދުވަސްވަރުން ފެށިގެން ރައީސް އިބްރާހިމް މުހައްމަދު ސޯލިހުއާ ދެ ބޭފުޅުން ވާހަކަފުޅު ދައްކަވާފައި ނުވާ ކަމަށް ވިދާޅުވެ ރައްޔިތުންގެ މަޖިލީހުގެ ނައިބު ރައީސް އީވާ އަބްދުالله ދެއްކެވި ވާހަކައަށް އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) ރައްދު ދެއްވައި އެކަން ދޮގުކުރައްވައިފި އެވެ.
މިއަދު "އަދަދު" އަށް ދެއްވި ހާއްސަ އިންޓަވިއުއްގައި އީވާ ވިދާޅުވި ގޮތުގައި އޭނާ ރައީސް އިބްރާހީމް މުހައްމަދު ސޯލިހާ މެދު އުއްމީދު ކަނޑުއްވައިލެއްވީ "ފަރުވާ ހޯއްދެވުމަށް ފަހު އަނބުރާ [ނަޝީދު] މާލެ ވަޑައިގަންނަވަންދެން އެންމެ ފަހަރަކު ވެސް" ރައީސް ގުޅުއްވާފައި ނުވާތީ ކަމަށް ވިދާޅުވެފަ އެވެ.
އެކަމާ ގުޅިގެން "އަދަދު" ނޫހާ ވާހަކަ ދައްކަވަމުން ބިގޭ ވިދާޅުވީ މެއި 6, 2021 ވަނަ ދުވަހުގެ ރޭ ދިން ހަމަލާއަށް ފަހު ކަންކަން ވެގެންދިޔަ ގޮތް އޭނާ ވަރަށް ގާތުން ދެކުނު ކަމަށާއި ހޮސްޕިޓަލުގައި ނަޝީދު އެޑްމިޓު ކުރުމާއި ހަމައިން ފެށިގެން އެމަނިކުފާނުގެ ހާލުކޮޅު ރައީސް ސޯލިހު ގާތުން ބައްލަވަމުން ގެންދެވި ކަމަށެވެ.
އީވާއަށް އެކަން އެނގިވަޑައިގެންނެވީ، އޭރު ނަޝީދު އަރިހުގައި ޖަރުމަނަށް ވަޑައިގެން އުޅުއްވީ އީވާގެ ފިރިކަލުން ސާބެ އާއި ނަޝީދުގެ ދެބެންގެ ދެދަރި ބޭފުޅެއް ކަަމަށްވާ ފާތިނާ އަބްދުލްހަކީމް ކަމަށް ވެފައި، ނަޝީދުގެ ހާލު ބެއްލެވެން އޮތީ ހަމަ އެކަނި އެ ދެބޭފުޅުންނާ ގުޅައިގެން ކަަމަށް ވާތީ ވިދާޅުވި އެވެ.
އެހެން ނަމަވެސް, ކައިރީގައި ތިއްބެވި އާއިލީ އެހެން ބޭފުޅުންނާ ވެސް ރައީސް މުއާމަލާތް ކުރައްވަމުން ގެންދެވި ކަމަށް ވެސް ބިގޭ ވިދާޅުވި އެވެ.
"އަޅުގަނޑަށް އެނގޭ ހޮސްޕިޓަލުގައި އެޑްމިޓު ކުރެއްވި ހިސާބުން އޭގެ އިތުރުން, ޖަރުމަނަށް ވަޑައިގެންނެވި ފަހުން ވެސް ސީދާ ރައީސް އާއި ދެ ރައީސުން ފޯނުން ވާހަކަ ދެއްކެވިކަން ވެސް. ހާލު ބައްލަވައި ހުރިހާ ކަމެއް އޮޅުން ފިލުއްވައި ކުރަން ޖެހޭ ކަމެއް ވެއްޖިއްޔާ ހުރިހާ ސަޕޯޓެއް ދެއްވުމުގަ އެކަން ގާތުން ދުށް މީހެއް އަޅުގަނޑު މިއީ," ބިގޭ ވިދާޅުވި އެވެ.
އީވާގެ ވާހަކަތައް ބިގޭ ސިފަކުރެއްވީ "ހަގީގަތާ ހިލާފު" ވާހަކަތަކެއްގެ ގޮތުގަ އެވެ. އަދި, އެއީ ކޮން ބޭނުމަކު, ކޮން ނިޔަތެއްގައި ދައްކާ ވާހަކަތަކެއްކަން އެނގިވަޑައިނުގަންނަވާ ކަމަށް ވެސް އޭނާ "އަދަދު" ނޫހަށް ވިދާޅުވި އެވެ.
ބޮމުގެ ހަމަލާގެ މައްސަލާގައި ބިގޭއަށް ވެސް ނަޝީދު ފެކްޝަނުގައި ތިއްބެވި މެމްބަރުންގެ ހަމަލާތައް އޭރު އަމާޒުވި އެވެ. އެގޮތުން, މަޖިލީހުގެ 241 ކޮމިޓީން ކުރިއަށްގެންދިޔަ އިންކުއަރީއަށް ވެސް ބިގޭ ހުރަސް އެޅިކަމަށް އެ ބޭފުޅުން ތުހުމަތު ކުރެއްވި އެވެ.
ރިޔާސީ ޓިކެޓު ރައީސް ސޯލިހަށް ލިބުމާ އެކު އޭރުއްސުރެެ އެމްޑީޕީގައި އުފެދުނު ދެ ފެކްޝަންގެ ކޯޅުން ކޮޅުންލައި ޕާޓީން އިސް މެމްބަރުންތަކެއް ވަކިވެ "ދަ ޑިމޮކްރެޓްސް" ގެ ނަމުގައި އާ ޕާޓީއެއް ހަދަން ވަނީ ނިންމާފަ އެވެ. އެ ޕާޓީގެ އެންމެ އިސް އެއް ބޭފުޅެއްގެ ގޮތުގައި ހުންނެވި އީވާ އެވެ.
