އިންޑިއާ އެމްބަސީގައި ހުޅު ޖަހަން ގޮވާލި މައްސަލައާއި ކްލަބްހައުސްގައި ދެއްކި ވާހަކަތަކާ ގުޅިގެން ދައުލަތުން ދައުވާކޮށްފައިވާ އައްބާސް އާދިލް ރިޒާ ހައްޔަރުކޮށްގެން މިއަދު ކްރިމިނަލް ކޯޓަށް ހާޒިރުކުރުމަށް އަންގާފައިވާތީ، އޭނާ ހޯދާކަން ފުލުހުން އަންގައިފި އެވެ.
މާލޭގެ އެކި ތަންތަނާއި އިންޑިއާގެ ހައި ކޮމިޝަނުގައި ހުޅު ޖަހަން ގޮވާލި މައްސަލައިގައި ދައުލަތުން އައްބާސްގެ މައްޗަށް އުފުލީ ފަނާކޮށްފާނެ ކަމުގެ ބިރު ދެއްކުމުގެ ދައުވާ އެވެ.
އެ މައްސަލައިގެ ފުރަތަމަ އަޑުއެހުމެއް ތާވަލުކުރީ މިދިޔަ ހަފުތާގެ އަންގާރަ ދުވަހަށެވެ. އެކަމަކު އެ ދުވަހު ކޯޓަށް އޭނާ ހާޒިރުވެފައި ނުވާތީ އަޑުއެހުން ކެންސަލް ކުރަން ޖެހުނެވެ.
މިއަދު މެންދުރުފަހު 2:30 އަށް އެ މައްސަލައިގެ އަޑުއެހުމެއް ބާއްވަން ތާވަލުކޮށްފައިވަނިކޮށް، ފުލުހުން ކުރި އިއުލާނެއްގައި ވަނީ، ހ. ނޫކުރިކީލަ، އައްބާސް (45އ) ހޯދުމަށް އިއުލާންކުރީ ކްރިމިނަލް ކޯޓަށް ހުށަހެޅިފައިވާ މައްސަލާގައި ހާޒިރު ކުރަން ބޭނުންވެ ހާޒިރު ކުރެވިފައި ނުވާތީ ކަމަށެވެ.
ކްރިމިނަލް ކޯޓަށް ހާޒިރުވާން އަންގާ މީހުން ހާޒިރުނުވެއްޖެނަމަ، ހައްޔަރުކޮށް ބަންދުގައި ބަހައްޓައިގެން ކޯޓަށް ހާޒިރު ކުރުމަށް ފުލުހަށް އެންގުމުގެ ބާރު ކޯޓަށް އޮވެ އެވެ.
ދައުލަތުން އައްބާސްގެ މައްޗަށް އުފުލާފައިވާ ދައުވާގައިވާ ގޮތުން އޭނާ ވަނީ ޑިސެމްބަރު 22، 2022 ގައި ކްލަބްހައުސްގައި ވާހަކަ ދައްކަމުން، ކުރީގެ ރައީސް އަބްދުﷲ ޔާމީންގެ ޝަރީއަތް ކުރިއަށްދާ ގޮތާ މެދު ހިތްހަމަނުޖެހިގެން މާލޭގެ އެކި ތަންތަނުގައި ހުޅު ރޯކުރަން ގޮވާލައިފަ އެވެ.
އޭގެ އިތުރުން، ޖެހިގެން އައި ދުވަހު އޭނާގެ ނަމުގައިވާ ޓްވިޓާ އެކައުންޓުން ރާއްޖޭގައި ހުންނަ އިންޑިއާގެ ހައި ކޮމިޝަނުގައި ހުޅުޖެހުމަށް ގޮވާލައި ޓްވީޓުކޮށްފައިވާ ކަމަށް ދައުވާގައިވެ އެވެ.
އޭނާގެ މައްޗަށް ދައުލަތުން އުފުލާފައިވާ ދައުވާ ސާބިތުވެއްޖެ ނަމަ އަންނާނެ އަދަބަކީ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެކެވެ.
އައްބާސްއަކީ މީގެ ކުރިން ސަރުކާރުގެ އިސް މަގާމުތަކެއް އަދާކުރި މީހެކެވެ. އޭނާ އަކީ ކުރީގެ ރައީސް ޑރ. މުހައްމަދު ވަހީދު ހަސަންގެ ތަރުޖަމާނުކަން ކުރެއްވުމުގެ އިތުރުން އެ ވެެރިކަމުގައި ފައިނޭންސް މިނިސްޓްރީގެ ސްޓޭޓް މިނިސްޓަރުކަން ވެސް ކުރި މީހެކެވެ.
އޭގެ ފަހުން، ކޮމިޝަނާ ޖެނެރަލް އޮފް ކަސްޓަމްސްގެ މަގާމާއި މެލޭޝިޔާގައި ހުންނަ ސަރުކާރުގެ ޓްރޭޑް ރެޕްރެޒެންޓިވްގެ މަގާމާއި މީރާގެ ބޯޑު މެމްބަރުކަމުގެ މަގާމު ރައީސް އަބްދުﷲ ޔާމީންގެ ވެރިކަމުގައި ފުރި އެވެ.
