ކުރީގެ ރައީސް އަބްދުﷲ ޔާމީންގެ މައްޗަށް އުފުލާ ދައުވާތަކުގެ ސަބަބުން ޖުޑިޝަރީއަށް އާންމުން ކުރާ އިތުބާރު ކުޑަވާ ކަމަށާއި ދާއިރާއަށް ލިބޭ ގެއްލުން ކުޑަކުރަން ވެސް ޝަރީއަތް ނަގާނީ ވަރަށް ސީސީރިއަސްކޮށް ކަމަށް އެމަނިކުފާނުގެ ވަކީލު ޑރ. މުހައްމަދު ޖަމީލު ވިދާޅުވެއްޖެ އެވެ.
ޕީޕީއެމްގެ ރިޔާސީ ކެންޑިޑޭޓުކަން އަރުވާފައިވާ ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. ހުކުމް ކުރީ، އެމަނިކުފާނުގެ ވެރިކަމުގައި ހިނގި އެމްއެމްޕީއާރުސީ ބޮޑު ހިޔާނާތުގެ މައްސަލާގައި ހިމެނޭ ވ. އާރަށް ކުއްޔަށް ދިނުމުގައި ރިޝްވަތު ނަންގަވައި ފައިސާ ލޯންޑަކުރެއްވި ކަމުގެ ތުހުމަތުގައި އުފުލާފައިވާ ދައުވާތައް ސާބިތުވެއްޖެ ކަމަށް ކްރިމިނަލް ކޯޓުން ކަނޑައެޅުމަށް ފަހުގަ އެވެ.
ޔާމީންގެ ޖަލު ހުކުމް ހައި ކޯޓުގައި އިސްތިއުނާފުކޮށްފައިވީ ނަމަވެސް އަދި މައްސަލައިގެ މިހާތަނަށް އެންމެ އަޑުއެހުމެއް ވެސް ބޭއްވޭ ގޮތެއް ނުވެ އެވެ. އަދި ރ. ފުއްގިރި ކުއްޔަށް ދިނުމުގައި ހިޔާނާތް ހިންގި ކަމަށް ބުނާ މައްސަލާގައި ޔާމީންގެ މައްޗަށް އުފުލާފައިވާ ދައުވާތަކުގެ އަޑުއެހުން ކައިރިކައިރި ގެންދިޔައީ ބާއްވަމުންނެވެ. އެއާއެކު، ޔާމީނަށް އިންތިހާބުގައި ވާދަނުކުރެވިދާނެ ކަމުގެ ކަންބޮޑުވުން ސަޕޯޓަރުންގެ މެދުގައި އެބަ އޮތެވެ.
ޔާމީންގެ އިސް ވަކީލުގެ ގޮތުގައި ހުންނެވި، އެމަނިކުފާނުގެ ފުރަތަމަ ނައިބު ރައީސް ޑރ. ޖަމީލު "އަދަދު" ނޫހަށް ދެއްވި އިންޓަވިއުގައި ވިދާޅުވީ ސަމާސާ ކުރުމަށް ވުރެ މީގެ ސީރިއަސްކަން ޖުޑިޝަރީއަށް ވިސްނޭނެ ކަމަށެވެ. އެހެންކަމުން، އިސްތިއުނާފު މާ ބޮޑަށް ލަސްވެގެން ދާނެ ކަމަކަށް އޭނާ ގަބޫލެއް ނުކުރައްވަ އެވެ.
"އޭގައި އަޅުގަނޑުގެ ވާހަކައަކީ ހިނގާށޭ ސަމާސާ ނުކުރަން، އަސްލު ވެސް ސަމާސާ ނުކުރަމާ ހިނގާ، އެބަ އެނގޭ މި މައްސަލައަކީ ދައުވާ ކުރެވޭނެ މައްސަލައެއް ނޫން، އެއް ކަމަކަށް ހެއްކެއް ވެސް ނެތް،" ޖަމީލު ވިދާޅުވި އެވެ.
ޖަމީލު ގަބޫލުކުރައްވާ ގޮތުގައި އެމްއެމްޕީއާރުސީ ބޮޑު ހިޔާނާތުގެ މައްސަލައިގެ ތަހުގީގު ފުރިހަމައެއް ނޫނެެވެ. އެ މައްސަލާގައި ގިނަ ބަޔަކަށް އަދިވެސް ދައުވާކޮށްފައި ނެތުމާއި ޔޫތު މިނިސްޓަރު އަހުމަދު މަހުލޫފުގެ މައްޗަށް ކުރި ދައުވާ އަނބުރާ ގެންދިޔުން ޖަމީލު ސިފަކުރެއްވީ "ޖިނާއީ ކަމެއް" އެ މައްސަލައިގައި ނެތް ކަމަށް ދައުލަތުން ގަބޫލުކުރީ ކަމުގަ އެވެ.
"އަޅުގަނޑު މި ވާހަކަ މި ދައްކަނީ ސާކަސްޓިކް ކޮށެއް ނޫން، ޓެކްނިކަލް ގްރައުންޑެއްގައި ހަމަ މި ބުނަނީ،" ޖަސްޓިސް މިނިސްޓަރުގެ މަގާމާއި، ފަނޑިޔާރުކަން ވެސް މީގެ ކުރިން ކުރައްވާފައިވާ ޖަމީލު ވިދާޅުވި އެވެ.
އެމްއެމްޕީއާރުސީގެ ހިޔާނާތް އެއް ހަމައަކުން ތުހުމަތު ކުރެވޭ މީހުންގެ މައްޗަށް ތަހުގީގު ހިންގާފައި ނެތްކަން ޖުޑިޝަރީއަށް ސާފުކޮށް ފެންނާނެ ކަމަށް ޖަމީލު ގަބޫލުކުރައްވަ އެވެ. އެހެންކަމުން ޖިނާއީ އެހެން މައްސަލަތައް މިނާ ނާޅިން ޔާމީނުގެ އިސްތިއުނާފުގެ މައްސަލަ މިނެން ނެތް ކަމަށް އޭނާ ވިދާޅުވި އެވެ.
"ތުހުމަތުވި އެންމެން އެއް ހަމައަކުން ތަހުގީގަށް ހާޒިރު ކުރެވި، އެ އެންމެންގެ މައްޗަށް އޮތް ފައިލުތައް ބަލައި، އެންމެން އެއް ހަމައަކުން ދައުވާތައް ގެނެސްފައި، ޕެރެލަލްކޮށް ދައުވާގެ ނިންމުންތައް ގެނެސް، އެހެން ހިނގި ކަމެއް ނޫނޭ، އެ ކަން ޖުޑިޝަރީއަށް ފެންނާނެ،" ޖަމީލު ވިދާޅުވި އެވެ.
އެ މައްސަލައިގެ ތަހުގީގު ދިޔަ ގޮތުގެ އިތުރުން، ޖުޑީޝަލް ސާވިސް ކޮމިޝަން (ޖޭއެސްސީ) ގައި ތިއްބެވި ސިޔާސީ ބޭފުޅުންގެ ސަބަބުން ޖުޑިޝަރީއަށް ނުފޫޒު އޮތް ކަމަށް ކުރާ ތުހުމަތުގެ ސަބަބުން ވެސް ޖުޑިޝަރީއަށް ގިނަ ގެއްލުންތަކެއް ލިބޭ ކަމަށް ޖަމީލު ތުހުމަތު ކުރެއްވި އެވެ.
"ޖުޑިޝަރީ މިނިވަނެއް ނޫނޭ، ޖޭއެސްސީ އޮތް ގޮތުން، އެއީ ވަކި ސަރުކާރަކަށް ނޫން، ޖޭއެސްސީ މި އޮންނަ ގޮތަކުން ޖުޑިޝަރީ މުޅިން މިނިވަނެއް ނޫން، މި ކަމަކާ ހުރެ ޖުޑިޝަރީއަށް މި ލިބޭ ޑެމޭޖުތައް ކުޑަ ކުރަން ވެސް މި ކަމުގައި ޖުޑީޝަރީން ސީރިއަސްވާނެ،" ޖަމީލު ވިދާޅުވި އެވެ.
ހައި ކޯޓުގެ އިސްތިއުނާފުގެ އަޑުއެހުންތައް ލަސްވެގެން ގޮސްފި ހާލަތަށް ވެސް ޔާމީންގެ ވަކީލުން ތިބީ ތައްޔާރަށެވެ. ނާކާމިޔާބު ވިޔަސް އެ ހާލަތަށް ވެސް އޮތީ ތައްޔާރަށެވެ. ޔާމީނަށް އިންތިހާބުގައި ވާދަކުރެވޭނެ ގޮތް ހޯދަން ގާނޫނީ އެތައް ފުރުސަތެއް އަދިވެސް އޮތީ ހުޅުވިފައި ކަމަށް ޖަމީލު ގަބޫލުކުރައްވަ އެވެ.
"މީގައި ދައުވާ ކުރެވޭ ވަރުގެ މައްސަލައެއް ނެތް ކަން، ކޭސްއެއް ވެސް ނެތް ކަން ސާބިތު ކުރެވޭނެ، އޭގެ 99 ޕަސެންޓުގެ ޔަގީންކަން އެބަ އޮތް،" ޖަމީލު ވިދާޅުވި އެވެ.
