ދީނީ ކަންތައްތަކާ ގުޅޭ ހަރަކާތްތައް ހިންގާ ނަމަ ބޮޑުތަނުން އަގުހެޔޮވާ ގޮތަށް، އިސްލާމީ މަރުކަޒުގެ ހޯލް ކުއްޔަށް ދޫކުރާ އުސޫލެއް އިސްލާމިކް މިނިސްޓްރީން މިއަދު ގެޒެޓު ކޮށްފި އެވެ.
"އިސްލާމީ މަރުކަޒުގެ ހޯލު ކުއްޔަށް ދޫކުރުމުގައި އަމަލުކުރާނެ ގޮތުގެ އުސޫލު" ގެ ނަމުގައި މިއަދު ގެޒެޓު ކުރި އުސޫލުގައިވާ ގޮތުން ދީނީ ކަންކަމަށް ހޯލް ދޫކުރާ އިރު ދުވާލަކަށް ނަގާނީ 1،500.ރ އެވެ. އެކަމަކު އެހެން ކަންކަމަށް ހޯލް ކުއްޔަށް ހިފާ ނަމަ ދުވާލަކަށް 5،000.ރ ނަގަން އެ އުސޫލުގައި ކަނޑައަޅާފައި ވެ އެވެ.
އިސްލާމިކް މިނިސްޓްްރީގެ އެ އުސޫލުގައިވާ ގޮތުން އިސްލާމީ މަރުކަޒުގެ ހޯލު ކުއްޔަށް ދޫކުރާ އިރު އެތަނުގައި ހުންނަ ގޮނޑިމޭޒާއި ޕޯޑިއަމާއި މޭޒުމަތީ އަޅާ ފޮތިގަނޑުތަކަށް ވެސް ވަކިވަކި ރޭޓް ތަކަކުން އަގު ނަގާނެ އެވެ. އެ އަގުތައް ވެސް ހުރީ ދީނީ ކަންތައްތަކަށް ދޫކުރާ ނަމަ އަގު ހެޔޮވާ ގޮތަށެވެ.
ބައެއް ތަކެތީގެ އަގުތައް
އާ އުސޫލުގައިވާ ގޮތުން އިސްލާމީ މަރުކަޒުގެ ހޯލު ކުއްޔަށް ދޫކުރާ އިރު ވީއައިޕީ ގޮނޑިއެއް ދީނީ ކަމަކަށް ކުއްޔަށް ދޭނީ 10ރ. އަށެވެ. އެހެން ކަމަކަށް ނަމަ 20ރ. އަށެވެ. އާދައިގެ ގޮނޑި ދީނީ ކަމަކަށް 5ރ. އަދި އެހެން ކަމަކަށް ނަމަ 10ރ. އަށެވެ. ވީއައިޕީ މޭޒު ދީނީ ކަމަކަށް ނަމަ 100ރ. އަށް އަދި އެހެން ކަންކަމަށް 200ރ. އަށެވެ.
މޭޒުމަތީގައި އަޅާ ފޮތިގަނޑު ދީނީ ކަންކަމަށް 5ރ. އަށް ދޫކުރާ އިރު އެހެން ކަމަކަށް ނަމަ ދޫކުރާނީ 15ރ. އަށެވެ.
އިސްލާމީ މަރުކަޒުގެ ހޯލު ކުއްޔަށް ދޫކުރާ އިރު އެތަނުގައި ހުރި ޕޯޑިއަމް ދޫކުރާނީ ބައި ދުވަހަށް 50ރ. އަދި މުޅި ދުވަހަށް ނަމަ 200ރ. އަށެވެ. ކޮރިޑޯ، ބައި ދުވަހަށް 100ރ. އަށް އަދި އެއް ދުވަހަށް ނަމަ 400ރ. އަށެވެ.
ހޯލުގައި ކުރިއަށް ގެންދާ ހަރަކާތެއްގެ ކޭޓަރިންނަށް ތަށި ދޮންނަން ފެން ފޯރުކޮށްދޭނީ ބައި ދުވަހަށް ނަމަ 200ރ. އަށް އަދި މުޅި ދުވަހަށް ނަމަ 500ރ. އަށެވެ. ރުއްގަސް ދޫކުރާނީ ބައި ދުވަހަށް ނަމަ 25ރ. އަށް އަދި އެއް ދުވަހަށް ނަމަ 50ރ. އަށެވެ.
ހޯލުގައި ކުރިއަށް ގެންދާ ހަރަކާތްތައް ވީޑިއޯ ކުރުމުގެ ހިދުމަތް މިނިސްޓްރީން ދޭނީ ބައި ދުވަހަށް 8،000ރ. އަށް އަދި އެހެން ކަމަކަށް ނަމަ ދުވާލަކަށް 15،000ރ. އަށެވެ.
