ސްޓޭޓް ޓްރޭޑިން އޮގަނައިޒޭޝަން (އެސްޓީއޯ) އިން ވިއްކާ ތެޔޮ އަގު ހެޔޮކޮށްފި އެވެ.
ރާއްޖެ އަށް އެންމެ ގިނައިން ތެޔޮ އެތެރެކޮށް ވިއްކާ ސަރުކާރުގެ މެޖޯރިޓީ ހިއްސާ އޮތް، އެސްޓީއޯއިން ބުނެފައި ވަނީ އެ ކުންފުނީގެ ސަބްސިޑިއާރީ ކުންފުނި، ފިއުލް ސަޕްލައި މޯލްޑިވްސް (އެފްއެސްއެމް)ގެ ޝެޑްތަކުން މިއަދު (މެއި 1) އިން ފެށިގެން ޕެޓްރޯލް ލީޓަރެއް ވިއްކާނީ 15.14ރ. ކަމަށާއި ޑީސަލް ލީޓަރެއް ވިއްކާނީ 15.70ރ. ކަމަށެވެ.
ކުރިން ޕެޓްރޯލް ލީޓަރެއް ވިއްކީ 15.97ރ. އަށެވެ. ޑީސަލް ލީޓަރެއް 16.32ރ. އަށެވެ. އެހެންވެ މިއީ، ޕެޓްރޯލް ލީޓަރަކުން 83 ލ. އަދި ޑީސަލު ލީޓަރަކުން 62 ލ. ގެ ހެޔޮވުމެކެވެ.
ދުނިޔޭގެ ބާޒާރުގައި ގިނަ ދުވަސްތަކެއް ވަންދެއް ތެލުގެ އަގު ފުލެމުން ދިއުމާ ގުޅިގެން، ރާއްޖޭގައި ވެސް ވިއްކާ ތެލުގެ އަގު އެތައް ފަހަރެއްގެ މަތިވި އެވެ. އަދި ތެޔޮ އިމްޕޯޓްކުރަން ކުރާ ހޭދަ އެތައް ގުނައަކުން މަތިވެ، ދައުލަތުގެ ބަޖެޓަށް ބާރުބޮޑުވި އެވެ.
ތެލުގެ އަގު އުފުލުމުން ދިޔުމަށް ފަހު އެންމެ ފަހުން އަގުހެޔޮކޮށްފައި ވަނީ މިދިޔަ އަހަރުގެ އޯގަސްޓު މަހު އެވެ.
