ވަޒީފާ އާދަކުރަމުންދާ ހޮސްޕިޓަލަށް އެކަނި ހިދުމަތްކުރާނަމަ ހާއްސަ އެލަވަންސެެއް އެ މުވައްޒަފަކަށް ދިނުމަށް ނިންމައި އެކަން ސަރުކާރުން ހާމަކޮށްފި އެވެ.
"އެކްސްކްލޫސިވް ސާވިސް ބެނެފިޓް" ގެ ނަމުގައި ދޭ މި އެލަވަންސަށް ކޮލިފައިވަނީ ސްޕެޝަލިސްޓު މެޑިކަލް ޕްރެކްޓިޝަނަރުންގެ ތެރެއިން ރޭންކު 10 އިން ފެށިގެން މަގާމުތަކާއި ސަބް-ސްޕެޝަލިސްޓު މެޑިކަލް ޕްރެކްޓިޝަނަރުންގެ މަގާމުތަކުގައި ތިބި މުވައްޒަފުންނެވެ. އޭގެ ތެރޭގައި ޑެންޓިސްޓުންގެ އެ ރޭންކުތައް ވެސް ހިމެނެ އެވެ.
ސީނިއާ ސަބް-ސްޕެޝަލިސްޓު ކޮންސަލްޓަންޓުންގެ މުސާރަ ވަނީ 71,649ރ. އިން 87,392ރ. އަށް ބޮޑުކޮށްފަ އެވެ. އަދި, ކޮންސަލްޓަންޓު ސަބް-ސްޕެޝަލިސްޓުންގެ މުސާރަ 28 އިންސައްތަ ބޮޑުކުރުމުން 77,577ރ. އަށް އިތުރުވެފަ އެވެ.
ސީނިއާ ކޮންސަލްޓަންޓު ސްޕެޝަލިސްޓުންގެ މުސާރަ ވަނީ 55,675ރ. އިން 66,702 އަށް ބޮޑުކޮށްފަ އެވެ. އެ މަގާމުގައި ތިއްބެވީ އައިޖީއެމްއެޗުގެ 14 ޑޮކްޓަރުންނެވެ.
މި ރޭންކުތަކުގައި ތިބި މުވައްޒަފުން ވަޒީފާ އަދާކުރާ ހޮސްޕިޓަލަށް އެކަނި ހިދުމަތް ދިނުމަށް އެއްބަސްވެ, އިތުރު އެއްވެސް ތަނެއްގައި ޕްރެކްޓިސް ނުކުރުމަށް އެއްބަސްވެ, ވަޒީފާ އަދާކުރާ ހޮސްޕިޓަލުން ކަނޑައަޅާ އިތުރު ޒިންމާތައް އުފުލުމަށް އެއްބަސްވެ, އެގްރީމެންޓުގައި ސޮއިކުރުމުން މި އެލަވަންސަށް ކޮލިފައިވާނެ ކަމަށް މިރޭ ބޭއްވި ނޫސްވެރިންގެ ބައްދަލުވުމެއްގައި ސަރުކާރުން ވަނީ ހާމަކޮށްފަ އެވެ.
ދައުލަތުގެ މައި ހޮސްޕިޓަލް, އައިޖީއެމްއެޗުގައި މަސައްކަތްކުރާ ސްޕެޝަލިސްޓު ޑޮކްޓަރުން އެތަނުގެ ޑިއުޓީ ގަޑީގައި ބަލާ ބަލިމީހުންގެ އަދަދު ދަށް ކަމަށް ބުނެ އާންމުންގެ ކަންބޮޑުވުން އޮވެ އެވެ. އަދި, ހޮސްޕިޓަލް ޑިއުޓީއަށް ފަހު އަމިއްލަ ކްލިނިކުތަކާއި މެޑިކަލް ސެންޓަރުތަކުގައި އަގުބޮޑުކޮށް އެ ޑޮކްޓަރުން ބަލާތީ އާންމުންގެ ފާޑުކިޔުމާއި ޝަކުވާވެސް އަމާޒުވެ އެވެ.
ހެލްތު ދާއިރާގެ މުސާރަ ބޮޑުވިއިރު މުސާރައިގެ އާ އޮނިގަނޑަށް ޖުމްލަ 3710 މުވައްޒަފުން ހިޖުރަ ކުރި އެވެ. އެއީ ދިވެހިރާއްޖޭގެ އެންމެ ބޮޑު ހޮސްޕިޓަލް އައިޖީއެމްއެޗުގެ 1004 މުވައްޒަފުންނާއި ހެލްތު ސެންޓަރުތަކުގެ 965 މުވައްޒަފުންނާއި ރީޖަނަލް ހޮސްޕިޓަލްތަކުގެ 520 މުވައްޒަފުންނާއި އަތޮޅު ހޮސްޕިޓަލްތަކުގެ 471 މުވައްޒަފުންނާއި ހުޅުމާލޭ ހޮސްޕިޓަލުގެ 298 މުވައްޒަފެކެވެ.
އޭގެ އިތުރުން ދައުލަތުގެ އެހެނިހެން ބައެއް އިދާރާތަކުގައި މަސައްކަތް ކުރާ 452 މުވައްޒަފަކު ވެސް މުސާރައިގެ އާ އޮނިގަނޑަށް ހިޖުރަ ކުރެ އެވެ.
