ރ. ފުއްގިރި ކުއްޔަށް ދޫކުރުމުގެ ތެރެއިން ހިންގި ކަމަށް ބުނާ ހިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނާ ދެކޮޅަށް ދައުލަތުން އުފުލާފައިވާ ދައުވާ ކޯޓުގައި ކުރިއަށް ގެންދާލެއް އަވަސްކަމުން އެކަމާ ކޯފާވެވަޑައިގެން ޝަރީއަތުގެ މަޖިލީހަށް އިފުތިތާހީ ބަޔާން އިއްވުމަށް އެމަނިކުފާނު މިއަދު ދެކޮޅު ހައްދަވައިފި އެވެ.
ޔާމީންގެ މައްޗަށް ހިންގާ ޝަރީއަތުގައި މިއަދު ރޭވިފައި އޮތީ ދައުވާ ލިބޭ ފަރާތުން މައްސަލައިގެ އިފުތިތާހީ ބަޔާން އިއްވުމެވެ. އިފުތިތާހީ ބަޔާން ހުށަހަޅަން ފުރަތަމަ ނިންމާފައި އޮތީ މީގެ ކުރިން ބޭއްވި އަޑުއެހުމުގަ އެވެ. އެ ދުވަހަށް އިފުތިތާހީ ބަޔާނަށް ޔާމީންގެ ވަކީލުން ތައްޔާރު ނުވެވޭތީ، މިއަދު ހުށަހަޅާ ގޮތަށް ފަހުން ނިންމި އެވެ.
މިއަދުގެ އަޑުއެހުމުގައި ވެސް ޔާމީންގެ ވަކީލުންނާއި އެމަނިކުފާނުގެ ފަރާތުން ވެސް ކަންބޮޑުވުން ފާޅުކުރަމުން އައި ކަމަކީ، އިފްތިތާހީ ބަޔާނަށް ތައްޔާރުވާން ހެކި މުތާލިއާކުރަން އެކަށީގެންވާ ވަރަށް ވަކީލުންނާ ބައްދަލުނުކުރެވުމެވެ. އެކަމުގެ ކަންބޮޑުވުން ކޯޓުގައި ހިއްސާ ކުރެއްވުމަށްފަހު މިއަދުގެ އަޑުއެހުމުގައި ވެސް ޔާމީންގެ ފަރާތުން އިފުތިތާހީ ބަޔާނެއް ނުއިއްވަ އެވެ.
ޔާމީނަށް ވާހަކަ ދައްކަވަން މިއަދު ދެއްވި ފުރުސަތުގައި އެމަނިކުފާނު ވިދާޅުވީ ޝަރީއަތް އޮތީ ބަންދު ދުވަސް ދުވަހުގައި ވެސް ކުރިއަށް ގެންދަން ޖެހޭހާ އަވަސްމިނުގައިތޯ ޕްރޮސެކިއުޝަނުން ސާފުކޮށްދޭން އެދިވަޑައިގަންނަވާ ކަމަށެވެ.
"މިހެން ދާ ކަމަށް ވަންޏާ ކީއްވެގެންތޯ ޝަރީއަތުގެ މަޖިލިސް ހުކުރުދުވަހު ވެސް ނުބާއްވަނީ؟،" އެމަނިކުފާނު ވިދާޅުވި އެވެ.
އެ ސުވާލަށް ޖަވާބު ދެއްވަމުން މައްސަލަ ބައްލަވާ ގާޒީ އަލީ ނަދީމު ވިދާޅުވީ ޖިނާއީ އިޖުރާއަތުގެ ގާނޫނުގައިވާ ގޮތަށް، ޝަރީއަތް ފެށުމަށް ފަހު މެދުނުކެނޑި ކުރިއަށް ގެންދަން ޝަރީއަތުން މަސައްކަތް ކުރަމުން އަންނަ ކަމަށެވެ.
"އެއީ ޖިނާއީ އިޖުރާއަތުގެ ގާނޫނުގައި ކަނޑައެޅިފައިވާ ގޮތަކީ ވެސް އަދި ޝަރީއަތްކުރުމާ ބެހޭ ޖިނާއީ އިޖުރާއަތުގެ ގަވައިދުގައި ވެސް، ޝަރީއަތްކުރުމުގެ މަރުހަލާ ކުރިއަށް ގެންދަން ކަނޑައެޅިފައިވާ ގޮތަކީ މިއީ،" ގާޒީ ވިދާޅުވި އެވެ.
ޔާމީން ވިދާޅުވީ ކްރިމިނަލް ކޯޓުގައި ކުރިއަށްދާ މައްސަލައެކޭ އެއް ގޮތަށް، އެމަނިކުފާނުގެ ފަރާތްޕުޅުން ހައި ކޯޓުގައި އިސްތިއުނާފުކޮށްފައިވާ ޔާމީނަށް ކޮށްފައިވާ ހުކުމުގެ މައްސަލަ ވެސް އަވަސްކޮށްދޭން ދައުލަތުން މަސައްކަތް ކުރަން ޖެހޭނެ ކަަމަށް ދެކެވަޑައިގަންނަވާ ކަމަށެވެ.
"މިއީ އިއްޒަތްތެރި ގާޒީއާ މުހާތަބުކޮށް ދަންނަވާ ވާހަކައެއް ނޫން،" އެމަނިކުފާނު ވިދާޅުވި އެވެ.
އިފްތިތާހީ ބަޔާން އިއްވުމަށް ތަކުރާރުކޮށް ޔާމީންގެ ފަރާތުން ދެކޮޅު ހެއްދެވުމުން، ގާޒީ އަލީ ނަދީމު ދެން ނިންމެވީ އެ މައްސަލައިގެ އިފްތިތާހީ ބަޔާން ދެން އޮންނަ އަޑުއެހުމެއްގަައި ބޭއްވުމަށެވެ. އަދި، ދެން އަޑުއެހުމެއް ބާއްވާނީ އަންނަ މަހުގެ ތިން ވަަނަ ދުވަހު ކަމަށް ވެސް ނިންމެވި އެވެ.
އެ މައްސަލާގައި ދެން ދައުވާކޮށްފައިވާ މއ. ކުރިކީލަހިޔާ، އަހުމަދު ކްރިކް ރިޒާ އާއި ސަން ކޮންސްޓްރަކްޝަން އެންޑް އިންޖިނިއަރިން ކުންފުންޏާއި ސަން އިންވެސްޓްމަންޓް ކުންފުނިން ވެސް ހެކިތަކާ ގުޅޭ ގޮތުން ދަށު ކޯޓުން ނިންމި ބައެއް ނިންމުންތައް ސުޕްރީމް ކޯޓުގައި އިސްތިއުނާފުކޮށްފައިވެ އެވެ.
ސަންގެ ދެ ކުންފުނީގެ ފަރާތުން މިހާރު ވަނީ އިފްތިތާހީ ބަޔާން ހުށަހަޅައިފަ އެވެ.
ޔާމީން މިހާރު ވެސް ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެއީ އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދޫކުރުމުގައި 1.1 މިލިއަން ޑޮލަރު ރިޝްވަތުގެ ގޮތުގައި ނަންގަވައި އެ ފައިސާ ލޯންޑަކުރެއްވި ކަމަށް ކްރިމިނަލް ކޯޓުގައި ސާބިތުވެއްޖެ ކަމަށް ކަނޑައެޅުމަށް ފަހުގަ އެވެ. އެ މައްސަލަ ވެސް ވަނީ ހައި ކޯޓުގައި އިސްތިއުނާފުކޮށްފަ އެވެ.
ޖަލު ހުކުމް ދެމިއޮތްހާ ހިނދަކު ޔާމީނަށް ރިޔާސީ އިންތިހާބުގައި ވާދަކުރުމުގެ ފުރުސަތެއް ނުލިބޭނެ އެވެ.
ރާއްޖޭގެ ރައީސުލްޖުމްހޫރިއްޔާއަށް ވުމަށް ގާނޫނު އަސާސީގައި ބަޔާން ކޮށްފައިވާ އެއް ޝަރުތަކީ، ޖިނާއީ ކުށެއްކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށްވުމެވެ.
