ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަންދިން ޓެރަރިސްޓު ހަމަލާގައި ބައިވެރިވިކަމަށް ދައުލަތުން ތުހުމަތުކުރާ އަބްދުﷲ އަލިމަނިކުގެ މައްޗަށް ޓެރަރިޒަމުގެ ކުށެއް ކުރިކަން ސާބިތުވެ ހުކުމް ތަންފީޒުކުރަމުން ދަނިކޮށް މައާފުކޮށްދިން ގޮތުގެ މައުލޫމާތު ރައީސް އޮފީހުން ހާމަނުކުރާ މައްސަލަ ރައްޔިތުންގެ މަަޖިލީހުގެ ރިޔާސަތަށް ހުުށަހަޅައިފި އެވެ.
ހެންވޭރު ހުޅަނގު ދާއިރާގެ މެންބަރު ހަސަން ލަތީފް މަޖިލީހުގެ ރިޔާސަތަށް ފޮނުވި ސިޓީއެއްގައި ވިދާޅުވެފައި ވަނީ އަލިމަނިކު މިނިވަންކުރި ގޮތުގެ މައުލޫމާތަށް އެދި 17 އޮކްޓޯބަރު 2021 ގައި އަދި މިދިޔަ އަހަރުގެ މެއި މަހުގެ 23 ވަނަ ދުވަހު ރައީސް އޮފީހުގައި އެދިފައި ވާނެ ކަމަށެވެ.
އެހެން ނަމަވެސް މިކަމާ ގުޅިގެން ރައީސް އޮފީހުގެ އަދިވެސް މައުލޫމާތު ލިބިފައިނުވާތީ އެ އޮފީހުގެ ބަހެއް ލިބޭނެ ގޮތް ހަމަޖައްސައިދިނުމަށް ހަސަން ލަތީފްގެ ސިޓީގައި ވަނީ އެދިފަ އެވެ.
އެ ސިޓީގައި ބުނެފައި ވަނީ އަލިމަނިކު މިނިވަންކޮށްފައި ވަނީ އަހްލާގީ ރިޕޯޓާއި ޑައިރެކްޓާ އޮފް ޕްރިޒަންސްގެ ރިޕޯޓަށް ބެލުމެއް ނެތި ކަން ފާހަގަކުރެވިފައިވާ ކަމަށެވެ.
މާފު ދިނުމާއި އަދަބު ލުއިކޮށްދިނުމުގެ ގާނޫނުގައި ބުނާ ގޮތުން ހުކުމް ތަންފީޒުކުރާ ގައިދީއެއްގެ އަދަބު ލުއިކޮށްދިނުން ނުވަތަ އަދަބު މައާފްކޮށްދޭން ޖެހޭނީ އަހްލާގީ ރިޕޯޓާއި ޑައިރެކްޓާ އޮފް ޕްރިޒަންސް ގެ ރިޕޯޓަށް ބެލުމަށް ފަހު އެވެ.
އަލިމަނިކު ޖަލުން ދޫކޮށްލާފައި ވަނީ 20 އޯގަސްޓު 2019ގަ އެވެ. އޭނާގެ އަހްލާގީ ރިޕޯޓު ތައްޔާރުކޮށްފައި ވަނީ 1 ސެޕްޓެމްބަރު 2021 ގައި ކަމަށާއި، ޑައިރެކްޓާ އޮފް ޕްރިޒަންގެ ރިޕޯޓު ތައްޔާރުކޮށްފައި ވަނީ އަހްލާގީ ރިޕޯޓަށް ބެލުމެއް ނެތިކަން ފާހަގަކުރެވިފައިވާކަމަށް އެ ސިޓީގައި ބުނެފައި ވެއެވެ.
ނަޝީދަށް ދިން ހަމަލާގެ ތުހުމަތާ ގުޅިގެން އަލި މަނިކު ހައްޔަރުކުރީ މެއި 18، 2021 ގައި ފުލުހުން ހިންގި އޮޕަރޭޝަނެއްގަ އެވެ. އޭނާއަކީ 2007 ވަނަ އަހަރު އއ. ހިމަންދޫގައި ފުލުހުންނާ ސިފައިންނާ ހަރުކަށި ފިކުރަށް ނިސްބަތްވާ ބަޔަކާ ހިނގައިދިޔަ ކުރިމަތިލުންތަކެއްގައި އިސްކޮށް އުޅުނު މީހެކެވެ. އަލިމަނިކު އެ މައްސަލައިގަ ޖަލު ހުކުމް ތަންފީޒު ކުރަމުން ދަނިކޮށް ޖަލުން ވެސް ފިލާފައިވެ އެވެ.
