މި ސަރުކާރުން ފަށައިގެން ކުރިއަށް ގެންދާ ޕޭ ހާމަނައިޒޭޝަންގެ މަސައްކަތުގެ ދަށުން ކައުންސިލްތަކުގެ އިދާރީ މުވައްޒަފުންގެ މުސާރައަށް ހައްލެއް ލިބިގެންދާނެ ކަމަށް ބެލެވޭ ކަމަށް ލޯކަލް ގަވަމަންޓް އޮތޯރިޓީ (އެލްޖީއޭ) ގެ ސީއީއޯ އަފްޝަން ލަތީފް ވިދާޅުވެއްޖެ އެވެ.
ގިނަ އަދަދެއްގެ ކައުންސިލް އިދާރާތަކުން، އިދާރީ މުވައްޒަފުންގެ މުސާރަ ބޮޑުކޮށްދިނުމަށް އެދި ގަރާރުތަކެއް ނެރެމުންދާ މި ދަނޑިވަޅުގައި އަފްޝަން "އަދަދު" އަށް ވިދާޅުވީ، ކައުންސިލްތަކުގެ އެ ގަރާރުތައް ފާސްކުރުމަކީ މައްސަލައެއް ނޫން ކަމަށާއި އެލްޖީއޭއިން އެކަން ހުއްޓުވަން ނޫޅޭނެ ކަމަށެވެ.
"އަޅުގަނޑުމެން ދަންނަވަން ކޮންމެ ކަމެއްގަވެސް ޑިމާންޑު ކުރާއިރު އަޅުގަނޑުމެން ވިސްނަންޖެހޭ އެބަ ދައުލަތެއްކަން މީ، ކައުންސިލްތަކަކީ ވެސް ދައުލަތުގެ ބައެއް މިނިސްޓްރީ ތަކަކީ ވެސް، އަދި އެލްޖީއޭ އާއި ދެން ހުރި އިދާރާތަކަކީވެސް، އެހެންވީމަ ދައުލަަތަށް ބެއާ ކުރެވޭ ވަރަކަށް އަޅުގަނޑުމެން ޑިމާންޑު ކުރަންވާނީ," އަފްޝަން ވިދާޅުވި އެވެ.
ގިނަ ކައުންސިލްތަކުން ނެރެމުންދާ ބަޔާނުގައި މައިގަނޑު ގޮތެއްގައި ފާހަގަކޮށްފައިވަނީ ދައުލަތުގެ އެހެން އިދާރާތަކަށްވުރެ ދަށްވެ، ފަރަގު ބޮޑުވުމުން އެކަމާމެދު ކަންބޮޑުވާ ކަމެވެ. އަދި، މިކަމުގެ ސަބަބުން ކިޔަވައިގެން ތިބި ތަޖުރިބާ ހުރި ރަނގަޅު މުވައްޒަފުން ކައުންސިލްތަކުގެ ވަޒީފާއިން ވަކިވެ އެހެން ދާއިރާތައް އިހުތިޔާރުކުރާކަން ވެސް ކައުންސިލްތަކުން ވަނީ ފާހަގަކޮށްފަ އެވެ.
މިކަމަށް ހައްލެއް ލިބިގެންދާނީ ސަރުކާރުން މިހާރު ކުރަމުންދާ ޕޭ ހާމަނައިޒޭޝަންގެ މަސައްކަތުގެ ދަށުން ކަމަށް ބެލެވޭ ކަމަށް އޭނާ ވިދާޅުވި އެވެ. އެގޮތުން، މިހާރު ތައުލީމީ އަދި ސިއްހީ ދާއިރާގެ މުވައްޒަފުންގެ މުސާރައަށް ލިބެގެންދިޔަ ހެޔޮ ބަދަލު ކައުންސިލްތަކަށް ވެސް ލިބޭނެ ކަމަށް ގަބޫލުކުރައްވާ ކަމަށް އަފްޝަން ވިދާޅުވި އެވެ.
"ހާމަނައިޒް ކުރާއިރު، މިސާލަކަށް ކައުންސިލްތަކުގަ އެބަތިއްބަވާ ޕްލޭނިން މަސައްކަތް ކުރާ ބޭފުޅުން، ހުރިހާ ޕްލޭނިން މަސައްކަތް ކުރައްވާ ބޭފުޅުން އެއީ ޕްލޭނިން މިނިސްޓްރީގަ މަސައްކަތް ކުރި ނަމަވެސް، ރަށު ކައުންސިލް ނުވަތަ އަތޮޅު ކައުންސިލެއްގަ މަސައްކަތް ކުރެއްވި ނަމަވެސް އެއް މުސާރައެކޭ ލިބެންވާނީ" އަފްޝަން ވިދާޅުވި އެވެ.
އެގޮތުން، ކޮންމެ ޕްރޮފެޝަނެއްގައި މަސައްކަތްކުރައްވާ މީހުން، ކޮންމެ އިދާރާއެއްގައި މަސައްކަތްކުރި ނަމަވެސް އެއްވަރެއްގައި މުސާރަ ދެވުން އެއީ ސަރުކާރުގެ ޕޭ ހާމަނައިޒޭޝަންގެ މަސައްކަތް ނިމޭއިރު ހާސިލްކުރަން ބޭނުންވާ ލަޑުދަނޑިކަންވެސް އަފްޝަން ފާހަގަކުރެއްވި އެވެ.
