ކުރިއަށް ރިޔާސީ އިންތިހާބުގައި އިދިކޮޅު ޕީޕީއެމުން ޖުމްހުރީ ޕާޓީގެ ފަހަތަށް ނޭރި ނަމަވެސް، އެ ޕާޓީއާއެކު އެއްވެސް މަޝްވަރާއެއް ކުރެވޭނީ މިހާރު އޮތް ސަރުކާރުގެ ކޯލިޝަނުން އެ ޕާޓީ ވަކިވުމުން ކަމަށް ޕީޕީއެމާއެކު ކޯލިޝަން ހަދާފައިވާ ޕީއެންސީގެ ރައީސް އަބްދުއްރަހީމް އަބްދުﷲ މިރޭ ވިދާޅުވެއްޖެ އެވެ.
ކ. މާފުށީގައި އިދިކޮޅުން މިރޭ ބޭއްވި ހާއްސަ ނޫސްވެރިންގެ ބައްދަލުވުމެއްގައި އަބްދުއްރަހީމް ވިދާޅުވީ، ޖޭޕީ އިސްވެ އޮވެ ޕީޕީއެމާއެކު ކޯލިޝަން ހެދުމަށް އެދި ޖޭޕީގެ ލީޑަރު ގާސިމް އިބްރާހިމް ފޮނުއްވި ސިޓީ ލިބިފައިވާ ކަމަށާއި އެހެން ނަމަވެސް އެ ސިޓީ މިވަގުތު ބަލައިގަނެވެން ނެތް ކަމަށެވެ.
ސިޓީ ބަލައިނުގަނެވޭ ފުރަތަމަ ސަބަބެއްގެ ގޮތުގައި އަބްދުއްރަހީމް ފާހަގަކުރެއްވީ އިދިކޮޅު ލީޑަރު އަދި ރިޔާސީ ކެންޑިޑޭޓު އަބްދުﷲ ޔާމިނަށް އެ ސިޓީ އެޑްރެސްކޮށްފައި ނެތުމެވެ. ނަމަވެސް ސިޓީ އެޑްރެސްކޮށްފައި އޮތީ ކޮން ފަރާތަކަށް ކަމެއް ހާމައެއް ނުކުރެއްވި އެވެ.
"އަޅުގަނޑުމެންނަށްވުރެ ކުރިން ރިޔާސީ ކެންޑިޑޭޓެއް ދެއްކި ފަރާތެއް ނޯންނާނެ، އެހެންވީމާ އަޅުގަނޑުމެންގެ ކެންޑިޑޭޓަށް އަދި ޕީޕީއެމްގެ ރައީސަކަށް ރައީސް ޔާމީން ހުންނަވަނިކޮށް އެމަނިކުފާނު ނޫން އެހެން ފަރާތަކަށް އެޑްރެސްކޮށް ސިޓީ ފޮނުއްވުމަކީ އަޅުގަނޑުމެނަށް ބަލައިގަނެވޭނެ ކަމެއް ނޫން،" އޭނާ ވިދާޅުވި އެވެ.
ދެން އޭނާ ފާހަގަކުރެއްވީ އިދިކޮޅުން އެއްވެސް ބަޔަކާއެކު ސިޔާސީ މަޝްވަރާއެއް ކުރާނީ އެ ފަރާތްތަކުގެ އުސޫލުތަކާ އެއްގޮތްވާގޮތުގެ މަތިން ކަމަށެވެ.
"އަޅުގަނޑުމެން އޮންނާނެ އިއުލާންކޮށްފަ ޕީޕީއެމް/ޕީއެންސީ އާ އެކީގަ މަޝްވަރާއެއް ނުކުރެވޭނޭ މި ސަރުކާރުގެ ކޯލިޝަނުގައި ހިމެނޭ އެއްވެސް ޕާޓީއަކަށް، އަޅުގަނޑުމެންނާ ވާހަކަދައްކާ ކަމުގަ ވަންޏާ ޖެހޭނީ އެ ޕާޓީއަކުން މި ސަރުކާރު ކޯލިޝަނުން ވަކިވެ އެކަން އިއުލާންކުރަން،" އަބްދުއްރަހީމް ވިދާޅުވި އެވެ.
މީގެއިތުރުން، މި ސަރުކާރުގެ ކުރީގެ ރައީސް ޔާމީނަށް ގަސްތުގައި އަނިޔާކުރާކަން ގަބޫލުކޮށް އެކަމާ ނުރުހޭ އަދި ޔާމީނުގެ ސިޔާސަތުތަކަށް ތާއީދުކުރާ ބައެއް ކަމުގައި އިދިކޮޅާއެކު މަޝްވަރާކުރާ ބަޔަކު ވާންޖެހޭނެ ކަމަށްވެސް އަބްދުއްރަހީމް ވިދާޅުވި އެވެ.
ޕީޕީއެމްގެ އިތުރުން އެމްއެންޕީ، އެމްއާރުއެމް އަދި ރިޔާސީ އިންތިހާބުގައި ވާދަކުރައްވާނެ ކަމަށް އިއުލާންކުރައްވާފައިވާ ކުރީގެ ހޯމް މިނިސްޓަރު އުމަރު ނަސީރާއި ކުރީގެ ބަންޑާރަ ނައިބު ޑރ. މުހައްމަދު މުނައްވަރަށް ވެސް ގާސިމް ދައުވަތު ފޮނުއްވާފައިވެ އެވެ.
އޭގެތެރެއިން ޕީޕީއެމް، އުމަރު އަދި އެމްއެންޕީއިން ވަނީ ގާސިމާއެކު ކޯލިޝަން ނުހަދާނެ ކަމަށް ބުނެފަ އެވެ. ޑރ. މުނައްވަރުގެ ޓީމު އަދި އެމްއާރުއެމްއިން މިހާތަނަށް ގާސިމްގެ ސިޓީއަށް ޖަވާބެއް ދީފައެއް ނުވެ އެވެ.
ޖޭޕީއިން ރައީސް އިބްރާހިމް މުހައްމަދު ސޯލިހާއެކު ކޯލިޝަން ނުހަދައި ރިޔާސީ އިންތިހާބުގައި ވަކިން ވާދަކުރަން ނިންމާފައިވާއިރު، މިހާތަނަށް އެ ޕާޓީއާއެކު ބައިއަތު ހިފާފައިވަނީ އެމްޑީޕީގެ ރިޔާސީ ޕްރައިމަރީ ނާކާމިޔާބުވި އެ ޕާޓީގެ ރައީސް މުހައްމަދު ނަޝީދު ޕާޓީގެ ތެރޭގައި އުފައްދަވާފައިވާ 'ފިކުރެއްގެ ދިރުން' ފެކްޝަނުންނެވެ.
