އެސްޓީއޯގެ މެނޭޖިން ޑިރެކްޓަރުގެ މަގާމަށް އެ ކުންފުނީގެ ދަށުން ހިންގަމުންދާ މޯލްޑިވްސް ސްޓޭޓް ޝިޕިން (އެމްއެސްއެސް) ހިންގެވުމާ ހަވާލުވެ ހުންނެވި އަބްދުﷲ ސައީދު އައްޔަނުކޮށްފި އެވެ.
މިނިސްޓްރީ އޮފް ފިނޭންސްގައި މިއަދު އޮތް ރަސްމިއްޔާތެއްގައި އޭނާ އެ މަގާމަށް އައްޔަން ކުރި ކަމުގެ ލިޔުން އަރުވާފައި ވަނީ ޕްރައިވެޓައިޒޭޝަން އެންޑް ކޯޕަރައިޓައިޒޭޝަން ބޯޑު (ޕީސީބީ) ގެ ރައީސް، އާސިމް މުހައްމަދެވެ.
އޭނާ އެ މަަގާމަށް އައްޔަން ކުރުމަށް ޕީސީބީއަށް ނަން ފޮނުވައިފައި ވަނީ މާޗް 28، ގަ އެވެ.
އެސްޓީއޯގެ މެނޭޖިން ޑިރެކްޓަރުގެ މަގާމަށް ސައީދު އައްޔަން ކުރައްވާފައި މިވަނީ އެ މަގާމުގައި ކުރިން ހުންނެވި، ހުސެން އަމްރު އެ މަގާމުން ދުރު ކުރުމަށްފަހު އެވެ. އެއީ ސަރުކާރު ކުންފުނިތައް ހިންގުމުގައި ގެންނަ ބަދަލުތަކުގެ ތެރެއިން އާދައިގެ މަތިން ގެނައި ބަދަލެއްގެ ކަމަށް ސަރުކާރުން އޮތީ ބުނެފަ އެވެ.
ސައީދަކީ މީގެ ކުރިން ވަނީ ގުލޯބަލް ޓުރޭޑިން (ސިންގަޕޯ) ޕްރައިވެޓު ލިމިޓެޑުގެ މެނޭޖަރު އަދި ޑިރެކްޓާ އޮފް ބިޒްނަސް ޑިވެލޮޕްމަންޓުގެ މަގާމާއި މޯލްޑިވްސް ނެޝަނަލް އޮއިލް ޕްރައިވެތު ލިމިޓެޑުގެ ޗެއާމަން އަދި ސީއީއޯގފެ މަގާމާއި އެސްޓީއޯ މޯލްޑިވްސް (ސިންގަޕޯ) ޕްރައިވެޓު ލިމިޓެޑުގެ ޗެއާމަން އަދި މެނޭޖިން ޑިރެކްޓަރުގެ މަގާމު ފުރުއްވައިފަ އެވެ.
އޭގެ އިތުރުން އެމްޑީޕީގެ ފުރަތަމަ ވެރިކަމުގައި، ރައީސް މުހައްމަދު ނަޝީދުގެ ކެބިނެޓް ސެކްރެޓަރީއެއްގެ މަގާމު ވެސް ސައީދު އަދާކުރެއްވި އެވެ.
އެސްޓީއޯގެ މެނޭޖިން ޑިރެކްޓަރުގެ މަގާމު ހުސްވުމާ ހަމައިން އެ މަގާމު ވަގުތީ ގޮތުން ފުރުއްވަމުން ގެންދެވީ އެ ކުންފުނީގެ ސީއެފްއޯ މުހައްމަދު ނިޒާމު އެވެ.
