ޔޫތު މިނިސްޓްރީގެ މުދާ ވައްދާފައި ހުރި ގުދަނެއް، ހުސްކޮށްފައިވަނީ އެތަނަކީ ސިޓީ ކައުންސިލްގެ ހުއްދަ ނެތި ގަވައިދާ ހިލާފަށް ހިންގަމުން އަންނަ ތަނަކަށް ވާތީ ކަމަށް މާލޭ ސިޓީ ކައުންސިލުން ބުނެފި އެވެ.
ސިޓީ ކައުންސިލުން ހުސްކުރަން މަސައްކަތް ކޮށްފައިވަނީ މާލޭ ހިޔާ ބިމުގައި ކުރިން ރުމާލު 2 ޖަގަހަ ހިންގި ތަނުގައި ހުރި ގުދަނެކެވެ. ކައުންސިލްގެ މުވައްޒަފުންނާއި ވެހިކަލްތައް ބޭނުންކޮށްގެން އެ ގުދަން ހުސްކުރުމުގެ މަސައްކަތް ރޭ ދަންވަރު ކުރަމުން ދަނިކޮށް އެ ކަން ހުއްޓުވީ ފުލުހުންނެވެ.
މި މައްސަލައިގައި ސިޓީ ކައުންސިލަށް ބޮޑެތި ތުހުމަތުތަކެއް އަމާޒުވެފައިވަނިކޮށް، އެ ކައުންސިލުން ނެރުނު ބަޔާނެއްގައި ބުނީ އެ ގުދަން ހަދާފައިވާ ބިމަކީ ސިޓީ ކައުންސިލްގެ ދަށުގައި އޮތް ބިމެއް ނަމަވެސް ގުދަން ހަދާފައިވަނީ ސިޓީ ކައުންސިލްގެ ހުއްދަ ލިބިގެން ނޫން ކަމަށެވެ.
އެ ގުދަނަކީ ގަވައިދާ ހިލާފަށް ހިންގަމުންދާ ތަނަކަށް ވާތީ މިދިޔަ ޑިސެންބަރު މަހުގެ ހަތަރު ވަނަ ދުވަހުން ފެށިގެން ވެރިފަރާތް ހޯދުމަށް ދިވެހިސަރުކާރުގެ ގެޒެޓުގައި ޖަހައި އިއުލާނުކޮށްފައިވާ ކަމަށް ބަޔާނުގައި ބުނެފައިވެ އެވެ.
އަދި، އެތަން ހުސްކުރަން ނިންމީ އިއްޔެގެ ނިޔަލަށް ވެސް އެއްވެސް ފަރާތަކުން ހަވާލުވެފައިނުވާތީ އެތަނަކީ ވެރިފަރާތެއް ނެތްތަނެއްގެ ގޮތުގައި ބެލުމަށްފަހުގައި ކަމަށް ބުނެފައިވެ އެވެ.
ޔޫތު މިނިސްޓަރު އަހުމަދު މަހުލޫފު ރޭ ކުރެއްވި ޓްވީޓެއްގައި ވިދާޅުވެފައި ވަނީ ސިޓީ ކައުންސިލުގެ ބިމެއްގައި ހުރި އެ މިނިސްޓްރީގެ ގުދަނުގެ ތަޅު ހަލާކުކޮށްލައި އެތަނުގައި ހުރި އަގުބޮޑު ސާމާނުތައް ގެންދިޔަ ކަމަށެވެ.
"މިކަން ވަގުތުން ހުއްޓާލުމަށް ސިޓީ ކައުންސިލްއަށް ގޮވާލަން، އަދި ގެއްލޭ ތަކެއްޗާއި ގެއްލުންލިބޭ ތަކެއްޗަށް ޒިންމާ އުފުލަންވާނެ،" ޓްވީޓުގައިވެ އެވެ.
މިކަމާ ގުޅިގެން ސުވާލުކުރުމުން މިނިސްޓަރު މަހުލޫފް "އަދަދު" އަށް ވިދާޅުވީ ގުދަން ހުސްކުރާނެ ކަމުގެ އިންޒާރު ދިނުމަށް ފަހު އެ ތަން ހުސް ކުރަން ފަށާފައިވަނީ އެ މިނިސްޓްރީއަށް އެނގުމެއް ނެތި ކަމަށެވެ.
"މިއީ ވަރަށް ދަށު ދަރަޖައިގެ ކަމެއް، ސަރުކާރުގެ މިނިސްޓްރީއެއްގެ ބިމެއްގައި ހުރި ގުދަނެއްގެ ތަޅު ހަލާކުކޮށް އެ ތަޅު ބަދަލުކުރުން. އަދި އެއަށް ފަހު މުދާ ގެންދިޔުން،" މަހުލޫފް ވިދާޅުވި އެވެ.
