ކ. މާފުށީ ލޭންޑު ޔޫސް ޕުލޭނާ އެއްގޮތަށް އެރަށުން ދޫކުރުމަށް ނިންމާފައިވާ ބަންޑާރަ ގޯއްޗަށް އެދި ހުށަހެޅުމުގެ ފުރުސަތު ހުޅުވާލައިފި އެވެ.
އެ ރަށު ކައުންސިލުން އިއްޔެ ކޮށްފައިވާ އިއުލާނެއްގައި ބުނެފައި ވަނީ ދޫކުރުމަށް ނިންމާފައި ވަނީ 2000 އަކަފޫޓުގެ 308 ގޯތި ކަމަށެވެ. އެއީ އެރަށުން އަލަށް ހިއްކި "އާ މާފުށި" ސަރަހައްދުންނެވެ.
މާފުށިން ގޯތި ދޫކުރުމަށް ހަމަޖެހިފައިވާ ސަރަހައްދާއި ނަންބަރުތައް --
މާފުށިން ދޫކުރަން ހަމަޖެހިފައިވާ ގޯއްޗަށް އެދި ހުށަހެޅުމަށް ކޮންމެހެން މާފުށީ ރައްޔިތަކަށްވާކަށް ނުޖެހެ އެވެ. ރާއްޖޭގެ އެއްވެސް ރަށަކުން ބަންޑާރަ ގޯއްޗެއް ނުވަތަ އަމިއްލަގޯއްޗެއް ނުވަތަ ގޯއްޗަކުން 600 ފޫޓަށްވުރެ ބޮޑު ބައެއް ލިބިފައި ނުވާ ކޮންމެ ދިވެހި ރައްޔިތަކަށް ވެސް އެރަށުން ގޯއްޗަށް އެދެވޭނެ ކަމަށް އެ އިއުލާނުގައި ބުނެފައިވެ އެވެ.
ގޯއްޗަށް އެދި ހުށަހަޅަންޖެހޭ ފޯމު، ގެޒެޓުން ޑައުންލޯޑު ކުރެވޭނެ އެވެ. ކައުންސިލުން ފޯމު ދޫކުރަން ފަށާނީ އަންނަ އާދީއްތަ ދުވަހުން ފެށިގެން އޭޕްރިލް މަހުގެ 15 ވަނަ ދުވަހުގެ ހެނދުނު 9:30 އިން 12:30 އަށެވެ.
ފުރިހަމަ ކޮށްފައިވާ ފޯމުތައް ކައުންސިލުން ބަލައިގަންނަން ހަމަޖެހިފައިވަނީ އޭޕްރިލް ނުވަ ވަނަ ދުވަހުން ފެށިގެން އެމަހުގެ 15 ވަނަ ދުވަހުގެ ހެނދުނު 9:30 އިން މެންދުރުފަހު 1:00 އަށެވެ.
މާލެ ނަގާފައި ބިމުގެ އަގު ދެން އެންމެ ބޮޑު، މާފުއްޓަކީ ރާއްޖޭގައި އެންމެ ފުޅާ ދާއިރާއެއްގައި ޓުއަރިޒަމްގެ ވިޔަފާރި ކުރަމުން އަންނަ ރަށެވެ. ރާއްޖޭގެ އެއް ރަށަކުން އެންމެ ގިނަ ޓެކްސް ދައްކަމުން އަންނަނީ އެ ރަށުންނެވެ.
ގޯތި ދޫކުރުމަށް ހަމަޖެހިފައިވާ ސަރަހައްދަކީ ބޯހިޔާވަހިކަމުގެ ދަތިކަން ހައްލު ކޮށްދިނުމަށްޓަކައި ސަރުކާރުން ގެންގުޅޭ ސިޔާސަތުގެ ދަށުން ހިއްކާފައިވާ 25 ހެކްޓަރެވެ. މަސައްކަތް ކޮށްފައި ވަނީ އެމްޓީސީސީންނެވެ.
