ކުރިއަށް އޮތް ރިޔާސީ އިންތިހާބުގައި އެމްޑީޕީގެ ރައީސް މުހައްމަދު ނަޝީދުގެ "ފިކުރެއްގެ ދިރުން" ފެކްޝަނުން ތާއީދު ކުރާނީ ޖުމްހޫރީ ޕާޓީގެ ކެންޑިޑޭޓަށް ކަމަށް ބުނެފި އެވެ.
ޖޭޕީއާއި ރައީސް ނަޝީދުގެ މަންދޫބުންގެ ދެ ވަނަ މަޝްވަރާ ބައްދަލުވުން ވަނީ މިރޭ ކުރިއަށް ގެންގޮސްފަ އެވެ.
އެ ބައްދަލުވުމަށްފަހު ނޫސްވެރިންނާ ވާހަކަ ދައްކަވަމުން ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވީ މިހާރު ޖޭޕީއާއެކު ރަސްމީކޮށް ކޯލިޝަންގެ މަސައްކަތް ފަށާފައިވާ ކަމަށެވެ.
"އަޅުގަނޑުމެން އައިސް މި ތިބީ ޕާޓީގެ ރައީސްގެ ފަރާތްޕުޅުން، އެމްޑީޕީގެ ރައީސްގެ ފަރާތްޕުޅުން،" އެމްޑީޕީން ޖޭޕީގެ ފަހަތަށް އެރި ފަދަ މޭރުމަކުން ހަސަން ލަތީފް ވިދާޅުވި އެވެ.
މިހާރު މަސައްކަތް ކުރެވުމުން ދަނީ ކޯލިޝަންގެ އެގްރީމެންޓުގެ މަސައްކަތް ކަމަށާއި މިރޭ ވެސް އެކަމުގެ މަޝްވަރާ ކުރެވިގެން ދިޔަ ކަމަށް އޭނާ ވިދާޅުވި އެވެ.
"މިހާރު މި ކުރެވެނީ އެ ދިމާލަށް [ކޯލިޝަން އެގްރީމެންޓުގައި ސޮއިކުރުމަށް] ދިއުމަށް ކުރެވޭ މަސައްކަތް،" ހަސަން ލަތީފް ވިދާޅުވި އެވެ.
ނަޝީދުގެ ފަރާތްޕުޅުން ހަސަން ލަތީފްގެ އިތުރުން ޖޭޕީއާ ބައްދަލުކުރައްވަނީ އެސްޓީއޯގެ މެނޭޖިން ޑައިރެކްޓަރު ކަމުން ވަކިކޮށްފައިވާ ހުސެއިން އަމްރުއާއި ރައީސް އޮފީހުގެ މިނިސްޓަރު ކަމުން މިއަދު ވަކިކޮށްފައިވާ އެމްޑީޕީގެ ނައިބު ރައީސް މުހައްމަދު ޝިފާޒެވެ.
އެކަމާ ގުޅިގެން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ހަސަން ލަތީފް ވިދާޅުވީ އެހެން ޕާޓީތަކާއެކު މަޝްވަރާ ކުރުމުގެ ބާރު ޕާޓީގެ ރައީސަށް އެމްޑީޕީގެ އަސާސީ ގަވައިދުން ދީފައިވާ ކަމަށެވެ.
"އެ ހުރިހާ ކަމެއް އޮންނަނީ އެމްޑީޕީގެ އަސާސީ ގަވައިދުގައި ރައީސަށް، އެހެންވީމާ އެމްޑީޕީގެ ރައީސަށް އެ މަސައްކަތް ނުކުރެވޭނެ ކަމަކަށް އަޅުގަނޑެއް ގަބޫލެއް ނުކުރަން،" ހަސަން ލަތީފް ވިދާޅުވި އެވެ.
އެކަމަކު ޖޭޕީއާއެކު ނަޝީދު އިސްވެ މިހާރު ކުރަމުންދާ މަސައްކަތްތަކަކީ އެމްޑީޕީއިން ކުރާ މަޝްވަރާތަކެއް ނޫން ކަމަށް އެ ޕާޓީގެ ޗެއާޕާސަން ފައްޔާޒް އިސްމާއީލް ވަނީ ވިދާޅުވެފަ އެވެ.
ޖޭޕީއަކީ މިހާރު ހިނގަމުންދާ ސަރުކާރުގެ ކޯލިޝަންގެ މެމްބަރަކަށްވި ނަމަވެސް ކުރިއަށް އޮތް ސެޕްޓެމްބަރު 9، ގައި ބާއްވާ ރިޔާސީ އިންތިހާބަށް ރައީސް ސޯލިހާއެކު ކޯލިޝަން ހަދަން އެ ޕާޓީން އެއްބަހެއް ނުވި އެވެ. އޭގެ ބަދަލުގައި ޖޭޕީން ނިންމީ އެ ޕާޓީ އިސްވެ އޮވެ ހަދާ ކޯލިޝަނަކުން ރިޔާސީ އިންތިހާބަށް ނިކުތުމަށެވެ.
ނަޝީދުގެ ފިކުރެއްގެ ދިރުން ނަމުގައި ހަރަކާތެއް ހިންގަން ފެށީ ވެރިކަން ހިންގާ އެމްޑީޕީގެ ރިޔާސީ ޕްރައިމަރީން ނާކާމިޔާބުވެވަޑައިގެންނެވި ފަހުންނެވެ. އެމްޑީޕީގެ ޕްރައިމަރީގައި ނަޝީދު 15،000 ވޯޓު ހޯއްދެވި އެވެ.
