އެންވައިރަމެންޓް މިނިސްޓްރީން ހުއްދަ ނަގައިގެން ރާއްޖެއަށް ކުނި އެތެރެކުރެވޭ ގޮތް ހެދުމަށް ކުނި މެނޭޖުކުރުމާ ބެހޭ ގާނޫނުގައި ހިމަނާފައިވާ މާއްދާ ބަދަލުކުރުމަށް ރައްޔިތުންގެ މަޖިލީހަށް ހުށަހަޅައިފި އެވެ.
ރައްޔިތުންގެ މަޖިލީހުގެ މިދިޔަ ދައުރުގައި ފާސްކޮށް، މިހާރު އަމަލު ކުރަމުން އަންނަ ކުނި މެނޭޖުކުރުމުގެ ގާނޫނުގެ 44 ވަނަ މާއްދާގައިވާ ގޮތުން، މިނިސްޓްރީގެ ހުއްދަނެތި އެއްވެސް ބާވަތެއްގެ ކުނި އެތެރެކުރުން މަނާ ވާނެ އެވެ. އަދި، ކުނި އެތެރެކުރުމުގެ ހުއްދައަށް އެދުމުން އެފަދަ ހުއްދައެއް ދޫކުރަން ވާނީ މިނިސްޓްރީން ހަދައި އާންމުކުރާ ގަވައިދެއްގެ ދަށުން ކަމަށް ބުނެފައިވެ އެވެ.
މި މާއްދާ އާ ގުޅިގެން ގިނަ ބައެއްގެ ކަންބޮޑުވުންތައް ހުރުމާއެކު، ބިލު ތަސްދީގު ކުރުމަށް ފަހު އެ މާއްދާ އިސްލާހު ކުރާނެ ކަމަށް އެއިރު އެންވައިރަމެންޓް މިނިސްޓްރީން ބުންޏެވެ.
މަޖިލީހުގެ މިއަދުގެ ޖަލްސާގައި ސަރުކާރުގެ ފަރާތުން ކޮމަންޑޫ ދާއިރާގެ މެންބަރު މުހައްމަދު ރާޝިދު ހުށަހެޅުއްވި ބިލުގައި ވަނީ ރާއްޖެއަށް އެއްވެސް ބާވަތެއްގެ ކުނި އެތެރެކުރުމަކީ މަނާ ކަމެއް ކަމުގައި ބަޔާންކޮށްފަ އެވެ.
މި އިސްލާހުގެ އިތުރުން ވެސް ބިލުގައި ވަނީ ބައެއް މާއްދާތަކަށް ކުދިކުދި ބަދަލު ގެންނަން ހުށަހަޅައިފަ އެވެ. އޭގެ ތެރޭގައި ރަށާއި ސިޓީ ފެންވަރުގައި ކުނި މެނޭޖުކުރުން އިންތިޒާމް ކުރާނެ ގޮތުގެ އުސޫލު ކަނޑައަޅާނެ މިންވަރު އިތުރު ކުރުން ހިމެނެ އެވެ. ކުރިން ހަ މަސް ދުވަހުގެ ތެރޭގައި ހަދަން ލާޒިމް ކޮށްފައި އޮތް އޮތުން މިހާރު ވަނީ އެއް އަހަރަށް އިތުރު ކުރަން ހުށަހަޅައިފަ އެވެ.
މައްސަލައިގެ ފަސްފަހަތް
ސަރުކާރުގެ ފަރާތުން މަޖިލީހަށް މި ބިލު ހުށަހެޅިއިރު، އެއްވެސް ފަރާތަކުން ރާއްޖެއަށް ކުނި އެތެރެކުރުމަކީ މަނާކަމެއްގެ ގޮތުގައި އޮތީ ބަޔާންކޮށްފަ އެވެ. އެ ބަދަލު ގެނެސްފައިވަނީ މަޖިލީހުގެ ކޮމިޓީ މަރުހަލާގަ އެވެ.
ބަދަލާ ގުޅިގެން ކޮމިޓީ ރިޕޯޓުގައިވާ ފާހަގަކޮށްފައިވާ ގޮތުގައި ދުނިޔޭގައި ގިނަ ގައުމުތަކަށް ކުންޏަކީ މިހާރު ވެސް ބޭނުންތެރި އެއްޗަކަށް ވެފައި، އޭގެއިން ހަކަތަ އުފެއްދޭނެކަން ވެސް ސާބިތުވާތީ އެވެ.
އަދި، ރާއްޖެއިން ވެސް އެކަމަށް ޕްލޭންތަކެއް ގެންގުޅޭއިރު، ރާއްޖެއިން އެފަދަ ބޭނުމަކަށް ބޭނުންވާ ކުނި ލިބުން ދަތިވެއްޖެ ހާލަތެއްގައި އެ ހުއްދަ އޮތުމަކީ މުހިންމު ކަމެއް ކަމަށް ކޮމިޓީން ދެކޭ ކަމަށް ބުނެފައިވެ އެވެ.
މިކަމާ މެދު ކަންބޮޑުވުން ފާޅުކޮށް ޒީރޯ ވޭސްޓް މޯލްޑިވްސް އާއި ސޭވް މޯލްޑިވްސް ކެމްޕެއިނުގެ އިތުރުން ޓްރާންސްޕޭރެންސީ މޯލްޑިވްސް ހިމެނޭހެން 17 ޖަމިއްޔާއަކުން ގުޅިގެން ނެރުނު ނޫސްބަޔާނެއްގައި ބުނީ އެއީ ސީރިއަސް ގައުމީ މައްސަލަތަކެއް ހިމެނޭ ބިލެއް ނަމަވެސް، ބިލު މަޖިލީހުގައި އޮތް ހަ މަސް ދުވަހުގެ ތެރޭގައި ތިމާވެއްޓާ ގުޅޭ އެއްވެސް ޖަމިއްޔާއެއްގެ ހިޔާލާއި މަޝްވަރާ ހޯދާފައި ނުވާ ކަމަށެވެ.
