ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީން ކުރިއަށް އޮތް ރިޔާސީ އިންތިހާބުގައި ވަކިން ވާދަކުރަން ނިންމުމާ ގުޅިގެން އެ ޕާޓީ އަށް ނިސްބަތްވާ މެމްބަރުން ސަރުކާރުގެ މަގާމުތަކުން ވަކިކުރަންޖެހޭ ކަމަށް، ނުވަތަ ވަކިވާންޖެހޭ ކަމުގެ އަޑުތައް ވަނީ ގަދަވެފަ އެވެ.
އެ ސުވާލަށް އެމްޓީސީސީގެ މެނޭޖިން ޑިރެކްޓަރު އާދަމް އާޒިމް، އޭނާގެ އައިޑީ ކާޑު ނަންބަރު ވިދާޅުވުމަށް ފަހު ދެއްވީ މި ޖަވާބެވެ؛ "އަޅުގަނޑަކީ ޖުމްހޫރީ ޕާޓީގެ ދަފުތަރުގައި އޮތް މީހެއް ނޫން، ބައްލަވާ،" އޭނާ އިތުރަށް ވިދާޅުވީ "އިހުލާސްތެރިކަން އޮތީ ރައީސް (ސޯލިހު) އަށް" ކަމަށެވެ.
މި އަހަރުގެ ސެޕްޓެމްބަރު 9, ގައި ބާއްވާ ރިޔާސީ އިންތިހާބުގައި މަހުޖަނު ގާސިމް އިބްރާހިމްގެ ޖުމްހޫރީ ޕާޓީން ވާދަ ކުރަން ނިންމުމާ އެކު އެ ޕާޓީގެ އިސް ބައެއް ބޭފުޅުން ޕާޓީން ވަކިވަމުން ދާއިރު، އެ ޕާޓީގެ އެޑްވައިޒަރެއްގެ މަގާމުގައި ކުރިން ހުންނެވި އާޒިމް ވިދާޅުވީ އޭނާ އެމްޓީސީސީގެ މެނޭޖިން ޑިރެކްޓަރުގެ މަގާމަށް އައްޔަން ކުރެއްވީ ރައީސް އިބްރާހިމް މުހައްމަދު ސޯލިހު ކަމަށާއި، އިހުލާސްތެރިކަން ވެސް އޮތީ އެމަނިކުފާނަށް ކަމަށެވެ.
"މިވަގުތު އަޅުގަނޑު މި ހުރީ ރައީސް ސޯލިހު އައްޔަން ކުރެއްވި މަގާމެއްގައި. އެ މަގާމުގައި ހުރިހާ ހިނދެއްގައި އެ މަނިކުފާނުގެ ސިޔާސަތު ތަންފީޒުކުރަންޖެހޭ. އިހްލާސްތެރިކަން އޮންނަން ޖެހޭ،" އާޒިމް ވިދާޅުވި އެވެ.
ޖުމްހޫރީ ޕާޓީގެ މެމްބަރަކަށް އާޒިމް ނުވިޔަސް ކުރިން އޭނާއަކީ އެ ޕާޓީގެ ލީޑަރު ގާސިމް އިބްރާހިމްގެ އެޑްވައިޒަރެވެ. މިދިޔަ މަހު ބޭއްވި ކޮންގްރެސްއިން އަލަށް އިންތިހާބުކުރި ކައުންސިލްގެ އެއްވެސް މަގާމެއްގައި އާޒިމެއް ނެތެވެ. އަދި، އެ ޕާޓީގެ ހަރަކާތްތަކުގައި ކުރިން ވެސް އާޒިމް ނޫޅުއްވަ އެވެ.
ޖުމްހޫރީ ޕާޓީން ރިޔާސީ އިންތިހާބުގައި ވާދަކުރަން ނިންމުމާއެކު އެ ޕާޓީގެ ކުރީގެ ސެކްރެޓަރީ ޖެނެރަލް އަދި މިހާރު ރައީސް އޮފީހުގެ މިނިސްޓަރު އަހުމަދު ސަމީރު ވަގުތުން ޕާޓީން އިސްތިއުފާ ދެއްވި އެވެ.
ސަމީރު ވިދާޅުވީ އެ ޕާޓީގެ ލީޑަރު ގާސިމް އިބްރާހިމް އަށް އިންތިހާބު ކާމިޔާބު ކުރެއްވޭތަން ފެނިވަޑައިނުގަންނަވާ ކަމަށެވެ.
ސަމީރަށް ފަހު ޕާޓީން އިސްތިއުފާ ދެއްވީ އިމިގްރޭޝަން ކޮންޓްރޯލަ އަހުމަދު މުހައްމަދު (ހަނަފީ) އެވެ.
އޭނާ އިއްޔެ އިސްތިއުފާ ދެއްވީ ގާސިމްގެ އެޑްވައިޒަރުގެ މަގާމަށް އައްޔަނު ކުރިތާ އެއް ދުވަސް ނުވަނީހެވެ.
"ޖުމްހޫރީ ޕާޓީގެ ވިސްނުން މިވަގުތު ހުރި ގޮތުން އެއީ ދިވެހި ގައުމަށް އެންމެ ފައިދާ ހުރި ގޮތް ކަމަށް އަޅުގަނޑަށް ގަބޫލު ނުކުރެވޭތީ މިއަދުން ފެށިގެން ތިޔަ ޕާޓީން ވަކިވުމަށް ނިންމާފައިވާ ވާހަކަ ދަންނަވަމެވެ،" އޭނާގެ އިސްތިއުފާގެ ސިޓީގައި ވިދާޅުވެފައިވެ އެވެ.
ޖޭޕީގެ ސްލޮޓުގެ ގޮތުގައި މިނިސްޓަރުކަމުގައި ތިއްބެވީ ގާސިމްގެ އަނބިކަނބަލުން، ޓްރާންސްޕޯޓު މިނިސްޓަރު އައިޝަތު ނަހުލާ، ފިޝަރީޒް މިނިސްޓަރު ޑރ. ހުސައިން ރަޝީދު ހަސަން، އަދި ޓޫރިޒަމް މިނިސްޓަރު ޑރ. އަބްދުﷲ މައުސޫމެވެ. ސްޓޭޓު މިނިސްޓަރުންނާއި ޑެޕިއުޓީ މިނިސްޓަރު އަދި ސިޔާސީ އެހެން މަގާމުތަކުގައި ވެސް ޖޭޕީގެ މެމްބަރުން އެބަ ތިއްބެވި އެވެ.
