ސިއްހީ ދުޅަހެޔޮކަމާ ނުލައި ތަރައްގީ ހާސިލު ނުވާނެ ކަމަށާއި އިގްތިސާދީ ގޮތުން ވިޔަސް އަދި އިޖްތިމާއީ ގޮތުން ވިޔަސް ތަރައްގީގެ ކުލަތައް ފެންނަން ފަށާނީ، އެތަނެއްގައި ދިރިއުޅޭ ރައްޔިތުންނަށް ދުޅަހެޔޮ ސިއްހަތެއް ލިބިގެން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް ވިދާޅުވެއްޖެ އެވެ.
ރައީސް މި ފަދައިން ވިދާޅުވީ ސަރުކާރުގެ ފަރާތުން ރަސްމީ ގޮތެއްގައި ހޮސްޕިޓަލެއްގެ ހިދުމަތް ދޭން ފެށިތާ 75 އަހަރު ފުރޭ މުނާސަބާ ފާހަގަކުރުމުގެ ގޮތުން ރޭ ބޭއްވި ހަފުލާގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ އަބަދުވެސް ގާބޫލުކުރާ، ވަރަށް މުހިންމު ފަލްސަފާއެއް އޮންނަ ކަމަށާއި އެއީ ސިއްހީ ދުޅަހެޔޮކަމާ ނުލައި ތަރައްގީ ހާސިލު ނުވާނެކަން ކަމަށެވެ.
އަދި, އިގްތިސާދީ ގޮތުން ވިޔަސް އަދި އިޖްތިމާއީ ގޮތުން ވިޔަސް ތަރައްގީގެ ކުލަތައް ފެންނަން ފަށާނީ، އެތަނެއްގައި ދިރިއުޅޭ ރައްޔިތުންނަށް ދުޅަހެޔޮ ސިއްހަތެއް ލިބިގެން ކަމަށް ރައީސް ވިދާޅުވިއެވެ.
"އަޅުގަނޑުމެންގެ ތެރެއިން ވަރަށް ގިނަ ބަޔަކަށް ސިއްހީ ދުޅަހެޔޮކަން މާނަކުރެވިފައި އޮންނަނީ، ހަމައެކަނި ޖިސްމާނީ ހަށިހެޔޮކަމުގެ ގޮތުގައި. ނަމަވެސް، ސިއްހީ ދުޅަހެޔޮކަމުގެ ދާއިރާ އެއަށްވުރެ މާ ފުޅާ. ނަފްސާނީ ދުޅަހެޔޮކަމަކީ، އޭގެ ތެރެއިންވެސް ވަރަށް މުހިންމު ދާއިރާއެއް،" ރޭގެ ޖަލްސާގައި ރައީސް ސޯލިހު ވިދާޅުވި އެވެ.
އެގޮތުން، 1948 ވަނަ އަހަރު މާލޭގައި، ހުޅުވި "ޑަކްޓަރު ގެ" އާއެކު ދިވެހިންގެ ދިރިއުޅުމަށާއި އިގްތިސާދަށް ބޮޑު ބަދަލެއް އައިކަން ފާހަގަކުރައްވައި ރައީސް ވިދާޅުވީ އެއީ ރާއްޖޭގެ ތަރައްގީއަށް ލިބުނު ވަރަށް ބޮޑު ދިރުމެއް ކަމަށެވެ.
އަދި، ސިއްހީ ހިދުމަތަކުގެ ފެންވަރުމަތިވެ، ޒަމާނީވެގެން ދިއުމުގައި އަމިއްލަ ފަރާތްތަކާއި މާލެއާ ރަށްރަށުގެ ހޮސްޕިޓަލްތަކާއި ކްލިނިކުތަކާއި ސިއްހީ މަރުކަޒުތަކުން އަދާކުރަމުން އަންނަ މުހިންމު ދައުރުގެ މައްޗަށް ވެސް އެމަނިކުފާނު އަލިއަޅުވާލެއްވި އެވެ.
"އަޅުގަނޑުމެން މަސައްކަތް ކުރަންވީ، ފުރިހަމަ ސިއްހީ ދުޅަހެޔޮކަމެއްގެ މަތީގައި ދެމި ތިބުމަށް. ސަމާލުކަން ދޭންވީ ބަލިވުމުން ބޭސްކުރަން ތިބުމުގެ އާދަ ދޫކޮށް، ބަލިވުމުގެ ކުރިން ބަލިތަކުން ރައްކާތެރިވެ ތިބުމަށް ގަދައަޅައި މަސައްކަތް ކުރުމަށް," ރައީސް ވިދާޅުވި އެވެ.
ސިއްހީ ދާއިރާގެ ތަރައްގީއަށް ކުރަމުންގެންދާ މަސައްކަތްތަކުގެ ތެރޭން، ރާއްޖޭގެ ފަސް ސަރަހައްދެއްގައި ފަސް ޓާޝަރީ ހޮސްޕިޓަލް ތަރައްގީވަމުން އަންނައިރު ރާއްޖޭގެ އެކި ރަށްރަށުގައި 50 އެނދުގެ ހަ ހޮސްޕިޓަލާއި 30 އެނދުގެ 12 ހޮސްޕިޓަލް ސަރުކާރުން އަންނަނީ ތަރައްގީކުރަމުން ކަމަށް ރައީސް ވިދާޅުވި އެވެ.
ސިއްހީ މަރުކަޒުތަކާ އެކު މުޅި މި ދާއިރާ ތަރައްގީވެގެން އަންނައިރު، ސިއްހީ އިތުރު ހިދުމަތްތަކާއި ވަޒީފާގެ އިތުރު ފުރުސތުތައް ތަނަވަސްވެގެންދާނެ ކަމަށް ވެސް ރައީސް އެމަނިކުފާނު ވިދާޅުވި އެވެ.
ރޭގެ އެ ހަފުލާގައި، ރައީސް ވަނީ ސާޅީސް އަހަރަށް ވުރެ ދިގު މުއްދަތަކަށް ސިއްހީ ދާއިރާގައި ހިދުމަތް ކުރެއްވި އަށް ބޭފުޅުންނަށް ހަނދާނީ ލިޔުމާއި ފިލާ ހަވާލުކޮށްދެއްވާފަ އެވެ.
