ރައްޔިތުންގެ މަޖިލީހުގެ ރިޔާސަތު އިޝާރާތުން ގެންދިއުމަކީ އަމާޒަކަށް ނުވާންވީ އެއްވެސް ސަބަބެއް ނެތް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ އިދާރާގެ މުވައްޒަފުންނަށް އިޝާރާތް ބަސް ދަސްކޮށްދިނުމުގެ ވޯކްޝޮޕް ހުޅުވުމުގެ ރަސްމިއްޔާތު ފައްޓަވައިދެއްވަމުން ނަޝީދު މިއަދު ވިދާޅުވީ މަޖިލީހުގެ ޖަލްސާތައް ހަމައެކަނި އިޝާރާތުން ބަލާ މީހުން އުޅޭ ކަމަށާއި އެ ބަސް އެމަނިކުފާނު ވެސް ދަސްކުރަން ޖެހިފައިވާ ކަމަށެވެ.
"ރިޔާސަތު އެ ބަހުން އިޝާރާތުން ބެލެހެއްޓޭނެ ކަމަކަށް އަޅުގަނޑަކަށް ނުދެންނެވޭނެ، އެހެންނަމަވެސް އެއީ އަމާޒަކަށް ނުވާންވީ ސަބަބެއް ނެތް،" ނަޝީދު ވިދާޅުވި އެވެ.
މަޖިލީހުގައި މިހާރު އިޝާރާތުގެ ބަހުން ޖަލްސާތައް ކިޔައިދެނީ މަރިޔަމް ފަޒްނީ އެވެ.
މަޖިލީހުން ތަޅުން ބެލެހެއްޓުމާއި ހިނގަމުން އަންނަ ކަންކަން ރައްޔިތުންނަށް ފޯރުކޮށްދިނުމަކީ ފަސޭހަ ކަމެއް ނޫން ކަން ފާހަގަކުރައްވައި ނަޝީދު ވިދާޅުވީ އިތުރު މީހުން ތަމްރީނުކޮށް، "މަރްޔަމްއަށް ވެސް ލުޔެއް ދޭން" ޖެހޭ ކަމަށެވެ.
އަދި، އެ ބަހުން ވާހަކަ ދައްކާނެ ގިނަ ބަޔަކު ތަމްރީނު ކުރުމަކީ ބޭނުންތެރި ކަމެއްގެ ގޮތުގައި ނަޝީދު ފާހަގަކުރެއްވި އެވެ.
ރާއްޖޭގެ 10 އިންސައްތައަކީ ނުކުޅެދުންތެރިކަން ހުންނަ މީހުން ކަން ފާހަގަކުރައްވައި އެމަނިކުފާނު އިތުރަށް ވިދާޅުވީ ތަންފީޒު ކުރެވޭ ކޮންމެ ސިޔާސަތެއްގެ އިތުރުން ހިންގޭ ހަރަކާތްތަކުގައި ރާއްޖޭގެ ހުރިހާ ރައްޔިތުން ބައިވެރިކުރުމަކީ އަމާޒަކަށް ހަދަން ޖެހޭ ކަމަށެވެ.
