މާލޭގެ މަގުތަކާ ގޯޅިތަކުގެ ފާރުތަކުގައި ކުރަހާފައިވާ ގްރެފިޓީތައް ފުހެ ސާފުކުރުމުގެ މަސައްކަތް، މާލެ ސިޓީ ކައުންސިލުން ފުލުހުންނާއި ގުޅިގެން އަނެއްކާ ވެސް ފަށައިފި އެވެ.
އެގޮތުން، ސިޓީ ކައުންސިލުން ސޯޝަލް މީޑިއާގައި އާންމުކޮށްފައިވާ ފޮޓޯތަކުން ފެންނަ ގޮތުން ފާރުތަކުގައި ހުރި ލިޔުންތަކާއި ކުރެހުންތަކުގެ މަތީގައި ކުލަލާ ފުހުމުގެ މަސައްކަތް ސިޓީ ކައުންސިލްގެ މުވައްޒަފުން ދަނީ ކުރަމުންނެވެ.
މި މަސައްކަތުގެ އިތުރު ތަފުސީލެއް ދެ އިދާރާއިންވެސް މިހާތަނަށް ދީފައެއް ނުވެ އެވެ.
ގްރެފިޓީތައް ފުހުމުގެ މަސަައްކަތް ސިޓީ ކައުންސިލްގެ މުވައްޒަފުން ކުރަމުން އަންނަ އިރު، އެ ސަރަހައްދުތަކުގެ ސަލާމަތީ ކަންތައްތައް ފުލުހުން ބަލަަހައްޓަ އެވެ.
މާލޭގެ މަގުތަކާއި ހަނިގޯޅިތަކުގައި ވަރަށް ގިނަ ގްރެފިޓީތައް އެބަހުއްޓެވެ. އޭގެ ތެރޭގައި ގޭންްގްތަކުގެ ގްރެފިޓީތައް ކަމަށް ބެލެވޭ ގްރެފިޓީއާއި ސިޔާސީ ގްރެފިޓީ ވެސް ހިމެނެ އެވެ.
މިފަދައިން ހުންނަ ކުރެހުންތަކާއި ލިޔުންތައް ފުހުމަކީ ފުލުހުން އާންމުކޮށް ހިންގާ މަސައްކަތެކެވެ. އެގޮތުން އާންމުކޮށް މާލޭގައި އޮންނަ ގޭންގުތަށް ހަރަކާތްތެރިވާ ސަރަހައްދުތަކުގައި ހުންނަ ލިޔުންތަކާއި ކުރެހުންތައް ފުހުމުގެ މަސައްކަތް ފުލުހުން މީގެ ކުރިންވެސް ވަނީ ކޮށްފަ އެވެ.
މި ފަހުން މާލޭގައި ހިނގި ސިލްސިލާ މާރާމާރީތަކާއި ގުޅިގެން ފުލުހުން ވަނީ ހަތަރު ގޭންގަކާއި ދެކޮޅަށް އޮޕަރޭޝަނެއް ހިންގާ 20 އަށްވުރެ ގިނަ މީހުން ހައްޔަރުކޮށްފަ އެވެ.
