ރައްޔިތުންގެ މަޖިލީހުގެ ރައީސް މުހައްމަދު ނަޝީދު، ތަޅުމުގައި ހިނގަމުންދާ ބަހުސްގައި ބައިވެރިވާ ކަމަށް ބުނާ ވާހަކައަށް އެމަނިކުފާނު ރައްދު ދެއްވައިފި އެވެ.
ރައްޔިތުންގެ މަޖިލީހުގެ ގަވައިދުގެ ދެ ވަނަ މާއްދާގައިވާ ގޮތުގައި މަޖިލީހުގެ ތަޅުމުގައި ހިނގަމުންދާ އެއްވެސް ބަހުސެއްގައި މަޖިލީހުގެ ރައީސް ބައިވެރިވެ، ހިޔާލުފާޅުކުރުމަކީ ކޮށްގެން ވާނެ ކަމެއް ނޫނެވެ.
މަޖިލީހުގެ ގަވައިދަށް ހުށަހަޅާފައިވާ އިސްލާހަކަށް ބަހުސް ކުރައްވަމުން ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީގު ވިދާޅުވީ، މަޖިލީހުގެ ގަވައިދުގައި ހައްލު ކުރަން ޖެހޭ ވަރަށް ގިނަ ކަންކަން އެބަހުރި ކަމަށާއި އޭގެ ތެރޭގައި މަޖިލީހުގެ ރައީސް ބަހުސްގައި ބައިވެރިވާ މައްސަލަ ހިމެނޭ ކަމަށެވެ.
"މަޖިލީހުގެ ރައީސަށް ބަހުސްގައި ބައިވެރިވެވޭނެ ގޮތަށް ގަަވައިދު ބަދަލުކުރުމަކީ ވެސް މައްސަލައެއް ނޫން، އެހެންނަމަވެސް ގަވައިދުގައި މިހެން އޮވެ އެގޮތަށް ކަން ކުރައްވަންޏާ އެ ދަނީ އެންމެ ރަނގަޅަކަށް ނޫން،" އޭނާ ވިދާޅުވި އެވެ.
މުހައްމަދު އަބްދުﷲ ޝަފީގުގެ ވާހަކައަށް ފަހު، ރިޔާސަތުގައި އިންނެވި ނަޝީދު ވަނީ ގަވައިދުގައި މަޖިލީހުގެ ރައީސްގެ ހިޔާލާއި މަޝްވަރާއާއި ލަފާ ދެވޭނެ ކަމަށް އޮންނަ ކަމަށެވެ.
"އަޅުގަނޑަށް އެއްވެސް ދުވަހެއްގައި ފާހަގައެއް ނުވޭ އަޅުގަނޑު ބަހުސެއްގައި ބައިވެރިވާތަނެއް، އަނގައިން އެއްޗެއް ބުނުމަކީ ބަހުސްގައި ބައިވެރިވުން ކަމަށް އަޅުގަނޑު ހިތުން ދެކުން އެއީ ރަނގަޅު ގޮތަކަށް ނުވާނެ،" ނަޝީދު ވިދާޅުވި އެވެ.
titledesc
ނަޝީދު ވިދާޅުވީ ގިނަ ފަހަރަށް އެ ގޮތަށް ހިޔާލެއް ހިއްސާ ކުރައްވާފައި ހުންނާނީ ތާރީހީ ނަޒަރަކުން ކަމަށާއި އެއީ ބަހުސާ އެއްގޮތަކަށް ވެސް ގުޅުން ހުރި ވާހަކަތަކެއް ނޫން ކަމަށެވެ.
މަޖިލީހުގައި ސަރުކާރަށް ތާއީދުކުރާ މެންބަރުންނާއި ރިޔާސަތަށް ނުރުހޭ މެންބަރުން ތިއްބެވި ނަމަވެސް އަބަދުވެސް މަސައްކަތް ކުރައްވާނީ މަޖިލީހުގެ އަސާސްތައް މެދުވެރިކޮށް ސަރުކާރު ޖަވާބުދާރީ ކުރުވުމާއި ގާނޫނު ހެދުމަށް ކަމަށް ވިދާޅުވި އެވެ.
"އެކަންކަމަށް މަގުފަހި ކުރުވާއިރު އަޅުގަނޑު އެއްޗެތި ބުނާނެ، އެހެންނަމަވެސް އިއްޒަތްތެރި މެންބަރުން ބައްލަވާލައިފިނަމަ އެއީ އަޅުގަނޑު ބަހުސްގައި ބައިވެރިވެ ދައްކާ ވާހަކައެއް ނޫން ކަން ސާފުވެވަޑައިގަންނަވާނެ،" ނަޝީދު ވިދާޅުވި އެވެ.
