ކުރީގެ ރައީސް އަބްދުﷲ ޔާމީންގެ މައްޗަށް ރިޝްވަތާއި މަނީ ލޯންޑަރިންގެ މައްސަލައިގައި އެމަނިކުފާނުގެ މައްޗަށް ހުކުމްކުރި ފަހުން އިއްޔެ، ކްރިމިނަލް ކޯޓުން 3،413،230 ޑޮލަރު (53 މިލިއަން ރުފިޔާ) ހަ މަސް ދުވަހުގެ ތެރޭގައި ދައްކަން ކުރި އަމުރާމެދު ޔާމީނުގެ ވަކީލުން ކަންބޮޑުވުން ފާޅުކޮށްފި އެވެ.
އެގޮތުން ޔާމީނުގެ ވަކީލުންގެ ޓީމުގައި ހިމެނޭ އަބްދުﷲ ޝިޔާޒް ވިދާޅުވީ މައްސަލައެއްގައި ހުކުމްކޮށް ނިމުމުން އެ މައްސަލައެއްގައި ފަނޑިޔާރުގެ އިހުތިސާސް ނިމި ދިޔައީ ކަމަށެވެ. އަދި، ދެން އެ ހުކުމުގައި ހުރި އުނިކަމެއް ފޫބެއްދުމަށް އިތުރު އަމުރުތަކާއި، އިތުރުކުރުންތައް ވެގެންދާނީ ގައިރު ދުސްތޫރީ އަމަލުތަކެއްކަން އޭނާ ފާހަގަ ކުރެއްވި އެވެ.
މީގެއިތުރުން، ޔާމީނުގެ އިސް ވަކީލު ޑރ. މުހައްމަދު ޖަމީލު އަހުމަދު "އަދަދު" އަށް ވިދާޅުވީ މިއީ ސީދާ ރައީސް އިބްރާހިމް މުހައްމަދު ސޯލިހު ވިދާޅުވެގެން ކޮށްފައިވާ އަމުރެއް ކަމަށެވެ.
"މިއީ ހަމަ ސަރުކާރުން، އިބްރާހިމް މުހައްމަދު ސޯލިހު ވިދާޅުވެގެން އެގޮތައް ކަންތައް ކުރައްވަން (ކުރި އަމުރެއް)،" ޖަމީލް ވިދާޅުވި އެވެ.
ވ. އާރަށް ކުއްޔަށް ދިން މައްސަލާގައި ދައުލަތުން، މަނީލޯންޑަރިން އާއި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުން، އަނބުރާ ހޯދުމަށް އެދިފައިވަނީ ލޯންޑާކުރި ކަމަށް ތުހުމަތުކުރާ އެއް މިލިއަން ޑޮލަރާއި އެ ފައިސާއާ އެއްކޮށްފައިވާ ދެ މިލިއަނަށްވުރެ ގިނަ ޑޮލަރު އިންވެސްޓްކޮށްގެން ޔާމީނަށް ލިބުނު ފައިސާ އެވެ.
ވ. އާރަށް ކުއްޔަށް ދިން މައްސަލައިގައި ރިޝްވަތު ހިފުމާއި މަނީލޯންޑަރިންގެ ކުށް ސާބިތުވެ ޔާމީންގެ މައްޗަށް ކުރީ 11 އަހަރުގެ ޖަލު ހުކުމެކެވެ. އެ ހުކުމް މި މަހުގެ 21 ގައި ޔާމީނުގެ ވަކީލުން ވަނީ ހައި ކޯޓުގަައި އިސްތިއުނާފުކޮށްފަ އެވެ. ވަކީލުންގެ ޓީމުގެ އަމާޒަކީ އަންނަ މަހުގެ ތެރޭގައި އިސްތިއުނާފީ މައްސަލަ ނިންމާ ޔާމީން މިނިވަންކުރުމެވެ.
އިދިކޮޅުގެ ރިޔާސީ ޓިކެޓު ޔާމީނަށް އަރުވާފައިވީ ނަމަވެސް މި ހުކުމުގެ ސަބަބުން މިވަގުތު ޔާމީނަށް މި އަހަރުގެ ރިޔާސީ އިންތިހާބުގައި ވާދައެއް ނުކުރެއްވޭނެ އެވެ. ސަބަބަކީ ރައީސުލްޖުމްހޫރިއްޔާގެ ޝަރުތުތަކުގެ ގޮތުގައި ގާނޫނީ އަސާސީގައި ބަޔާންކޮށްފައި އޮންނަ އެއް ޝަރުތަކީ، ޖިނާއީ ކުށެއްކުރި ކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވާން ޖެހުމެވެ.
އާރަށު މައްސަލަ އިސްތިއުނާފު ކޮށްފައިވާއިރު، ޔާމީނުގެ މައްޗަށް ތުހުމަތުކުރާ މަނީ ލޯންޑަރިން އަދި ރިޝްވަތުގެ އިތުރު މައްސަލައެއްގެ އަޑުއެހުންތައް އަންނަ މަހަށް ކްރިމިނަލް ކޯޓުގައި ވަނީ ތާވަލުކޮށްފަ އެވެ. އެގޮތުން ރ. ފުއްގިރި ކުއްޔަށް ދޫކުރުމުގެ ތެރެއިން ހިންގި ކަމަށް ބުނާ ހިޔާނާތުގެ މައްސަލާގެ އިފްތިތާހީ ބަޔާން އިއްވުމުގެ އަޑުއެހުން އަންނަ މަހުގެ ނުވަ ވަނަ ދުވަހަށް ވަނީ ތާވަލުކޮށްފަ އެވެ.
