އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި އެމްޑީޕީއާއެކު ކޯލިޝަން ހެދުމަށް އެމްޑީއޭ އިއްޔެ ނިންމި އެވެ.

މިއީ އެމްޑީޕީއާއެކު ކޯލިޝަން ހަދަން ނިންމި ދެ ވަނަ ޕާޓީއެވެ. އަދާލަތު ޕާޓީން ވެސް ވަނީ މިހާރު އޮތް ކޯލިޝަން ދެމެހެއްޓުމަށްޓަކައި އެމްޑީޕީއާއެކު 2023 އަށް އެކުގައި ނުކުތުމަށް ނިންމައިފަ އެވެ.

މީދޫ ދާއިރާގެ މެންބަރު އަދި ވިޔަފާރިވެރިޔާ އަހުމަދު ސިޔާމް މުހައްމަދުގެ އެމްޑީއޭއިން އެމްޑީޕީއާއެކު 2023 ގައި އެއް ކޯލިޝަނެއްގެ ގޮތުގައި ނުކުތުމަށް މިހާރު އޮތް ސިޔާސީ ހަމަޖެހުން ދެމެހެއްޓުމަށާއި، ދިވެހިރައްޔިތުންގެ ލާބަޔާ މަންފާއަށް ކަމަށް އެ ޕާޓީން ބުނެ އެވެ.

"ދިވެހިރާއްޖޭގެ ޕޮލިޓިކަލް ސްޓެބިލިޓީ ގާއިމް ކުރުމަށް ޓަކައި އެމްޑީއޭގެ ކައުންސިލް މީޓިން އިން މިއަދު ނިންމާފައި ވަނީ ރައީސް އިބްރާހިމް މުހައްމަދު ސޯލިހަށް އިތުރު ދައުރެއް ދިނުމަށް މަސައްކަތް ކޮށްދިނުމަށް،" އެ ޕާޓީން ބުނެފައިވެ އެވެ.

އެމްޑީއޭއިން އެމްޑީޕީއާއެކު ކޯލިޝަން ހެދުމުގެ ކުރިން ވަނީ އެމްޑީޕީއާއި ޕީޕީއެމްއާއެކުގައި ވެސް ކޯލިޝަންގެ މަޝްވަރާތައް ކޮށްފަ އެވެ. ޕީޕީއެމްގެ މަޝްވަރާތަކަކީ އެ ޕާޓީގެ ރިޔާސީ ކެންޑިޑޭޓު އަބްދުﷲ ޔާމީން އަބްދުލްގައްޔޫމްގެ އެދުމުގެ މަތީން ކުރި މަޝްވަރާ އެކެވެ.

އެމްޑީއޭއިން 2013 ވަނަ އަހަރުގެ އިންތިހާބަށް ނުކުތީ ޕީޕީއެމްގެ ކޯލިޝަން ޕާޓުނަރެއްގެ ގޮތުގަ އެވެ. އަދި، 2014 ގެ މަޖިލިސް އިންތިހާބުގައި ވެސް އެމްޑީއޭއިން ވާދަކުރީ ޕީޕީއެމްއާ އެކު ކޯލިޝަން ހަދައިގެންނެވެ. އެންމެ ފަހުން ބޭއްވި 2018 ވަނަ އަހަރުގެ އިންތިހާބުގައި އެޕާޓީއިން އެއްވެސް ކެނޑިޑޭޓަކަށް ތާއީދެއް ނުކުރެ އެވެ.

މުހިންމު ބައެއް ހަބަރު

• އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި އެމްޑީޕީއާއެކު ކޯލިޝަން ހެދުމަށް މީދޫ ދާއިރާގެ މެމްބަރު އަދި ވިޔަފާރިވެރިޔާ އަހުމަދު ސިޔާމް މުހައްމަދުގެ އެމްޑީއޭއިން މިއަދު ނިންމުމާ ގުޅިގެން ރައީސް އިބްރާހިމް މުހައްމަދު ސޯލިހާއި އެމްޑީޕީން އެކަމަށް މަރުހަބާ ކިޔެވެ.

• ކުރީގެ ރައީސް އަބްދުﷲ ޔާމީންއާއެކު މޯލްޑިވްސް ޑިމޮކްރެޓިކް އެލަޔަންސްއިން ހެދި ކޯލިޝަން އެއްބަސްވުމުގެ ދަށުން އެ ޕާޓީއަށް ލިބެން ޖެހޭ 10 ޕަސެންޓު ވެސް ނުލިބޭ ކަމަށް ބުނެފި އެވެ.

• ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ކުރިމަތިލާން ޖެހުނު "ހިތްދަތި" ހަނދާންތައް އާ ކުރައްވައި، އެ ދުވަސްވަރު އެންމެ ގާތުން އެހީތެރިވެދެއްވީތީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް، ޖުމްހޫރީ ޕާޓީގެ ލީޑަރު ގާސިމް އިބްރާހިމް ޝުކުރު އަދާކުރެއްވި އެވެ.

• ކޮންމެ ބަޔަކު ވެސް ވެރިކަމަށް އަންނަނީ ޖުމްހޫރީ ޕާޓީއާއެކުގައި ނަމަވެސް ވެރިކަން ހިންގުމުގައި އެ ޕާޓީ ބައިވެރި ނުކުރާ ކަމަށް އެ ޕާޓީގެ ލީޑަރު އަދި މި ސަރުކާރުގެ ކޯލިޝަން ބައިވެރިޔާ ގާސިމް އިބްރާހިމް މިއަދު ވިދާޅުވެއްޖެ އެވެ.

• މޫނު ނިވާ ކޮށްގެން ތިބި ދެ މީހަކު ހުޅުމާލޭގައި ހުރި ކެފޭއަކަށް ވަދެ ބޮޑެތި ގެއްލުންތަކެއް ދީފި އެވެ.

• މާފަންނު ބީޖީ ގަރާޖު ކައިރީ ހުރި ފިހާރައެއްގެ ތެރޭ މާރާމާރީ ހިންގާ މީހަކު ޒަހަމްކޮށްލައިފި އެވެ.

ދުވަހުގެ ކޯޓޭޝަން

ރާއްޖެއަށް ޑިމޮކްރަސީ ގެނައުމާއި އިސްލާހީ މަސައްކަތްތަކުގައި އޭނާ އާއި އެމްޑީޕީގެ ރައީސް މުހައްމަދު ނަޝީދު ވާނީ މުހިންމު މަސައްކަތްތަކެއް ކުރައްވާފައި ކަމަށާއި އެކަންކަމުގައި ބޮޑެތި އަނިޔާތައް ލިބިފައިވާކަން ފާހަގަ ކުރައްވައި، ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހިމް ވިދާޅުވީ،

ރައީސް ނަޝީދާއި އަޅުގަނޑަކީ ވަރަށް ބުރަ މަސައްކަތެއް މި ކަމުގައި ކޮށް ވަރަށް ބޮޑެތި އަނިޔާ އާއި ވޭން ވަރަށް ބޮޑެތި ނިކަމެތިކަމާއި އިހުސާސްތައް ލިބިފައިވާ ދެ ބޭފުޅުން،"

ދުވަހުގެ ފޮޓޯ

ޖުމްހޫރީ ޕާޓީގެ ކޮންގްރެސް ފެށުމަށް އިއްޔެ ދަރުބާރުގޭގައި ބޭއްވި ޖަލްސާގައި އެ ޕާޓީގެ ލީޑަރު ގާސިމް އިބްރާހިމް އާއެކު، އެމްޑީޕީގެ ރައީސް މުހައްމަދު ނަޝިދު. -- ފޮޓޯ: ޖުމްހޫރީ ޕާޓީ