"އެންހޭންސިން ނޭޝަނަލް ޑިވެލޮޕްމަންޓް ތުރޫ އެންވަޔަރަންމަންޓަލީ ރެޒިލިއެންޓް އައިލެންޑްސް"، އެންދެރި މަޝްރޫއުގެ ދަށުން ލ. އަތޮޅުގެ ރަށްތަކަށް ދޭ ކުދި މާލީ އެހީ ލިބޭ ނުވަ ރަށަކަށް އެކަމުގެ ލިޔުން ހަވާލުކޮށްފި އެވެ.
"އެންދެރި" އަކީ ރާއްޖޭގެ ރަށްރަށުގެ ގުދުރަތީ ރައުސްމާލު ވަޒަންކޮށް، މިވަސީލަތްތައް ދެމެހެއްޓެނިވި ގޮތެއްގައި ބޭނުންކުރެވޭނޭ ގޮތްތައް ކަނޑައަޅައި، މި ވަސީލަތްތަކުގެ މައްޗަށް ބަރޯސާވެފައިވާ ސިނާއަތްތަކާއި އާންމު ރައްޔިތުން މިކަންކަމަށް ހޭލުންތެރިކުރުވުމުގެ މަގުސަދުގައި 2021 ވަނަ އަހަރު އެކުލަވާލަފައިވާ ޕްރޮގްރާމެކެވެ.
މިދިޔަ އަންގާރަ ދުވަހު ލ. އަތޮޅު ވެރިކަން ކުރާ ފޮނަދޫގައި ބޭއްވި ރަސްމިއްޔާތެއްގައި އެހީ ލިބޭ ކަމުގެ ލިޔުން ހަވާލުކޮށްދެއްވައިފައިވަނީ ސްޓޭޓް މިނިސްޓަރު ޑރ. އަބްދުالله ނަސީރެވެ.
މި އެހީ ނުވަ ރަށެއްގެ މަދަނީ ޖަމިއްޔާ، އަންހެނުން ތަރައްގީއަށް މަސައްކަތްކުރާ ކޮމިޓީ އަދި ސްކޫލަކަށް ލިބިފައިވާ ކަމަށް އެންވައިރަމެންޓް މިނިސްޓްރީން ބުނެ އެވެ. މިނިސްޓްރީން ބުނާ ގޮތުގައި ސްމޯލް ގްރާންޓްގެ މި ބުރުގައި ހުށަހަޅާފައިވާ މަސައްކަތްތައް ކުރުމަށް ޖުމްލަ 1.8 މިލިއަން ރުފިޔާ ހަވާލުކުރާނެ އެވެ.
އެހީ ދޫކޮށްފައިވާ ދާއިރާތައް:
- ދަނޑުވެރިކަމުގެ އުފެއްދުންތައް ބާޒާރަށް ނެރެދިނުން
- ދިރޭތަކެތީގެ ނަސްލުތައް އާލާކުރުން
- ސުކޫލުކުދިންގެ މެދުވެރިކޮށް ހިންގޭ ސިޓިޒެން ސައެންސް ދިރުންތަކުގެ މާހައުލު އިއާދަކުރުން
- ތިމާވެއްޓާ ރައްޓެހި ދަނޑުވެރިކަން
އެންވައިރަމެންޓް މިނިސްޓްރީން މީގެ ކުރިން ބުނެފައިވާ ގޮތުގައި ލ. އަތޮޅުގެ މާހައުލީ ނިޒާމްތައް އިޔާދަކުރުމަށާއި، ވިލުން އިތުރުކުރުމަށް ބޭނުންވާނެ މައުލޫމާތާއި ޑޭޓާ މިޕްރޮޖެކްޓް ދަށުން ހޯދުމާއި، އީކޯ ސިސްޓަމް އެކައުންޓިން ސިސްޓަމެއް ގާއިމް ކުރުމަށް ބޭނުންވާ އެންމެހާ ކަންކަން މި ޕްރޮޖެކްޓުގެ ދަށުން ފުރިހަމަވާނެ އެވެ.
އަދި، ސަރުކާރުގެ ސްޓްރެޓީޖިކް އެކްޝަން ޕްލޭންގެ ޕޮލިސީތައް ތަންފީޒުކުރުމަށް އެހީވެދޭނެ ކަމަށް ވެސް މިނިސްޓްރީން ބުނެފައިވެ އެވެ.
މިނިސްޓްރީން އިތުރަށް ބުނި ގޮތުގައި ސްމޯލް ގްރާންޓުގެ އިތުރު ބުރެއް މި އަހަރު އިއުލާނު ކުރާނެ އެވެ.
