މިއަހަރުގެ ރިޔާސީ އިންތިހާބަށް އެއްވެސް ކެންޑިޑޭޓަކު ނުނެރުމަށް މަޝްހޫރު ވިޔަފާރިވެރިޔާ އަދި ދ. މީދޫ ދާއިރާގެ މެމްބަރު އަހްމަދު ސިޔާމް މުހައްމަދުގެ ޕާޓީ، މޯލްޑިވްސް ޑިވެލޮޕްމަންޓު އެލަޔަންސް (އެމްޑީއޭ) އިން ނިންމައިފި އެވެ.
އެމްޑީއޭގެ ނައިބު ރައީސް، އަލީ މައުރޫފް "އަދަދު" ނޫހަށް ވިދާޅުވީ މިއަދު ބޭއްވި ހާއްސަ ބައްދަލުވުމުގައި ނިންމާފައި ވަނީ ރިޔާސީ އިންތިހާބުގައި އެމްޑީއޭގެ ފަރާތުން ނުކުންނާނީ ކޯލިޝަން ޕާޓުނަރެއްގެ ގޮތުގައި ކަމަށެވެ. ނަމަވެސް, ކޯލިޝަން ހަދާނެ ވަކި ޕާޓީއެއް އަދި ނިންމާފައި ނުވާ ކަމަށް އޭނާ ވިދާޅުވި އެވެ.
އެމްޑީއޭއިން އެހެން ޕާޓީއަކާއެކު ކޯލިޝަން ހެދުމަށް ނިންމާފައި ވާއިރު، އިދިކޮޅު ޕީޕީއެމުން ވަނީ ކޯލިޝަން ހެދުމަށް އެދި އެޕާޓީއަށް ދައުވަތު ދީފަ އެވެ. އަނެއްކޮޅުން ރައީސް ސޯލިހު ވަނީ މިދިޔަ މަހުގެ ފަހުކޮޅު އެމްޑީއޭގެ ރައީސް އަދި ރައްޔިތުންގެ މަޖިލީހުގެ ދ. މީދޫ ދާއިރާގެ މެންބަރު، އަހުމަދު ސިޔާމް މުހައްމަދު (ސަން ސިޔާމް) އާ ބައްދަލުވެސް ކުރައްވާފަ އެވެ.
އެމްޑީއޭއިން 2013 ވަނަ އަހަރުގެ އިންތިހާބަށް ނުކުތީ ޕީޕީއެމްގެ ކޯލިޝަން ޕާޓުނަރެއްގެ ގޮތުގަ އެވެ. އަދި، 2014 ގެ މަޖިލިސް އިންތިހާބުގައި ވެސް އެމްޑީއޭއިން ވާދަކުރީ ޕީޕީއެމްއާ އެކު ކޯލިޝަން ހަދައިގެންނެވެ. އެފަހަރު އެ ޕާޓީން މަޖިލީހުގެ ފަސް ގޮނޑި ކާމިޔާބު ކުރި އެވެ.
އެއަށްފަހު ވެސް ޕީޕީއެމްއާ އެކު ތަފާތު އެކި މަސައްކަތްތައް ކުރުމަށްފަހު 2018 ވަނަ އިންތިހާބަށް ޕީޕީއެމްއިން ކުރިމަތިލީ އެމްޑީއޭގެ ތާއީދާ ނުލަ އެވެ. އެމްޑީއޭއިން އެ އިންތިހާބުގައި ރަސްމީކޮށް އެއްވެސް ކެންޑިޑޭޓަކަށް ތާއީދެއް ނުކުރެ އެވެ.
ރިޔާސީ އިންތިހާބުގެ ފޯރި އިންތިހާއަށް ގަދަވެފައި ވާއިރު، ސަރުކާރު ހިންގާ ކޯލިޝަން ޕާޓުނަރު، އަދާލަތުން ވަނީ އެ ކޯލިޝަން ދަމަހައްޓައި ރިޔާސީ އިންތިހާބުގައި ރައީސް ސޯލިހަށް ތާއީދު ކުރުމަށް ނިންމާފަ އެވެ.
ވެރިކަން ކުރާ ކޯލިޝަނުގެ އަނެއް ދެ ބައިވެރިން ކަމުގައިވާ ޖުމްހޫރީ ޕާޓީއާއި އެމްއާރުއެމުން އަދި ރިޔާސީ އިންތިހާބާ މެދު ވަކި ގޮތެއް ނިންމާފައެއް ނުވެ އެވެ. ޖުމްހޫރީ ޕާޓީން އިންތިހާބާ މެދު ގޮތެއް ނިންމާނީ މި ހަފުތާ ބަންދުގައި އޮންނަ ގައުމީ ކޮންގުރެސްގަ އެވެ.
ދެހާސްބާރަ ވަނަ އަހަރު ވުޖޫދު ކުރި އެމްޑީއޭއިން މިހައިތަނަށް އެއްވެސް އިންތިހާބަކަށް އެޕާޓީގެ ކެންޑިޑޭޓަކު ނެރެފައެއް ނުވެ އެވެ. މިއީ އެ ޕާޓީ ވުޖޫދު ކުރި ފަހުން ބާއްވާ ތިންވަނަ ރިޔާސީ އިންތިހާބެވެ.
