އޮންލައިންކޮށް، އޮރިޔާން ކާޑު އުފެއްދުމާއި ގެންގުޅުމާއި އާންމު ކުރުން ގާނޫނުލްއަގޫބާތުގައި ހިމަނަން ރައްޔިތުންގެ މަޖިލީހަށް ބިލެއް ހުށަހަޅައިފި އެވެ.
އިންޓަނެޓު މެދުވެރިކޮށް ހިންގާ ހުއްދަ ނޫން އަމަލުތަކަކީ ކުށް ކަމުގައި ކަނޑައެޅުމަށް ރައްޔިތުންގެ މަޖިލީހަށް މިއަދު ވަނީ ތިން ބިލެއް ހުށަހަޅައިފަ އެވެ. އެއީ ގާނޫނުލްއުގޫބާތަށް އިސްލާހު ގެނައުމުގެ ބިލަކާއި ޖިނާއީ މައްސަލަތަކުގައި ގާނޫނީ އެހީތެރިކަން ބަދަލުކުރުމުގެ ގާނޫނަށް އިސްލާހު ގެނައުމުގެ ބިލަކާއި ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ބިލެކެވެ.
މީގެ ތެރެއިން ގާނޫނުލްއުގޫބާތަށް އިސްލާހު ގެނައުމުގެ ބިލުގައި ވަނީ އިންޓަނެޓު މެދުވެރިކޮށް ކުރަމުން އަންނަ އަމަލުތައް ކުށުގެ ގޮތުގައި ކަނޑައަޅައިފަ އެވެ.
ބިލުގައި ބަޔާން ކުރާ މައިގަނޑު ކުށްތައް:
- ހުއްދަނެތި ކޮމްޕިއުޓާ ސިސްޓަމަކަށް އެކްސެސްވުން
- ހުއްދަނެތި ކޮމްޕިއުޓާ ޑާޓާއަށް ނުވަތަ ސިސްޓަމަކަށް އިންޓަފިއާވުން
- ނަހަމަ ގޮތުގައި ޑިވައިސްތައް ބޭނުން ކުރުން
- ސައިބާވަޔަލަންސްގެ އަމަލުތައް
- ކޮމްޕިއުޓަރާ ގުޅުންހުރި އޮޅުވާލުމުގެ މައްސަލަތައް
- ކޮޕީރައިޓާއި އެހެނިހެން ހައްގުތަކަށް އަރައިގަތުން
މީގެ ތެރެއިން ސައިބާ ވަޔަލަންސް ކުށްތަކުގެ ތެރޭގައި ވަނީ އޮންލައިން މެދުވެރިކޮށް، އޮރިޔާން ކާޑު ގެންގުޅުމާއި އާންމު ކުރުމަކީ ކުށެއްގެ ގޮތުގައި ބަޔާންކޮށްފަ އެވެ.
މިގޮތުން ކޮމްޕިއުޓާ ސިސްޓަމް ބޭނުން ކޮށްގެން ހިންގާ ކުޑަކުދިންގެ އޮރިޔާން ކާޑު ގެންގުޅުމުގެ އަމަލުތަކާއި ޖިންސީ އަމަލެއް ހިންގުމަށް ބިރު ދެއްކުމާއި މަޖުބޫރުކުރުވުމާއި ގެއްލުމެއް ދިނުމުގެ ނިޔަތުގައި އޮރިޔާން ކާޑު އާންމު ކުރުމުގެ އިތުރުން ސައިބާސްޓްރޯކް ކުރުމަކީ ކުށެއްގެ ގޮތުގައި ކަނޑައަޅާފަ އެވެ.
އެ ކުށްތަކަކީ ދެ އަހަރާއި ހަތަރު އަހަރާ ދެމެދުގެ މުއްދަތަކަށް ޖަލަށް ލެވޭނެ ކުށްތަކެވެ.
މިއަދު ހުށަހެޅި ޖިނާއީ އިޖުރާއަތުގެ ގާނޫނަށް އިސްލާހު ގެނައުމުގެ ބިލުގައި ވަނީ މިފަދަ ކުށްތައް ހުއްޓުވައި ފިޔަވަޅު އެޅުމަށް ގާނޫނު ތަންފީޒު ކުރާ ފަރާތްތަކަށް ލިބިދޭ ބާރުތައް ދީ، އެފަދަ ކުށްތައް ތަހުގީގުކޮށް ދައުވާ އުފުލުމުގައި އަމަލު ކުރާނެ އިޖުރާއީ އުސޫލުތައް ވަނީ ހިމަނައިފަ އެވެ. އެގޮތުން:
- ސަބްސްކްރައިބާ އިންފޮމޭޝަން އަދި ކޮމިއުނިކޭޝަން ޑާޓާ ރިޓެއިން ކުރުމާ ގުޅޭ އިޖުރާއަތްތައް
- ޓްރެފިކް ޑާޓާ ވަކި ވަރަކަށް ހާމަކުރުމަށް އެންގުމާ ގުޅޭ އިޖުރާއަތްތައް
- ކޮމްޕިއުޓާ ޑޭޓާއާއި ސަބްސްކްރައިބާ އިންފޮމޭޝަން ހޯދުމަށް ޕްރޮޑަކްޝަން އަމުރު ހޯދުމާއި އަމުރު ތަންފީޒު ކުރުމުގެ އިޖުރާއަތްތައް
- ރައްކާކޮށްފައިވާ ކޮމްޕިއުޓާ ޑޭޓާ ބަލާ ފާސްކުރުމާއި ހިފެހެއްޓުމުގެ އިޖުރާއަތްތައް
- ޓްރެފިކް ޑޭޓާ ރިއަލް ޓައިމްގައި ނެގުމުގެ ހުއްދަތައް ހިމެނެ އެވެ.
