ރ. ފުއްގިރި ކުއްޔަށް ދޫކުރުމުގެ ތެރެއިން ހިންގި ކަމަށް ބުނާ ހިޔާނާތުގެ މައްސަލާގައި, ދައުވާކޮށްފައިވާ ފަރާތްތަކުން އެދިފައިވާ ހެކި ރައްކާތެރިކުރުމުގެ އަމުރުތައް ނެރެދެވެން ނެތް ކަމަށް މައްސަލަ ބައްލަވާ ގާޒީ އަލީ ނަދީމް މިއަދު ނިންމަވައިފި އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ހިންގި އެމްއެމްޕީއާރުސީ ބޮޑު ހިޔާނާތުގެ ތެރޭގައި ހިމެނޭ ފުއްގިރި މުއާމަލާތުގެ މައްސަލާގައި ޔާމީނާއި މއ.ކުރިކީލަހިޔާ އަހުމަދު ކްރިކް ރިޒާގެ އިތުރަށް ސަން ކޮންސްޓްރަކްޝަން އެންޑް އިންޖިނިއަރިން އަދި ސަން އިންވެސްޓްމަންޓްގެ މައްޗަށް ދައުވާކޮށްފައިވެ އެވެ.
ޔާމީންގެ މައްޗަށް އުފުލާފައިވަނީ މަނީ ލޯންޑަރިންގެ ދައުވާ އަދި ރިޝްވަތު ގަބޫލުކުރުމުގެ ދައުވާ އެވެ. ރިޒާގެ މައްޗަށް ކުރަނީ މަނީ ލޯންޑަރިންގެ ދައުވާ އަދި ރިޝްވަތު ހިފުމުގައި މެދުވެރިއަކަށް ވުމުގެ ދައުވާ އެވެ. ސަންގެ ދެ ކުންފުނީގެ މައްޗަށް މަނީ ލޯންޑަރިންގެ ދައުވާ އުފުލާފައިވެ އެވެ.
މި މައްސަލާގައި ކްރިކް ރިޒާ އަދި ސަންގެ ދެ ކުންފުނީގެ ފަރާތުން ވެސް ހެކި ރައްކާތެރިކުރުމުގެ އަމުރަކަށް އެދިފައިވެ އެވެ. މިއަދު ބޭއްވި އަޑުއެހުމުގައި އެ ހެކި ރައްކާތެރިކުރަންވީ އަދި ދައުލަތަށް ސިއްރުކުރަންވީ ސަބަބެއް ކިޔައިނުދެވޭ ކަމަށް ގާޒީ ނަދީމް ވިދާޅުވި އެވެ.
ކްރިކް ރިޒާގެ ފަރާތުން ހެކި ރައްކާތެރިކުރުމުގެ އަމުރަކަށް އެދިފައިވަނީ، ތަހުގީގުގެ ބޭރުން އެސިސްޓެންޓް ކޮމިޝަނާ އޮފް ޕޮލިސް މުހައްމަދު ރިޔާޒު އެ މައްސަލާގައި ދައުވާކޮށްފައިވާ ކްރިކް ރިޒާއާ ބައްދަލުކޮށް ދައްކާފައިވާ ވާހަކަތަކުގެ އޯޑިއޯއެއް ސިއްރުކޮށްދިނުމަށެވެ.
ސަން އިންވެސްޓްމަންޓްން އެދިފައިވަނީ އެތެރޭގެ ތަހުގީގަކަށް އެ ކުންފުނީގެ ވެރިޔާ އަދި ދ. މީދޫ ދާއިރާގެ މެންބަރު އަހުމަދު ސިޔާމް ދިން ބަޔާނަކާއި، އެ ކުންފުނީގައި މަސައްކަތް ކޮށްފައިވާ ބިދޭސީ ބައެއް މީހުން ދީފައިވާ ބަޔާންތަކެއްގެ އިތުރަށް ޑިރެކްޓަރުންގެ ބޯޑުގެ ބައެއް ގަރާރުތަކަށް އެ އަމުރު ނެރެދިނުމަށެވެ.
ދައުލަތުން ވެސް ވަނީ ހެކި ރައްކާތެރިކުރުމުގެ އަމުރަކަށް އެދިފަ އެވެ. ނަމަވެސް ދައުލަތުން އެދުނު މިންވަރަށް އެ އަމުރު ނެރެދިނުމުގެ ބަދަލުގައި ގާޒީ ނިންމެވީ ޒާތީ މައުލޫމާތުތަކާއި ތަހުގީގަށް ހުރަސް އެޅޭ ފަދަ މައުލޫމާތުތައް އުނިކުރުމަށް ފަހު އެ ލިޔެކިޔުންތައް ދިފާއަށް ދޫކުރުމަށެވެ.
މާޗު މަހު ޝަރީއަތް ފަށަނީ، ލައިވްކޮށްދޭން ޔާމީން އެދުނު
މިއަދުގެ އަޑުއެހުން ނިންމައިލުމުގެ ކުރިން ގާޒީ ނަދީމް ވަނީ އިފްތިތާހީ ބަޔާން އިއްވުމާއި ދައުލަތުން ހުށަހެޅި ހެކިވެރިންގެ ހެކިބަސް ނަގާނެ ދުވަސްތަކުގެ ތާވަލެއް އަރުވައިފަ އެވެ.
އިފްތިތާހީ ބަޔާން އިއްވަން ތިން އަޑުއެހުމެއް ބޭއްވުމަށް ޝަރީއަތުން ނިންމި އެވެ. ދައުލަތާއި ސަންގެ ދެ ކުންފުނީގެ އިފްތިތާހީ ބަޔާނުގެ އަޑުއެހުން އޮންނާނީ މާޗު މަހު ނުވަވަނަ ދުވަހުގަ އެވެ. ރިޒާގެ ބަޔާން އިއްވުމުގެ އަޑުއެހުން މާޗު މަހު 12 އަދި ޔާމީންގެ ބަޔާން އިއްވުން މާޗު މަހު 13 ވަނަ ދުވަހުގަ އެވެ.
އިފްތިތާހީ ބަޔާން އިއްވުމުގެ އަޑުއެހުން އޮންނާނީ މި މަހުގެ ނުވަވަނަ ދުވަހު ކަމަށް ގާޒީ ވިދާޅުވި އެވެ. އެ ބަޔާނަކީ ޝަރީއަތް ފެށުމުގެ ގޮތުން ހުރިހާ ހަސްމުން އިއްވާ ބަޔާނެކެވެ. އޭގައި މައިގަނޑު ގޮތެއްގައި ފާހަގަކުރާނީ ކޮންމެ ބަޔަކު ވެސް ޝަރީއަތް ކުރިއަށް ގެންދިއުމަށް ރާވާފައިވާ ސްޓްރެޓެޖީ އެވެ.
އޭގެ ފަހުން ދައުލަތުން ހުށަހެޅި ހެކިވެރިންގެ ހެކިބަސް ނެގުމަށް މާޗު 16، މާޗު 20، މާޗު 22، މާޗު 26، މާޗު 27، މާޗު 28، މާޗު 29، އަދި މާޗު 30 ވަނަ ދުވަހު އަޑުއެހުން ބޭއްވުމަށް ނިންމާފައިވެ އެވެ.
ޔާމީންގެ އިސް ވަކީލު، ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވަނީ ޝަރީއަތް ލައިވްކޮށްދެއްވުމަށް އެދިވަޑައިގެންފަ އެވެ. މީގެ ކުރިން ވެސް ޔާމީންގެ މައްޗަށް ހިންގި ޝަރީއަތްތައް، އެމަނިކުފާނު އެދިގެން ކްރިމިނަލް ކޯޓުން ލައިވްކޮށްފައިވެ އެވެ.
މައްސަލައިގެ ފަސްފަހަތް
ދައުލަތުން ތުހުމަތުކުރާ ގޮތުގައި ނުފޫޒު ބޭނުންކުރައްވައިގެން ޔާމީން، މއ.ކުރިކީލަހިޔާ އަހުމަދު ކްރިކް ރިޒާ މެދުވެރިކޮށް ރިޝްވަތުގެ ގޮތުގައި 1،117،000 ޑޮލަރު ހޯދައި ސަން ކޮންސްޓްރަކްޝަން އެންޑް އިންޖިނިއަރިން އާއި ސަން އިންވެސްޓްމެންޓް ބޭނުންކޮށްގެން އެ ފައިސާ ލޯންޑާކުރުމަށްޓަކައި ބޭނުން ކޮށްފައިވެ އެވެ.
އެމްއެމްޕީއާރްސީގެ ތެރެއިން ފުއްގިރި ކުއްޔަށް ދޫކުރީ ބިޑަކާ ނުލާ ދުބާއީ ކުންފުންޏެއް ކަމަށްވާ ކްލެސިކް ސިޓީ އައިލެންޑް ހޯލްޑިންގްސްއާ އެވެ. އެ ކުންފުންޏަށް ފުއްދިރި ދިނީ 1.55 މިލިއަން ޑޮލަރަށެވެ. ފުއްގިރި ކުއްޔަށް ދިނުމުގައި ރިޝްވަތުގެ ކަންތައްގަނޑެއް ހިންގާފައިވާއިރު, ޕެންޑޯރާ ޕޭޕާސްގައި ހާމަވި ގޮތުގައި އޭގެ ފަހަތުގައި ތިބީ އިންޑިއާގެ ނުޒޫފުގަދަ ވިޔަފާރިވެރިންތަކެވެ.
އެ ގޮތުން, ލީކްކޮށްލާފައިވާ ޕެންޑޯރާ ޕޭޕާސްއަށް ލިބިފައިވާ ލިޔުންތަކުން ދައްކާ ގޮތުގައި ކްލެސިކް ސިޓީ އައިލެންޑް ހޯލްޑިންގްސް ކުންފުންޏަކީ އިންޑިއާގެ ޕްރޮޕަޓީ ޑިވެލޮޕަރެއް ކަމަށްވާ އަވިނާޝް ބޮސާލޭގެ މަސްލަހަތު އޮންނަ ވިޔަފާރިއަކާއި ލޮޖިސްޓިކް ވިޔަފާރީގައި ނުފޫޒުގަދަ އިންޑިއާ މީހެއް ކަމަށްވާ އަމިތު ކުމާރު ގާންދީގެ ޕާޓްނަޝިޕް ކުންފުންޏެކެވެ.
ޕީޕީއެމްގެ ރިޔާސީ ކެންޑިޑޭޓް ޔާމީން މިހާރު ވެސް ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެއީ އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދޫކުރުމުގައި 1.1 މިލިއަން ޑޮލަރު ރިޝްވަތުގެ ގޮތުގައި ނަންގަވައި އެ ފައިސާ ލޯންޑަކުރެއްވި ކަމަށް ކްރިމިނަލް ކޯޓުގައި ސާބިތުވެއްޖެ ކަމަށް ކަނޑައެޅުމަށް ފަހުގަ އެވެ. އެ މައްސަލަ ހައި ކޯޓުގައި އިސްތިއުނާފްކުރުމަށް ޔާމީންގެ ވަކީލުން ގެންދަވަނީ މަސައްކަތް ކުރައްވަމުންނެވެ.
