ވާހަކަ؛ ދޮންސޮރު

އާޓްވޯކް: ރައްޔާން މުހައްމަދު/އަދަދު

އާޓްވޯކް: ރައްޔާން މުހައްމަދު/އަދަދު

"ދޮންސޮރާ." މުސްކުޅި މުސްކުޅި އެ އަޑު ކަންފަތަށް އިވުނެވެ. އެކަމަކު ސަމާލުކަމެއް ނުދެވުނެވެ. ކަންފަތާއި ކަނދުރާއަށް ހީނބިހި ގަނޑެއް ވެއްޓުނީ ހަމަ އެ ވަގުތު އެވެ. ކަނދުރާއަށް ވެއްޓުނު ހީނގަނޑު ކަންފަތާ ދިމާއިން ހަށިގަނޑުގެ އެތެރެއަށް ފޭދިގެން ދިޔަ އެވެ. މަޑުމަޑު ތުރުތުރެއް ހަށިގަނޑުގައި ދުވެލި އެވެ. ހިތުގެ ތެޅުން އަވަސްވި އެވެ. ފުން ނޭވާއެއް ބޭރުކޮށްލެވުނެވެ. ވަށައިގެންވީ ފަޅު ކަމެވެ. އަނދިރިކަމެވެ. އެ އަނދިރިކަމުގެ ތެރެއިން އިވެމުން ދިޔައީ ހުނުމާއި ސަކަރާތުގެ އަޑެވެ. ފަނޑު ގޮތަކަށް އަހަންނަށް ސިފަވަމުން ދިޔައީ އުފަލުން، ދުވަމުން ނަށަމުން ދިޔަ ދެ މީހުންނެވެ. ވައިގެ ތެރޭގައި އުދުހި އުޅޭހެން އުޅެމުން ދިޔަ ދެ މަފިރިންނެވެ. އަހަންނަށް ބަލައިލެވުނެވެ.

"ދޮންސޮރާ." މި ފަހަރު އިވުނީ ޒުވާން އަޑެކެވެ. ލުއި އަޑެކެވެ. ހުނުމާއި ސަކާރާތާއެކު ތަކުރާރުވަމުން އެ ދަނީ ހަމަ އެ އަޑެވެ.

އެއީ ކޮން އަޑެއް ހެއްޔެވެ؟ އެއީ ކާކު ހެއްޔެވެ؟ މި އަނދިރި ކަމުގެ ތެރޭގައި އަތް ބަނދެވިފައި މި ހުރެވުނީ ކީއްވެ ހެއްޔެވެ؟ އެކަނިވެރިކަން އަހަރެންގެ ވަށައިގެން މި ދުވަނީ ކީއްވެ ހެއްޔެވެ؟ މި ދަންވަރު މި އައީ ކޮންތާކުން ހެއްޔެވެ؟ ލޮލަށް ޖަމާވި ކަރުނަތައް ކޯތާފަތް މައްޗަށް އޮހިގަތެވެ. އެ ކަރުނަތައް ފޮހެލެވޭނެ ގޮތެއް ނެތެވެ. ނަމަވެސް ދެ އަތް އޮތީ ބަނދެވިފަ އެވެ. ކޮނޑުގައި އޮތީ ބަރު ދަބަހެކެވެ.

Advertisement

އަހަންނަކީ އުމުރުން ފަންސަވީސް އަހަރުގެ ޒުވާން ފިރިހެނަކީމެވެ. އައިޑީ ކާޑުގައި އޮތީ މުޙައްމަދު މާހިދު ނަމަވެސް އެންމެން ވެސް އަހަންނަށް ކިޔަނީ މާއްޓޭ އެވެ. އެ ނަމަކަށް އަހަރެން ޝަކުވާއެއް ނުކުރަމެވެ. މޫނުފޮތުގައި އެ ނަން ފެވީ އަހަރެންނެވެ. އަހަރެންގެ އެކަނިވެރި މި ހަޔާތަށް އައީ މީރާ އެވެ. އަހަންނާއި މީރާއާގެ ގުޅުމުގެ ބިންގާ ދަމައިލެވުނީ މޫނުފޮތުންނެވެ. އެ ފޮތުގައި ލިޔެވުނު ހުރިހާ ވާހަކަތަކަކަށް އެންމެ ގިނައިންކީ އެކަކަށްވީ ވެސް މީރާ އެވެ. މީރާއަކީ ކާކު ބަލަން އަހަރެން ހިތް ގޮވީ ވެސް އެހެންވީމަ އެވެ.

"އަހަންނަކީ މީރާ." ސަލާމަށް އަތްދިއްކޮއްލަމުން މީރާ ބުނެލި އެވެ.

ތަޢާރަފުގެ ދެތިން ޖުމުލައާ އެކު މީރާ ވަދެގަތީ އަހަރެންގެ ހިތަށެވެ. އަހަރެން ވެސް މީރާ ބޮނޑިކޮށްލުމަށްފަހު އަހަރެންގެ ހިތް އޭނާއަށް ހުޅުވާލީމެވެ.

"ވަރަށް ކޮންޕްލެކްސް ލައިފެއް. މާލޭގައި އުޅޭކަށް ބޭނުމެއް ނޫން. ބޭނުންވަނީ ރަށަށް ބަދަލުވާން."

މީރާގެ އެ ޖުމުލައިން އަހަންނަށް ކުރުވީ އާދަޔާ ޚިލާފު އަސަރެކެވެ.

އޭރު އަހަންނަށް ހުރެވުނީ މީރާގެ އަތުން ދޫކޮށް ނުލެވޭ ވަރަށް އެ އަތުގައި ހިފިފަ އެވެ. އޭނާގެ ދެއަތަށް ވާންކޮށްލެވިފައެވެ. އަހަންނަކީ ވެސް އެކަނި ހުރި ފުރާނައެކެވެ. ކޮޅުބަންދުވެ ނިމި ހުސްވެފައިވާ އާއިލީ މަތިކޮޅުގެ ނިމުން އޮތީ މަންމައާއި ބައްޕައާ ހަމައިގައެވެ. އުމުރުން ވިހި އަހަރުވީ އިރު އެ ހުރިހާ ކަމެއް ނިމި ދިޔަ އެވެ. އެކަނިވެރިކަމުގެ ފަރުދާ ނަގައިދީ އޯގާތެރިކަމުގެ ކުޑައިގެ ހިޔަލަށް އަހަރެނ ވައްދައިދިނީ ވެސް މީރާ އެވެ.

ކައިވެނީގެ ގޮށް ޖަހައިލެވުމާއެކު އަހަރެންގެ ދިރިއުޅުން މީރާގެ ރަށަށް ބަދަލުކުރީމެވެ. ހުރިހާ ކަމެއް ހަމަޖެހިގެން ދިޔައީ ވައި ހިނދިފައިވާ ދުވަހަކު ކަނޑުގައި ދަމައިލި ރޮނގެއް ފަދައިންނެވެ. އެހައި އަވަހަށެވެ. ވަޒީފާގެ ކަންކަން ހަމަޖެހުނެވެ. މީރާގެ ރަށަށް ހޭނިލައި އެ ރަށުގެ މީރު ފެން އަރުތެރެއަށް މީރުވާން ފެށި އެވެ.

މީރާގެ އާއިލާއަކީ ވެސް ކުޑަ އާއިލާއެކެވެ. އޭނާގެ ހުރިހާ ވެސް މީހަކީ ބޮޑު ދައިތަ އެވެ. ބޮޑުދައިތައަކީ އޭނާގެ ދިރުމެވެ. މީރާ މީރާއަކަށް ހަދައިދިން މީހާ އެވެ.

"ބޮޑުދައިތަ ބޭނުންވަނީ އަހަރެން މި ރަށުގައި އުޅެން. ބޮޑުދައިތަ ބަލިވުމުން ވެސް ބޭނުމެއް ނުވި މާލެ ބަދަލުވާކަށް." މީރާ އޮތީ އަހަރެންގެ މުލައްދަނޑީގައި ބޯ އަޅައިލައިގެންނެވެ.

"ކީއްވެ ލައިފް ކޮންޕްލެކްސްއޭ ބުނީ؟" އަހަރެންގެ ސުވާލު ތަފާތުކޮށްލީމެވެ.

ކައިވެންޏަށްފަހު ހުރިހާ ކަމެއް އަހަންނަށް ވެސް އެނގެން ޖެހޭނެ ކަމަށް ވިސްނޭތީ އެވެ. އެކަން ގަބޫލުކުރެވިގެންނެވެ.

"ކިޑެއް ބޭނުން. ވަރަށް އަވަހަށް." ސުވާލަށް ޖަވާބު ދިނުމުގެ ބަދަލުގައި މީރާ ފެށީ އެހެން ވާހަކައެކެވެ.

"ކޮބާ މަގޭ ސުވާލުގެ ޖަވާބު؟"

"ލިބޭނެ. އަދި ވަގުތެއް ނުޖެހޭ." މީރާ ހީނލަމުން އަހަރެންގެ މޫނަށް ބޮސްދިނެވެ.

މާމުއި ހަނދުގެ މޫސުން ނުނިމެނީސް މީރާގެ ތުންފަތުގައި ދެ ހިނިތުންވުން އެކުގައި ތަތްވި އެވެ. އޭނާގެ މޫނުމަތިން ދުވަހަކު ވެސް ނުފެންނަހާ ތާޒާ ހިނިތުން ފެނި އަހަންނަށް ބުނެދޭން ނޭނގޭ އިހުސާސްތަކެއް ކުރެވެން ފެށި އެވެ.

"ތޭންކްސް، ދެން ދިރިއުޅުން ކާމިޔާބުވީ. މިހާރު އަހަރެން ބޭނުން ހުރިހާ ކަމެއް ވެ މި ނިމެނީ." މީރާގެ ބަނޑުގައި ފިރުމައިލަމުން ބުނެލި އެވެ.

"ބޮޑުދައިތަ ވަރަށް ބައްޔެއްނު. ވިހަން މާލެދާއިރު ގޮވައިގެންދާންވީނު." އަހަރެން ބުނެލީމެވެ.

"ބޮޑުދައިތަ ބޭނުމެއް ނުވާނެ. އެނގެޔެއްނު ބޮޑުދައިތަ ބުނާ ވާހަކަ. އެއީ މުސްކުޅި ބައްޔޭ. ފަރުވާއެއް ނެތޭ. އެހެން ނޫނަސް ބޮޑުދައިތަ ދިޔައީމަ މި ގެ ފަޅުވާނެ. މާއްޓޭ ގެއަށް އަންނަ އިރު މަރުހަބާ ކިޔާނެ މީހަކު ގޭގައި ހުންނަންވާނެ ދޯ." މީރާ ފަރުވާ ކުޑަ ގޮތަކަށް ބުނެލި އެވެ.

"މީރާ، އަހަންނަށް ކަމެއް ސިއްރުކުރަނީތަ؟" އަހަންނަށް ނޯވެވިގެން ބުނެލެވުނެވެ.

"ކީއްވެ ތިހެން ހިތަށް އަރަންވީ؟" މީރާގެ ދެ ލޯ ބޮޑުވި އެވެ.

"ވަރަށް ދުވަސްވެއްޖެ މިހެން އަހަން އުޅޭތާ ވެސް،" އަހަރެން ބުނެލީމެވެ. "އެންމެ ފުރަތަމަ ދިމާވި ދުވަހު އެ ބުނެލި ވާހަކަ އަދިވެސް ހަނދާން އެބަހުރި."

"އާނ! ވަރަށް ކޮންޕްލެކްސް ލައިފެއް،" މީރާ ލުއި ގޮތަކަށް ހިނިތުންވެލި އެވެ. "އަހަރެން ބުނާ ކަމަކަށް ވައުދުވަން ކެރޭނެތަ؟"

"ވައުދު؟"

"އާނ! އަހަރެންގެ މި ލޯބީގެ ނިޝާން ރަނގަޅަށް ބެލުން. ކޮންމެ ހާލެއް ޖެހުނަސް އަހަރެންގެ މި ހަނދާން އަމާނާތެއްގެ ގޮތުގައި ބެލުން." މީރާ ބޯ އަޅައިލީ އަހަރެންގެ މޭ މަތީގަ އެވެ.

އަހަރުމެން ތިބީ އެނދުގައި އޮށޯވެލައިގެންނެވެ. އެއީ ނިދުމުގެ ކުރީން އަހަރުމެން ކުރާ ކަމެކެވެ. ކޮންމެ ދުވަހެއްގެ ޚުލާޞާ ބަޔާން އިއްވުމެވެ. އެ ދުވަހެއްގެ ޔައުމިއްޔާ ފާސްކުރުމެވެ. އަންނާން އޮތް ދުވަހުގެ ތާވަލު ރޭވުމެވެ. ކަމާކެމި އެކުލަވާލުމެވެ.

"ތީ ހަމައެކަނި މީރާގެ ދަރިއެއްތަ؟" ލާނެތް ފާޑަކަށް އަހަންނަށް ހީނލެވުނެވެ.

"ހަމައެކަނި މާއްޓޭގެ،" މީރާ އަޑު ކުރެހެމުން ދިޔަ ކަން އިހުސާސްކުރެވުނެވެ. "މި ދަރިފުޅުގެ މީހަކަށްވާނީ ހަމައެކަނި މާއްޓޭ. ދަރިފުޅުގެ ބައްޕައަކަސް، މަންމައަކަސް، މާމައަކަށް ވެސް، ކާފައަކަށް ވެސް."

"މާނައަކީ މީރާ ފިލާނީއޭތަ؟" އަހަންނަށް ވިސްނުނީ އެހެން ގޮތަކަށެވެ.

މީރާ އެނދުން ތެދުވި އެވެ. އޭނާ ގޮސް ހުއްޓިލީ އަލަމާރި ކައިރިއަށެވެ. އަލަމާރިން ނެގީ ފައިލެކެވެ. މީރާ ނެގި ފައިލް އަހަންނަށް ދިއްކޮށްލި އެވެ. އަހަންނަށް ކުރެވެމުން ދިޔަ ހީތައް ޔަގީންވާން ފެށި އެވެ. މީރާގެ ވާހަކަތަކާއި އޭނާ ބުނެލާ ކޮންމެ ކަމެއްގެ ފަހަތުގައި ފޮރުވިފައި ކޮންމެ ވެސް ބޮޑު ވާހަކައެއް އޮތްކަން ހާމަވަމުން ދިޔަ ދިޔުން ނިމުމަކަށް އައެވެ.

"އާނ! އަހަންނަކީ ވަގުތީ މެޚްމާނެއް. އޮތީ މަދު ދުވަސްކޮޅެއް." މީރާ ފެންކަޅިވި އެވެ. "ދަރިފުޅު އުފަންވާނީ އިރު އަހަންނަށް ޖެހޭނީ ފުރަން. މާދުރަށް ދާން. ދަރިފުޅުގެ ރުއިމުގެ އަޑު ވެސް ނީވޭހާ ދުރަށް. އަހަންނަށް މަޢާފުކުރާތި! މި ހުރިހާ ވާހަކައެއް ސިއްރުކުރާން ޖެހުނީތީ އަހަރެން މަޢާފަށް އެދެން."

"ކީއްވެ؟" އަހަންނަށް އަހައިލެވުނެވެ.

"އަހަރެންގެ ހަޔާތަށް އައި ކޮންމެ މީހަކު ވެސް އަހަރެން ދޫކޮށްލި މައިގަނޑު ސަބަބަކަށްވީ އަހަރެންގެ މި ބަލި. މި ބަލީގެ އަސްލު އެނގޭއިރަށް ކޮންމެ މީހަކު ވެސް އަހަރެން ދޫކޮށްލާ. ލޯބިވެރިއެއްގެ ގޮތުގައި އަހަރެންގެ ފޮޓޯ އަލްބަމަށް ލީ ކޮންމެ މީހެއްގެ ފޮޓޯ ގަނޑު އިރާލަން ޖެހުމުގެ އަސްލަކަށްވީ ވެސް މި ބަލި." މީރާ ގިސްލަމުން ގިސްލަމުން ކިޔައިދިނެވެ.

އަހަރެން އޮތީ ނޭވާ ހިފަހައްޓައިލައިގެންނެވެ. މީރާގެ ވާހަކަތައް އަޑު އަހާށެވެ.

"މާއްޓޭ އަހަރެންގެ ދުރުމީގެ ލެންސަށް އެރީ މާއްޓެއަކީ އެކަނިވެރިއަކަށްވީތީ. އާއިލާގެ މީހަކު ނެތީތީ،" މީރާ ނޭވާ ބޭރުކޮށްލި އެވެ. "އާނ! އަހަންނަށް ޔަގީންވީ އަހަރުމެންގެ ގުޅުމަށް ހުރަސް އަޅާނެ މީހަކު މާއްޓޭގެ އާއިލާގައި ނުހުންނާނެކަން. ދެން އޮތީ ދިރިއުޅުން މާލެއިން މި ރަށަށް ބަދަލުކުރި ސަބަބު ދޯ."

އަހަންނަށް ބޯ ޖަހައިލެވުނެވެ. މީރާ ރޮމުން ގިސްލަމުން ދެއްކި ހުރިހާ ވާހަކަތަކެއް އަޑުއަހާކަން އޭނާއަށް އިހުސާސްވާނޭހެން އަހަރެން އިނީމެވެ. ކަނުލައި އަޑު އަހާށެވެ.

"މިއީ ބޮޑުދައިތަ ބޭނުންވާ ގޮތް،" މީރާ ނޭވާ ބޭރުކޮށްލި އެވެ. "ޑޮކުޓަރުން ވެސް ލަފާދިން ގޮތް. ޑޮކުޓަރުންގެ ލަފަޔަކީ އުފާވެރި ހިތްހަމަޖެހޭ ތަނެއްގައި ދިރިއުޅެ ހަޔާތުގެ ފަހު ދުވަސްތައް ގުނުން. އަހަރެން މި ހޭދަކުރި ނުވަމަހަކީ އަހަރެންގެ ހަޔާތުގައި ހޭދަކުރާނެ އެންމެ އުފާވެރި ނުވަ މަސް."

މީރާ އަހަރެންގެ ގައިގައި އޮޅުލައިގަތެވެ. އޭނާ އެ ހުރިހާ ވާހަކައެއް މިރޭ ކިޔައި އެ ދިނީ ވެސް ސަބަބެއް ނެތި އެއް ނޫނެވެ. އޭނާގެ ބަނޑަށް ދުވަސްފުރި ވިހާނެ ކަމަށް ޑޮކުޓަރުން ދިން ވަގުތު ގުނާން ފެށޭނީ ދެ ދުވަހެއްގެ ފަހުން ކަމަށްވާތީއެވެ.

ސިހިފައި އަހަންނަށް ބަލައިލެވުނެވެ. ހިޔާލުތަކުގެ ދުނިޔެއިން ނުކުމެވުނެވެ. ތުއްތު ކުއްޖަކު ރޮއެލިހެން ހީވެގެންނެވެ. ވަށައިގެން ހޯދައިލެވުނެވެ. އަތުގައި އޮތް ލޯބިލޯބި ފުށްގަނޑަށް ބަލައިލެވުނެވެ. އެއީ އަހަރެންގެ ލޯބީގެ ނިޝާނެވެ. އާއެކެވެ. މީރާ އަހަންނަށް ދިން ހަދިޔާއެވެ. މީރާގެ ނިޝާނެވެ. މީރާގެ ޖަނާޒާގެ ކަންކަން ނިންމުމަށްފަހު އަހަރެން ދަރިފުޅު ގޮވައިގެން ރަށަށް އައުމާއެކު އޭނާގެ ހަނދާންތައް ވަށައިލީ އެވެ. މީރާގެ އަޑު ވަށައިގެން އެނބުރޭން ފެށީ އެވެ.

މީރާއަކީ ހިތްވަރުގަދަ މީހެކެވެ. ސިކުނޑީގެ ކެންސަރާ އޭނާ ހަނގުރާމަ ކުރީ އެކަން މީހަކަށް ނޭނގޭހާ ސިއްރުންނެވެ. ޑޮކުޓަރުގެ ލަފަޔާއި ބޭހުގެ އެހީގައި އޭނާ ހޭދަ އެ ކުރީ އުފާވެރި ދުވަސްތަކެކެވެ. ޚުދު އަހަންނަށް ވެސް އެކަން ނޭނގުނެވެ. ސުވާލުތަކެއް ބޮލުގައި ހުއްޓަސް އޭނާ އެކަން ހަމަޖައްސާލަނީ އެހައި މޮޅަށެވެ.

އަހަންނަށް ބަލައިލެވުނެވެ. ކުރިމަތީގައި ހުރީ ބޮޑު ދައިތަ އެވެ. އޭނާގެ ބަލި އަޑުން އަހަންނަށް ގޮވާލި އެވެ. "ދޮންސޮރާ!"

އެއީ މީރާ އަހަންނަށް ލޯބިން ކިޔާ ނަމެވެ. ފަހުން ބޮޑު ދައިތަ ވެސް އެ ނަން ކިޔާން ފެށީ އެވެ. ނަމަވެސް އެ ނަން އަހަރެން ދޭންބޭނުންވީ ދަރިފުޅަށެވެ. މީރާގެ ހަނދާނުގަ އެވެ. މީރާގެ ޒިކުރާތައް ދިރުވުމަށެވެ.

"ދޮންސޮރު." ބޮޑުދައިތައަށް ދަރިފުޅު ދިއްކޮށްލަމުން އަހަރެން ބުނެލީމެވެ.

ފަހުގެ ޚަބަރު

އުމުރުން 70 އަށް ދުޅަހެޔޮކޮށް ދިއުމަށް ސައިންސްވެރިން އިރުޝާދު

އުމުރުން 30 ގެ އަހަރުތަކަކީ ހަށިގަނޑަށް ބަދަލުތައް އަންނަ ދުވަސްވަރަކަށް ވުމުން، މި އުމުރުގައި ކަސްރަތުކުރުމާއި ނިދުމުގެ އާދަތައް ރަނގަޅުކުރުމަކީ އުމުރުން ދުވަސްވާއިރު ދުޅަހެޔޮކަންމަތީ ހުރުމަށް އެޅޭ މުހިންމު ފިޔަވަޅެކެވެ. މީގެ އިތުރުން، އަނގަޔާއި ދަތްތަކުގެ ސިއްހަތަށް ސަމާލުކަން ދިނުމާއި ނުރަނގަޅު އާދަތަކާ ދުރުހެލިވުމަކީ މުސްކުޅިވުމުން ކުރިމަތިވާ ބަލިތަކުން ރައްކާތެރިކޮށްދީ އުމުރު ދިގުކޮށްދޭނެ ކަންކަމެވެ.

ޖީޓީއޭ 6 ރެކޯޑް މާކްސްއަކާއެކު ނެރެފި

ތޭރަ އަހަރުގެ ދިގު އިންތިޒާރަކަށްފަހު ނެރުނު ޖީޓީއޭ 6 އަށް ރެކޯޑް މާކްސްއެއް ލިބި، ގޭމިން ދާއިރާއަށް އިންގިލާބީ ބަދަލެއް ގެނުވައިފިއެވެ. މި ގޭމުގެ ގްރެފިކްސް އާއި ވާހަކަ ކިޔައިދޭ ގޮތް ފުރިހަމަވުމުގެ އިތުރުން، މިއީ މި ސިލްސިލާގައި އަންހެން ކެރެކްޓަރަކަށް މައިގަނޑު ދައުރެއް ދިން ފުރަތަމަ ފަހަރެވެ.

މަސް ނުކައިވެސް ހަށިގަނޑަށް ބޭނުންވާ ދަގަނޑު ހޯދިދާނެ!

މަހުގެ ބާވަތްތަކުގެ އިތުރުން ފަތްޕިލާވެއްޔާއި ގޮވާމުގެ ބާވަތްތަކުން ވެސް ހަށިގަނޑަށް ބޭނުންވާ ދަގަނޑުގެ މާއްދާ ހޯދިދާނެކަން ސިއްހީ މާހިރުން ފާހަގަކުރެއެވެ. މިގޮތުން ކާނާ ތައްޔާރުކުރާ ގޮތަށް ބަދަލު ގެނައުމާއި، ވިޓަމިން ސީ އެކުލެވޭ ތަކެއްޗާއެކު ކެއުމަކީ ގަސްގަހާގެހިން ލިބޭ ދަގަނޑު ހަށިގަނޑަށް ދަމައިގަންނަ މިންވަރު އިތުރުކޮށްދޭނެ ކަންކަމެވެ.

އާ ޖޭމްސް ބޮންޑަކަށް ރޮބަޓް ޕެޓިންސަން

ޖޭމްސް ބޮންޑުގެ ރޯލު ކުޅޭނެ އާ އެކްޓަރަކަށް އިނގިރޭސި އެކްޓަރު ރޮބަޓް ޕެޓިންސަން ހަމަޖައްސައި، 2028 ވަނަ އަހަރު ރިލީޒްކުރާ ބޮންޑު ސިލްސިލާގެ 26 ވަނަ ފިލްމު ޑެނިސް ވިލެނޫވް ޑައިރެކްޓްކުރާ ގޮތަށް އެމެޒޯން އެމްޖީއެމް އިން ވަނީ އިއުލާންކޮށްފައެވެ. މި ރޯލު ލިބުމަކީ ބޮޑު ޝަރަފެއް ކަމަށް ޕެޓިންސަން ބުނެފައިވާއިރު، މިއީ ޑެނިއަލް ކްރެއިގަށް ފަހު މި މަޝްހޫރު ޖާސޫސީ ރޯލުން ފެންނާނެ ހަތްވަނަ އެކްޓަރެވެ.

އަނދިރީގައި ފެންވެރުން ނިދި އައުން ފަސޭހަވޭތަ؟

ނިދުމުގެ ކުރިން އަނދިރީގައި ފެންވެރުމަކީ ހަށިގަނޑުން މެލަޓޯނިން އުފައްދައިދީ، ސިކުނޑި ހަމަޖައްސައިދީ އަވަހަށް ނިދި އައުމަށް އެހީތެރިވެދޭ ކަމެއް ކަމަށް ސިއްހީ މާހިރުން ބުނެއެވެ. މިގޮތަށް ފެންވެރުމުން ހަށިގަނޑުގެ ފިނިހޫނުމިން ދަށްވެ، ދުވަހުގެ ސްޓްރެސް ކުޑަކޮށްދީ ނަފްސާނީ ގޮތުން އަރާމު ލިބިގެންދެއެވެ. ނަމަވެސް މިއީ ނިދުމުގެ ބޮޑެތި ބަލިތަކަށް އޮތް ދާއިމީ ހައްލެއް ނޫންކަމަށް މާހިރުން ފާހަގަކުރެއެވެ.

ޕްރޮސްޓޭޓް ކެންސަރަށް ގަވާއިދުން ސްކްރީން ކުރަން ބުނެފި

ޕްރޮސްޓޭޓް ކެންސަރު ޖެހޭ މިންވަރު އިތުރުވަމުންދާތީ، އެމެރިކަން ކެންސަރ ސޮސައިޓީން ވަނީ އުމުރުން 50 އަހަރާއި 69 އަހަރާ ދެމެދުގެ ފިރިހެނުން ގަވާއިދުން ސްކްރީން ކުރުމަށް އާ އިރުޝާދުތަކެއް ނެރެފައެވެ. މި ބަދަލުގެ ދަށުން ބަލީގެ ނުރައްކާ ބޮޑު މީހުން އުމުރުން 45 އަހަރުން ފެށިގެން ކޮންމެ އަހަރަކު ޓެސްޓުކުރަން ލަފާދީފައިވާއިރު، މީގެ މަގުސަދަކީ ބަލި ކުރީކޮޅު ދެނެގަނެ މަރުވާ މިންވަރު މަދުކުރުމެވެ.

ޓޭލާ ސުވިފްޓަކީ ފޭކު ސަޕޯޓަރެއް ކަމަށް ކުޅުންތެރިން ބުނެފި

ނިއުޔޯކް ނިކްސްގެ ބައެއް ކުޅުންތެރިން ޓޭލާ ސުވިފްޓަކީ ދެއްކުންތެރިކަމަށް މެޗުތަކަށް އަންނަ "ފޭކު" ސަޕޯޓަރެއް ކަމަށް ބުނުމުން، އެ ޓީމުން އޭނާގެ ދިފާއުގައި ވާހަކަދައްކައިފިއެވެ. ޓީމުގެ ތަރުޖަމާނު ވަނީ ސުވިފްޓަކީ ގިނަ ދުވަސްތަކެއް ވަންދެން ޓީމަށް ސަޕޯޓްކުރާ ވަފާތެރިއެއްކަން ފާހަގަކޮށް، ކުޅުންތެރިންގެ ވާހަކަތައް ދޮގުކޮށްފައެވެ.

Newsletter

Get the latest news delivered straight to your inbox