ކެފޭ ތާސީރު ބަންދުކުރި މައްސަލައިގައި ޝަރީއަތަށް ދާން ސިޓީ ކައުންސިލުން ނިންމައިފި އެވެ.
ޝަރީއަތަށް ދާން ނިންމާފައި ވަނީ އެތައް ފަހަރެއްގެ މަތިން އެތަން ހުސްކުރުމަށް ކެފޭ ހިންގާ ފަރާތަށް އެންގުމުން ވެސް އެންގުމާ އެއްގޮތަށް އެ ފަރާތުން އަމަލު ކޮށްފައި ނުވާތީ ކަމަށް މާލެ ސިޓީ ކައުންސިލުގެ ތަރުޖަމާނު، މަރިޔަމް ޝިއުނާ ވިދާޅުވި އެވެ.
އެ ކެފޭ ބަންދު ކުރުމަށް ސިޓީ ކައުންސިލުން އަންގާފައި ވަނީ ނީލަން ފިހާރައިގައި ހިނގި އަލިފާނުގެ ހާދިސާއަށް ފަހު އެވެ. ކެފޭ ހިންގަމުން އަންނަނީ ވިލާ ގޭހުގެ ގުދަނާއި އިންވެގެން ކަމަށް ވާތީ އެތަނުގައި އަލިފާނުގެ ހާދިސާއެއް ހިނގުމުގެ ނުރައްކާ އިންތިހާއަށް ބޮޑު ކަމަށް މާލެސިޓީގެ މޭޔަރު، ޑރ. މުހައްމަދު މުއިއްޒު ވަނީ އޭރު ވިދާޅުވެފަ އެވެ.
މުއިއްޒު ވިދާޅުވި ގޮތުގައި އެ ކެފޭ އެތަނުގައި ހިންގަމުން އަންނަނީ ވެސް އެގްރީމަންޓާ ހިލާފަށެވެ. އެ މައްސަލަ ކައުންސިލުގެ ފަރާތުން ކޯޓަށް ހުށަހެޅުމުން ވަނީ ކައުންސިލާ އެއްކޮޅަށް މައްސަލަ ވެސް ނިންމާފަ އެވެ. އެހެންނަމަވެސް މިއަދާ ހަމައަށް ވެސް އެތަނުގައި ކެފޭ ދަނީ ހިންގަމުންނެވެ.
ކެފޭ ތާސީރު ހިންގަމުން އަންނަނީ މާލޭގައި މީގެ ކުރިން ފާޚާނާ ބަރިތައް ހިންގަމުން އައި ބިންތަކުގެ ތެރެއިން އެއްބިމުގަ އެވެ. އޭރުގެ މުނިސްޕަލްޓީން ބަލަހައްޓަމުން އައި އެ ފާޚާނާ ބަރިތައް އަމިއްލަ ފަރާތަކަށް ކުއްޔަށް ދޫކޮށްލީ 2010 ވަނަ އަހަރު އެވެ.
އޭގެފަހުން މިދިޔަ އަހަރު ސިޓީ ކައުންސިލުން ވަނީ ރަނގަޅަށް ނުބެލެއްހެއްޓޭ ކަމަށް ބުނެ އެތަންތަން ބަންދު ކުރުމަށް ނިންމައިފަ އެވެ. އޭގެތެރޭގައި ކެފޭ ތާސީރުގައި ހިންގަމުން އައި ފާޚާނާ ބަރިވެސް ހިމެނުނެވެ.
ސިޓީ ކައުންސިލުން ބުނީ ވަރަށް ފަހުން ވެސް އެ ކެފޭ ބަންދު ކުރުމަށް ކައުންސިލުން މަސައްކަތް ކުރުމުން އެކަމަށް އިޖާބަ ނުދީ، ކައުންސިލާ ދެކޮޅަށް ވަގުތީ އަމުރެއް ނެރެދިނުމަށް އެދި ކެފޭ ހިންގާ ފަރާތުން އެ މައްސަލަ ކޯޓަށް ހުށަހެޅި ކަމަށެވެ. ނަމަވެސް ދަށު ކޯޓުން އެފަދަ އަމުރެއް ނެރެ ނުދިނުމުން އަނެއްކާ އެ މައްސަލަ ހައިކޯޓަށް ހުށަހަޅާފައިވާ ކަމަށެވެ. އަދިވެސް އެ މައްސަލަ އޮތީ ކޯޓު މަރުހަލާގަ އެވެ.
ނުރައްކާތެރި އަލިފާނުގެ ހާދިސާއެއް ހިނގުމުގެ ފުރުސަތު ބޮޑު ކަމަށް ބުނެ ކެފޭ ތާސީރު ބަންދު ކުރުމަށް ސިޓީ ކައުންސިލުން އެ ކެފޭއަށް އެންގިފަހުން ވެސް މާލޭގެ ކެފޭއެއްގައި އަލިފާނުގެ ހާދިސާއެއް ހިނގައި އެކިވަރުގެ ގެއްލުންތަކެއް ވަނީ ލިބިފަ އެވެ.
